.jpg)
លោកនាយករដ្ឋមន្ត្រី ហ៊ុន សែននឹងមានជំនួបទ្វេភាគីជាមួយ ប្រធានាធិបតីបារាំង លោក Emmanuel Macron នៅថ្ងៃទី១៨ ខែវិច្ឆិកា។ AFP/SPM
ភ្នំពេញៈ លោកនាយករដ្ឋមន្ត្រី ហ៊ុន សែន នឹងចូលរួមកិច្ចប្រជុំកំពូលនៃបណ្តាប្រទេសដែលមានសេដ្ឋកិច្ចជឿនលឿនទាំង២០ (G20) នៅឥណ្ឌូនេស៊ី និងកិច្ចសន្ទនាក្រៅផ្លូវការរបស់មេដឹកនាំនៅក្នុងកិច្ចប្រជុំកំពូលសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) នៅប្រទេសថៃ រយៈពេល ៤ថ្ងៃ ពីថ្ងៃទី១៥-១៨ ខែវិច្ឆិកា។ នេះបើតាមការបញ្ជាក់ពីក្រសួងការបរទេស។
ក្រសួងការបរទេសបញ្ជាក់ក្នុងសេចក្តីប្រកាសព័ត៌មាន នាថ្ងៃទី១២ ខែវិច្ឆិកា ថា លោក ហ៊ុន សែន នឹងចូលរួមក្នុងកិច្ចប្រជុំកំពូល G20 ពីថ្ងៃទី១៥-១៦ ខែវិច្ឆិកា នៅកោះបាលី ក្រោមមូលបទនៃភាពជាប្រធាន G20 របស់ ឥណ្ឌូនេស៊ី «ស្តារឡើងវិញទាំងអស់គ្នា ស្តារឡើងវិញកាន់តែរឹងមាំ»។
លោកនឹងថ្លែងបទអន្តរាគមន៍ក្នុងសម័យប្រជុំទី១ ស្តីពីសន្តិសុខស្បៀង និងថាមពល និងសម័យប្រជុំទី២ ស្តីពីបញ្ហាសុខភាព ដែលនឹងសង្កត់ធ្ងន់លើសារៈសំខាន់នៃពហុភាគីនិយម និងកិច្ចសហការគ្នាឆ្ពោះទៅរកគោលដៅ នៃការស្តារឡើងវិញប្រកបដោយចីរភាពក្រោយជំងឺរាតត្បាត។
ប្រភពដដែលបញ្ជាក់ថា លោក ហ៊ុន សែន នឹងចូលរួមកម្មវិធីអាហារពេលល្ងាចក្រៅផ្លូវការ ដែលរៀបចំដោយប្រធានាធិបតីបារាំង លោក Emmanuel Macron ហើយក៏រំពឹងថា នឹងមានជំនួបទ្វេភាគីជាមួយប្រមុខគណៈប្រតិភូមួយចំនួនផងដែរ។
សេចក្តីប្រកាសព័ត៌មានបញ្ជាក់ថា៖ «ការចូលរួមរបស់កម្ពុជា នៅក្នុងកិច្ចប្រជុំកំពូលនៅឆ្នាំនេះ បង្ហាញពីតួនាទីដ៏សំខាន់របស់ អាស៊ាន ក្នុងនិម្មាបនកម្មតំបន់ និងការប្តេជ្ញាចិត្តរបស់ប្រធានអាស៊ានបច្ចុប្បន្ន ក្នុងការបន្ស៊ី និងបញ្ចូលគ្នារវាងអាទិភាពសំខាន់ៗ របស់អាស៊ានជាមួយនឹងអាទិភាពនានារបស់វេទិកាតំបន់ និងអន្តរជាតិផ្សេងទៀត ឆ្ពោះទៅរកសន្តិភាព និងការអភិវឌ្ឍប្រកបដោយចីរភាព»។
លោក ហ៊ុន សែន ក្នុងឋានៈជាភ្ញៀវរបស់ប្រធានកិច្ចប្រជុំកំពូល APEC នឹងចូលរួមក្នុង «កិច្ចសន្ទនាក្រៅផ្លូវការរបស់ថ្នាក់ដឹកនាំ APEC ជាមួយភ្ញៀវ» នៅថ្ងៃទី១៨ ខែវិច្ឆិកា នៅទីក្រុងបាងកក។
ក្នុងឋានៈជាប្រធានអាស៊ានឆ្នាំ ២០២២ លោកនឹងថ្លែងសុន្ទរកថាក្នុងពិធីបើកកិច្ចសន្ទនាក្រៅផ្លូវការនេះ ដោយផ្តោតលើការរីកចម្រើនប្រកបដោយចីរភាព។ លោកក៏នឹងថ្លែងសុន្ទរកថានៅក្នុងសម័យប្រជុំទី២ ស្តីពី «ការលើកកម្ពស់ពាណិជ្ជកម្ម និងការវិនិយោគប្រកបដោយចីរភាពរវាង APEC និងដៃគូពាណិជ្ជកម្ម»។
សេចក្តីប្រកាសព័ត៌មានបញ្ជាក់ថា បទអន្តរាគមន៍របស់លោក ហ៊ុន សែន នឹងរួមចំណែកដល់កិច្ចពិភាក្សាស្តីពីការរីកចម្រើនប្រកបដោយចីរភាព និងការបង្កើនកិច្ចសហប្រតិបត្តិការរវាង APEC និងដៃគូខាងក្រៅរបស់ខ្លួន ស្របតាមមូលបទ APEC ឆ្នាំ២០២២ «ការបើកចំហ ការតភ្ជាប់ និងតុល្យភាព»។
លោក ហ៊ុន សែន រួមជាមួយថ្នាក់ដឹកនាំ APEC ផ្សេងទៀត នឹងចូលគាល់ព្រះបាទ មហា វ៉ាជីរ៉ាឡុងកន ព្រះវ៉ាជីរ៉ាក់ក្លៅចៅយូហួរ ព្រះមហាក្សត្រថៃ និងសម្ដេចព្រះមហាក្សត្រី ស៊ុធីតា ផាត់ឆៈរៈស៊ុថាភិម៉ុនឡាក់សៈណៈ នៅក្នុងព្រះបរមរាជវាំង។
លោកក៏នឹងមានជំនួបទ្វេភាគីជាមួយ លោក Macron នៅថ្ងៃទី១៨ ខែវិច្ឆិកា ផងដែរ៕
