.jpg)
កិច្ចប្រជុំនេះ ដឹកនាំដោយសហប្រធាន ២ រូបគឺ លោក ហ៊ុន សែន នាយករដ្ឋមន្ត្រីកម្ពុជា និងជាប្រធានអាស៊ាន និងលោក គីស៊ីដា ហ្វូមីអូ នាយករដ្ឋមន្ត្រីនៃប្រទេសជប៉ុន។ SPM
ភ្នំពេញៈ អាស៊ាន-ជប៉ុន ប្រកាសស្វាគមន៍ផែនការភាពជាដៃគូសេដ្ឋកិច្ច អាស៊ាន-ជប៉ុន ប្រកបដោយភាពច្នៃប្រឌិត និងនិរន្តរភាពក្នុងឆ្នាំ២០២៣ ដើម្បីជំរុញកិច្ចសហប្រតិបត្តិការសេដ្ឋកិច្ចឆ្ពោះទៅរកការស្តារឡើងវិញនូវខ្សែសង្វាក់ផ្គត់ផ្គង់ ប្រកបដោយភាពធន់ រឹងមាំ ចីរភាព និងនវានុវត្តន៍។
ការប្រកាសស្វាគមន៍នេះធ្វើឡើងក្នុងកិច្ចប្រជុំកំពូល អាស៊ាន-ជប៉ុន នាថ្ងៃទី១២ ខែវិច្ឆិកា នៅទីក្រុងភ្នំពេញ។
លោក គង់ ភោគ រដ្ឋលេខាធិការក្រសួងការបរទេស និងជាអ្នកនាំពាក្យកិច្ចប្រជុំកំពូលអាស៊ាន ថ្លែងថា កិច្ចប្រជុំកំពូល អាស៊ាន-ជប៉ុន បានវាយតម្លៃខ្ពស់ចំពោះកិច្ចសហប្រតិបត្តិការ អាស៊ាន-ជប៉ុន ដែលបាននាំមកនូវភាពជោគជ័យយ៉ាងធំធេង និងត្រចះត្រចង់លើគ្រប់វិស័យ ដែលបានរួមចំណែកយ៉ាងសំខាន់ក្នុងការលើកកម្ពស់គុណភាពជីវភាពរបស់ប្រជាពលរដ្ឋនៅក្នុងប្រទេស អាស៊ាន និងជប៉ុន។
លោកថ្លែងក្នុងសន្និសីទកាសែត នាថ្ងៃទី ១២ ខែវិច្ឆិកា ថា កិច្ចប្រជុំនេះក៏បានវាយតម្លៃខ្ពស់ចំពោះវឌ្ឍនភាពជាក់ស្ដែង នៃការអនុវត្តការកែសម្រួលការអនុវត្តសេចក្តីប្រកាសចក្ខុវិស័យស្តីពីមិត្តភាព និងកិច្ចសហប្រតិបត្តិការ អាស៊ាន-ជប៉ុន ចក្ខុវិស័យមួយ អត្តសញ្ញាណមួយ និងអនាគតមួយ។
លោក គង់ ភោគ ថ្លែងថា ថ្នាក់ដឹកនាំអាស៊ានបានកោតសរសើររដ្ឋាភិបាលជប៉ុនចំពោះជំនួយលើវិស័យសុខាភិបាលអាស៊ាន ជាពិសេស ការផ្តល់វ៉ាក់សាំងការពារជំងឺកូវីដ១៩ និងបរិក្ខារវេជ្ជសាស្ត្រនានា ដែលតាមរយៈនេះបានចូលរួមចំណែកទប់ស្កាត់ និង កាត់បន្ថយផលប៉ះពាល់នៃជំងឺឆ្លងនៅក្នុងតំបន់។
លោកបន្តថា កិច្ចប្រជុំក៏បានស្វាគមន៍ចំពោះការបើកទំព័រប្រវត្តិសាស្ត្រមាសថ្មីនៅឆ្នាំ ២០២៣ ហើយក៏នឹងរៀបចំកិច្ចប្រជុំរំឭកខួប ៥ ០ឆ្នាំនៃមិត្តភាព និង កិច្ចសហប្រតិបត្តិការ អាស៊ាន-ជប៉ុន នៅទីក្រុងតូក្យូ។
អ្នកនាំពាក្យរូបនេះបញ្ជាក់ថា៖ «ថ្នាក់ដឹកនាំ អាស៊ាន-ជប៉ុន ក៏បានស្វាគមន៍ផែនការការងារឆ្ពោះទៅការបង្កើតការរចនានាពេលអនាគត និងផែនការសកម្មភាពនៃភាពជាដៃគូសេដ្ឋកិច្ចអាស៊ានជប៉ុនប្រកបដោយភាពច្នៃប្រឌិត និងនិរន្តរភាពក្នុងឆ្នាំ ២០២៣ ព្រមទាំងសំណើស្តីពីគំនិតផ្តួចផ្តើមដឹកនាំដោយវិស័យឯកជនដើម្បីបង្កើតចក្ខុវិស័យ សហបង្កើតសេដ្ឋកិច្ច អាស៊ាន-ជប៉ុន ដែលសំដៅជំរុញកិច្ចសហប្រតិបត្តិការសេដ្ឋកិច្ចឆ្ពោះទៅរកការស្តារឡើងវិញនូវខ្សែសង្វាក់ផ្គត់ផ្គង់ប្រកបដោយភាពធន់ រឹងមាំ ចីរភាព និងនវានុវត្តន៍»៕
