ភ្នំពេញៈ លោកនាយករដ្ឋមន្ត្រីជប៉ុន លោក Fumio Kishida បានបង្ហាញចេតនាជំរុញកិច្ចសហប្រតិបត្តិការឱ្យកាន់តែស៊ីជម្រៅក្រោមក្របខ័ណ្ឌអាស៊ានបូក ៣ ដើម្បីរក្សា និងពង្រឹងសណ្តាប់ធ្នាប់អន្តរជាតិដោយសេរី និងបើកចំហដោយផ្អែកលើនីតិរដ្ឋ មិនប្រើប្រាស់កម្លាំងនៅក្នុងតំបន់។
លោក Kishida ថ្លែងដូច្នេះក្នុងកិច្ចប្រជុំកំពូលអាស៊ានបូក៣ ដែលមានប្រទេស ចិន ជប៉ុន និង កូរ៉េខាងត្បូង នៅរាជធានីភ្នំពេញ នាថ្ងៃទី១២ ខែវិច្ឆិកា។
យោងតាមសេចក្តីប្រកាសព័ត៌មានក្រសួងការបរទេសជប៉ុន បានឱ្យដឹងថា លោក Kishida បញ្ជាក់ថា ប្រទេស ជប៉ុន សម្តែងការខកចិត្តយ៉ាងខ្លាំងចំពោះស្ថានភាពកាន់តែធ្ងន់ធ្ងរនៅក្នុងប្រទេស មីយ៉ាន់ម៉ា ហើយជប៉ុន នឹងបន្តគាំទ្រយ៉ាងមុតមាំ ចំពោះកិច្ចខិតខំប្រឹងប្រែងរបស់អាស៊ានសម្រាប់ការអនុវត្តកិច្ចព្រមព្រៀងជាឯកច្ឆន្ទ (កុងសង់ស៊ីស) ៥ ចំណុចរបស់អាស៊ាន។
លោកបានបង្ហាញពីចេតនារបស់ប្រទេស ជប៉ុន ក្នុងការលើកកម្ពស់ជាលំដាប់នូវគំនិតផ្តួចផ្តើមនានា ទាំងក្នុងវិស័យថ្មីៗ ដូចជា សេដ្ឋកិច្ចឌីជីថល និងកសិកម្មដែលធន់ ដោយផ្អែកលើផែនការសកម្មភាពនៃកិច្ចសហប្រតិបត្តិការអាស៊ានបូក៣ ថ្មី ដែលចាប់ផ្តើមនៅឆ្នាំក្រោយ។
លោក Kishida បានបញ្ជាក់ថា ជប៉ុន គាំទ្រយ៉ាងមុតមាំចំពោះទស្សនវិស័យអាស៊ានស្តីពីឥណ្ឌូប៉ាស៊ីហ្វិក (AOIP) ហើយនឹងជំរុញកិច្ចសហប្រតិបត្តិការជាក់លាក់ស្របតាមវិស័យអាទិភាពទាំង ៤ របស់ AOIP ក្នុងក្របខ័ណ្ឌអាស៊ានបូក ៣ ផងដែរ ដែលរួមមាន កិច្ចសហប្រតិបត្តិការដែនសមុទ្រ ការតភ្ជាប់ គោលដៅអភិវឌ្ឍន៍ប្រកបដោយចីរភាព និងសេដ្ឋកិច្ច និងហិរញ្ញវត្ថុ។
សេចក្តីប្រកាសព័ត៌មាន បញ្ជាក់ថា៖ «នាយករដ្ឋមន្ត្រី Kishida បានថ្លែងថា យើងត្រូវតែរួមដៃគ្នាដើម្បីជម្នះឧបសគ្គចំពោះមជ្ឈភាព និងឯកភាពរបស់អាស៊ាន។ ការឈ្លានពានរបស់ រុស្ស៊ី ទៅលើ អ៊ុយក្រែន និងការកាត់យកទឹកដី អ៊ុយក្រែន បញ្ចូលទៅប្រទេស រុស្ស៊ី ដោយខុសច្បាប់ រំលោភលើអធិបតេយ្យភាព និងបូរណភាពទឹកដី អ៊ុយក្រែន និងបំពានច្បាប់អន្តរជាតិ រួមទាំងធម្មនុញ្ញអង្គការសហប្រជាជាតិ»។
លោក Kishida បានបន្តថា ប្រទេស កូរ៉េខាងជើង បានបាញ់សាកល្បងមីស៊ីលផ្លោងដែលមានប្រេកង់ខ្ពស់ខ្លាំងចាប់តាំងពីខែមុន រួមទាំងការបាញ់រំលងលើទឹកដីជប៉ុនផងដែរ។ ការបាញ់មីស៊ីលទាំងនេះ ជាបញ្ហាប្រឈមយ៉ាងពិតប្រាកដ និងធ្ងន់ធ្ងរ ចំពោះសហគមន៍អន្តរជាតិ ហើយមិនអាចអត់ឱនឱ្យបានឡើយ៕