ភ្នំពេញៈ អគ្គលេខាធិការអង្គការសហប្រជាជាតិលោក Antonio Guterres បានរំឭកឡើងវិញនូវការអំពាវនាវរបស់លោកឱ្យមានការដោះលែងអ្នកទោសនៅក្នុងប្រទេសមីយ៉ាន់ម៉ា ការបញ្ចប់អំពើហិង្សា និងការវិលត្រឡប់ទៅកាន់លទ្ធិប្រជាធិបតេយ្យ ដោយលោកបញ្ជាក់ថានេះគឺជាផ្លូវតែមួយគត់ដែលងើបចេញពីវិបត្តិបច្ចុប្បន្ន។
លោកបានថ្លែងថា វាចាំបាច់ត្រូវមានដំណើរការប្រកបដោយបរិយាបន្ន ហើយឥណ្ឌូនេស៊ីនឹងខិតខំប្រឹងប្រែងដើម្បីសម្រេចបាននូវចំណុចទាំងអស់នេះ នៅពេលកាន់តំណែងជាប្រធានអាស៊ានឆ្នាំក្រោយ។
លោក Guterres បានថ្លែងដូច្នេះនៅទីក្រុងភ្នំពេញដែលលោកបានចូលរួមក្នុងកិច្ចប្រជុំកំពូលអាស៊ាន-អង្គការសហប្រជាជាតិ។
ក្នុងសន្និសីទសារព័ត៌មាននាថ្ងៃទី ១២ ខែវិច្ឆិកា លោក Guterres បានថ្លែងថា៖ «ស្ថានភាពនៅក្នុងប្រទេសមីយ៉ាន់ម៉ា គឺជាសុបិនដ៏អាក្រក់សម្រាប់ប្រជាជននៃប្រទេសនេះ និងការគំរាមកំហែងដល់សន្តិភាព និងសន្តិសុខនៅទូទាំងតំបន់។ ការវាយប្រហារមកលើជនស៊ីវិល គឺជារឿងគួរឱ្យរន្ធត់ និងឈឺចាប់»។
លោកថ្លែងថា៖ «ខ្ញុំអំពាវនាវឱ្យអាជ្ញាធរក្នុងប្រទេសមីយ៉ាន់ម៉ាស្តាប់ប្រជាជនរបស់ខ្លួន ដោះលែងអ្នកទោសនយោបាយ និងវិលត្រឡប់ទៅរកលទ្ធិប្រជាធិបតេយ្យឡើងវិញជាបន្ទាន់។ នេះគឺជាមធ្យោបាយតែមួយគត់ ដើម្បីស្ថិរភាព និងសន្តិភាព»។
លោកជំរុញឱ្យអាស៊ានស្វែងរកយុទ្ធសាស្ត្រដោយឯកភាពគ្នាសម្រាប់ប្រទេសមីយ៉ាន់ម៉ា ដោយយកចិត្តទុកដាក់លើតម្រូវការ និងសេចក្តីប្រាថ្នារបស់ប្រជាជនរបស់ប្រទេសនេះ។
លោក Guterres ក៏បានអំពាវនាវឱ្យមីយ៉ាន់ម៉ាបង្កើតលក្ខខណ្ឌ សម្រាប់ការវិលត្រឡប់ដោយស្ម័គ្រចិត្តរបស់ជនភៀសខ្លួនរ៉ូហ៊ីងយ៉ាជិត ១ លាននាក់។
បន្ទាប់ពីកិច្ចប្រជុំកំពូលនេះ លោកបានសរសេរលើ Twitter ថា៖ «នៅឯអាស៊ាន ខ្ញុំបានថ្កោលទោសស្ថានភាពសិទ្ធិមនុស្សដ៏គួរឱ្យរន្ធត់ក្នុងប្រទេសមីយ៉ាន់ម៉ា និងបានអំពាវនាវម្តងហើយម្តងទៀតឱ្យអាជ្ញាធររបស់ប្រទេសនេះដោះលែងអ្នកទោសនយោបាយទាំងអស់ និងចាប់ផ្តើមដំណើរការប្រកបដោយបរិយាប័ន្ន ដើម្បីវិលត្រលប់ទៅរកប្រជាធិបតេយ្យវិញ»។
លោក Guterres ក៏បានជំរុញប្រទេសជាសមាជិកទាំងអស់ឱ្យបង្កើតក្របខ័ណ្ឌតំបន់មួយ ដើម្បីការពារជនភៀសខ្លួន៕