ភ្នំពេញៈ លោកនាយករដ្ឋមន្ត្រី ហ៊ុន សែន ស្នើដល់ អូស្ត្រាលី ឱ្យបន្តផ្តល់ជំនួយលើការបោសសម្អាតមីន ដើម្បីជួយកម្ពុជាសម្រេចបាននូវគោលដៅ «កម្ពុជាគ្មានមីន ត្រឹមឆ្នាំ ២០២៥»។
នាថ្ងៃទី១២ ខែវិច្ឆិកា លោក ហ៊ុន សែន បានជួបទ្វេភាគីជាមួយលោក Anthony Albanese នាឱកាសនៃកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធនៅទីក្រុងភ្នំពេញ។
សេចក្តីប្រកាសព័ត៌មានក្រសួងការបរទេសកម្ពុជា បញ្ជាក់ក្រោយជំនួបថា មេដឹកនាំទាំង ២ បានវាយតម្លៃខ្ពស់ចំពោះភាពរីកចម្រើននៃទំនាក់ទំនង កិច្ចសហប្រតិបត្តិការលើគ្រប់វិស័យរវាងប្រទេសទាំង ២ និងកិច្ចសហប្រតិបត្តិការដ៏ល្អក្នុងវិស័យ ពាណិជ្ជកម្ម ការវិនិយោគ និងការរុករករ៉ែមាស។
មេដឹកនាំទាំង ២ បានពិភាក្សាអំពីកិច្ចខិតខំប្រឹងប្រែងក្នុងការពង្រឹង និងពង្រីកកិច្ចសហប្រតិបត្តិការទ្វេភាគីឱ្យកាន់តែស៊ីជម្រៅ ខណៈលោក ហ៊ុន សែន បានសរសើរអូស្ត្រាលីដែលបានផ្តល់វ៉ាក់សាំងបង្ការជំងឺកូវីដ១៩ ចំនួនប្រមាណជិត ៣លានដូស និងឧបករណ៍វេជ្ជសាស្ត្រផ្សេងៗទៀតដល់កម្ពុជាយ៉ាងទាន់ពេលវេលា។
លោក ហ៊ុន សែន បានវាយតម្លៃខ្ពស់ចំពោះ អូស្ត្រាលី ក្នុងការរួមចំណែកដល់ការកសាងសន្តិភាព និងការបន្តផ្តល់ជំនួយដល់ការអភិវឌ្ឍសេដ្ឋកិច្ច-សង្គម នៅកម្ពុជា តាមរយៈការផ្ដល់ជំនួយអភិវឌ្ឍន៍ផ្លូវការលើវិស័យផ្សេងៗ រួមមាន អប់រំ កសិកម្ម ហេដ្ឋារចនាសម្ព័ន្ធ ការបោសសម្អាតមីន និងសុខាភិបាល។
សេចក្តីប្រកាសព័ត៌មានបញ្ជាក់ថា៖ «សម្តេចតេជោបានស្នើដល់អូស្ត្រាលី ឱ្យបន្តផ្តល់ជំនួយលើការបោសសម្អាតមីន ដើម្បីជួយកម្ពុជាសម្រេចបាននូវគោលដៅ កម្ពុជាគ្មានមីន ត្រឹមឆ្នាំ ២០២៥»។
មេដឹកនាំទាំង ២ បានស្វាគមន៍ចំពោះវឌ្ឍនភាពនៃភាពជាដៃគូយុទ្ធសាស្ត្រគ្រប់ជ្រុងជ្រាយរវាង អាស៊ាន-អូស្ត្រាលី ខណៈលោក ហ៊ុន សែន បានថ្លែងអំណរគុណដល់ អូស្រ្ដាលី ដែលបានគាំទ្រភាពជាប្រធានអាស៊ាន នៅឆ្នាំ ២០២២ របស់កម្ពុជា។
នាថ្ងៃទី១២ ខែវិច្ឆិកា នេះដែរ លោក ហ៊ុន សែន បានដឹកនាំកិច្ចកំពូលអាស៊ាន អូស្ត្រាលី លើកទី២ ជាមួយលោក Anthony Albanese ដែលជាសហប្រធាននៃកិច្ចប្រជុំ ដោយលោក ហ៊ុន សែន បានបង្ហាញនូវសុទិដ្ឋិនិយម ថា ភាពជាដៃគូ និងកិច្ចសហប្រតិបត្តិការ «ដ៏រឹងមាំ» រវាង អាស៊ាន-អូស្ត្រាលី នឹងបន្តផ្តល់ផលប្រយោជន៍ជាច្រើនទៀតដល់ប្រជាជនទាំង ២។
លោកក៏បានវាយតម្លៃខ្ពស់ ដែលប្រទេស អូស្ត្រាលី តែងតែបង្ហាញការគាំទ្រឥតងាករេ មកលើមជ្ឈភាពអាស៊ាន តាមរយៈការចូលរួមយ៉ាងសកម្ម និងយន្តការនានាដែលដឹកនាំដោយអាស៊ាន។
លោក ហ៊ុន សែន បានកោតសរសើរនូវល្បឿន និងសមិទ្ធផលដែលភាគីទាំង ២ អាស៊ាន-អូស្ត្រាលី សម្រេចបានរួមគ្នា ក្នុងរយៈពេលដ៏ខ្លី តាមរយៈគំនិតផ្តួចផ្តើមយ៉ាងច្រើន ជាពិសេស គំនិតផ្តួចផ្តើម អូស្ត្រាលី ដើម្បីអនាគតអាស៊ាន ដែលនឹងផ្តល់ការគាំទ្រអន្តរវិស័យ ដល់ការអនុវត្តទស្សនវិស័យអាស៊ាន ស្តីពី ឥណ្ឌូប៉ាស៊ីហ្វិក ដែលតម្រូវការជាក់ស្តែងរបស់ប្រទេសអាស៊ាន។
លោកបានស្វាគមន៍ចំពោះការប្តេជ្ញាចិត្តរបស់ អូស្តា្រលី ក្នុងការគាំទ្រដល់ការធ្វើសមាហរណកម្មតំបន់ ការជំរុញអនុវត្តកិច្ចព្រមព្រៀងពាណិជ្ជកម្មសេរី អាស៊ាន-អូស្ត្រាលី-នូវែលសេឡង់ និងកាត់បន្ថយគម្លាតអភិវឌ្ឍ តាមរយៈការដាក់ចេញនូវកម្មវិធី អូស្ត្រាលីសម្រាប់អាស៊ាន ស្តីពីសេដ្ឋកិច្ច និងការតភ្ជាប់ និងកម្មវិធីគាំទ្រការអនុវត្តកិច្ចព្រមព្រៀងពាណិជ្ជកម្មសេរី អាស៊ាន-អូស្ត្រាលី-នូវែលសេឡង់ ជាដើម។
លោកនាយករដ្ឋមន្ត្រី ហ៊ុន សែន ថ្លែងថា៖ «សមិទ្ធផលដ៏ត្រចេះត្រចង់នេះ បញ្ជាក់ពីការប្តេជ្ញាចិត្ត និងកិច្ចខិតខំប្រឹងប្រែងរួម ក្នុងការពង្រឹងទំនាក់ទំនងកិច្ចសន្ទនា ឱ្យកាន់តែស៊ីជម្រៅ»៕