ភ្នំពេញៈ លោក លី ធុជ ទេសរដ្ឋមន្រ្តី និងជាអនុប្រធានទី១ អាជ្ញាធរមីនបញ្ជាក់ថា គណៈកម្មការសេដ្ឋកិច្ច និងសង្គមកិច្ចសម្រាប់អាស៊ី និងប៉ាស៊ីហ្វិក នៃអង្គការសហប្រជាជាតិ (UN ESCAP) នឹងជួយគាំទ្រអាជ្ញាធរមីនក្នុងការរៀបចំគោលនយោបាយជាតិសកម្មភាពមីន និងរៀបចំវេទិកាជាតិអន្តរជាតិសំខាន់ៗ ពាក់ព័ន្ធនឹងសកម្មភាពមីននាពេលខាងមុខនេះ។
នាថ្ងៃទី១២ ខែវិច្ឆិកា លោក លី ធុជ បានជួបជាមួយលោកស្រី Armida Salsiah Alisjahbana អគ្គលេខាធិការរងអង្គការសហប្រជាជាតិ និងជាប្រធាន UN ESCAP ដើម្បីពង្រឹងទំនាក់ទំនងកិច្ចសហប្រតិបត្តិការ និងភាពជាដៃគូរវាងរាជរដ្ឋាភិបាលកម្ពុជា និង UN ESCAP នៅសណ្ឋាគារសុខា។
បើតាមសេចក្តីប្រកាសព័ត៌មានអាជ្ញាធរមីន លោក លី ធុជ ថ្លែងថា៖ «UN ESCAP នឹងជួយគាំទ្រ និងសហការជាមួយអាជ្ញាធរមីន ក្នុងការរៀបចំគោលនយោបាយជាតិសកម្មភាពមីន និងរៀបចំវេទិកាជាតិអន្តរជាតិសំខាន់ៗ ពាក់ព័ន្ធនឹងសកម្មភាពមីននាពេលខាងមុខនេះ»។
លោកបញ្ជាក់ថា កិច្ចសហប្រតិបត្តិការសកម្មភាពមីន នឹងត្រូវបានលើកឡើង និងដាក់បញ្ចូលក្នុងរបៀបវារៈនៃអង្គសន្និបាតនៅឆ្នាំក្រោយ របស់ UN ESCAP ដែលនឹងប្រព្រឹត្តទៅនៅទីក្រុងបាងកក ប្រទេសថៃ។
លោក លី ធុជ បានវាយតម្លៃខ្ពស់ចំពោះកិច្ចសហប្រតិបត្តិការ និងភាពជាដៃគូដ៏ល្អ រវាងរាជរដ្ឋាភិបាលកម្ពុជា និង UNESCAP និងបានថ្លែងអំណរគុណ UNESCAP ចំពោះការគាំទ្រលើការងារបច្ចេកទេស ដល់សកម្មភាពមីននៅកម្ពុជា៕