ភ្នំពេញៈ រដ្ឋមន្ត្រីការបរទេស អ៊ុយក្រែន លោក Dmytro Kuleba លើកឡើងថា អ៊ុយក្រែន សន្យានឹងប្រើប្រាស់ឱកាសនៃការកសាងទំនាក់ទំនងជាមួយបណ្តាប្រទេស អាស៊ាន ដើម្បីលើកកម្ពស់កិច្ចការនយោបាយ ការធ្វើពាណិជ្ជកម្ម និងសន្តិសុខស្បៀង។
លោក Dmytro បានមកកាន់ទីក្រុងភ្នំពេញ កាលពីថ្ងៃទី៩ ខែវិច្ឆិកា ដើម្បីចុះហត្ថលេខាលើសន្ធិសញ្ញាស្តីពីមិត្តភាព និងកិច្ចសហប្រតិបត្តិការក្នុងតំបន់អាស៊ីអាគ្នេយ៍ (TAC) ក្នុងអំឡុងកិច្ចប្រជុំកំពូលអាស៊ាន ខណៈ អ៊ុយក្រែន ជឿជាក់ថា ទំនាក់ទំនងជាមួយបណ្តាប្រទេសអាស៊ាន គឺជាអាទិភាពមួយក្នុងចំណោមអាទិភាពនៃគោលនយោបាយការបរទេសរបស់អ៊ុយក្រែន។
នៅថ្ងៃដំបូងនៃវត្តមានរបស់លោកនៅទីក្រុងភ្នំពេញ លោកត្រូវបានទទួលស្វាគមន៍ដោយលោកនាយករដ្ឋមន្ត្រី ហ៊ុន សែន ដោយមានជំនួបទ្វេភាគីផងដែរ បន្ទាប់ពីកិច្ចសន្ទនាតាមទូរស័ព្ទរវាងលោក ហ៊ុន សែន ជាមួយប្រធានាធិបតី អ៊ុយក្រែន លោក Volodymyr Zelensky នៅថ្ងៃទី ១ ខែវិច្ឆិកា។
បន្ទាប់មកដល់កម្ពុជាបាន ១ថ្ងៃ លោកបានចុះហត្ថលេខាលើលិខិតុបករណ៍ចូលជាសមាជិក TAC នេះ ខណៈជាកិច្ចព្រមព្រៀងសម្រាប់ប្រទេសមួយដើម្បីក្លាយជាដៃគូរបស់អាស៊ាន គឺទាមទារឱ្យការគាំទ្រជាឯកច្ឆន្ទពីសមាជិកអាស៊ាន។
លោក Dmytro ថ្លែងថា៖ «យើងពិតជារីករាយដែលការចុះហត្ថលេខាចូល TAC នេះ ស្ថិតក្នុង អំឡុងពេលដែលកម្ពុជាធ្វើជាប្រធានអាស៊ាន។ ការចុះហត្ថលេខានេះបានក្លាយជាការពិត និងមានការឯកភាពគ្នាសម្រាប់យើង ហើយការឯកភាពនេះត្រូវបានធានា។ យើងចាត់ទុកការចុះហត្ថលេខា TAC ជាសារគាំទ្រ និងជាសារគាំទ្រផ្នែកនយោបាយពីបណ្តាប្រទេសអាស៊ាន ចំពោះអ៊ុយក្រែន»។
ក្នុងសន្និសីទកាសែតនាថ្ងៃទី១២ ខែវិច្ឆិកា លោកថ្លែងថា បញ្ហាចំពោះអ៊ុយក្រែន ចូលរួមជាមួយ TAC បានស្ថិតនៅក្នុងរបៀបវារៈជាច្រើនឆ្នាំមកហើយ។ ប៉ុន្តែទីបំផុតវាបានសម្រេចហើយ ហើយវាបាននាំទំនាក់ទំនងរបស់ អ៊ុយក្រែន ជាមួយប្រទេសអាស៊ានទៅកាន់កម្រិតថ្មីមួយ។
លោក Dmytro ថ្លែងថា៖ «យើងនឹងស្វែងរក និងប្រើប្រាស់រាល់ឱកាសនៃការកសាងទំនាក់ទំនងកាន់តែស៊ីជម្រៅជាមួយបណ្តាប្រទេសអាស៊ានក្នុងវិស័យនយោបាយ ពាណិជ្ជកម្ម អាជីវកម្ម និងសន្តិសុខស្បៀង។ ទាំងនេះ គឺជាអាទិភាពទាំងអស់សម្រាប់ទាំងយើង និងប្រទេសអាស៊ាន»។
លោកថ្លែងថា ដំណើរទស្សនកិច្ចរបស់លោកមកកាន់កិច្ចប្រជុំកំពូលអាស៊ាន ក៏ជាឱកាសមួយ ដើម្បីជួបពិភាក្សាទ្វេភាគីជាមួយរដ្ឋមន្ត្រីការបរទេសនៃប្រទេសអាស៊ានផងដែរ។
លោក Dmytro ថ្លែងថា៖ «យើងឃើញសហសេវិកជជែកគ្នា ពន្យល់គ្នាទៅវិញទៅមកអំពីជំហរ និងការយល់ឃើញនៃការឈ្លានពានរបស់រុស្ស៊ីទៅលើ អ៊ុយក្រែន ការស្វែងរកចំណុចរួម ការកំណត់ចំណុចនៃផលប្រយោជន៍ទៅវិញទៅមក។ ដូច្នេះ កិច្ចការការទូតតាមប្រពៃណី និងសាមញ្ញាកំពុងកើតមានឡើង»៕