សៀមរាបៈ អង្គការអាគ្រីស៊ុតនឹងរៀបចំកម្មវិធីប្រកួតស្នាដៃចម្អិនម្ហូបអង្គរជាលើកទី១ ក្រោមប្រធានបទ ទឹកដី និងការច្នៃប្រឌិត នៅថ្ងៃទី ១៧ ខែវិច្ឆិកា នៅខេត្តសៀមរាបខាងមុខ ដែលតម្រូវឱ្យអ្នកចូលរួមប្រកួតប្រើប្រាស់កសិផលដែលដាំ និងផលិតដោយកសិករខ្មែរ ដើម្បីលើកកម្ពស់ផលិតផលកសិកម្មខ្មែរ។
កម្មវិធីការបញ្ចេញស្នាដៃចម្អិនម្ហូបអង្គរ គឺជាការប្រកួតម្ហូបដោយប្រើប្រាស់កសិផលដែលដាំ និងផលិតដោយកសិករតំបន់ជាយក្រុងសៀមរាប ដែលសម្របសម្រួលបច្ចេកទេសលើការដាំដុះដោយអង្គការអាគ្រីស៊ុត ខណៈកម្មវិធីនេះ ក៏នឹងរៀបចំដំណើរទស្សនកិច្ចទៅដល់ចម្ការកសិករក្នុងតំបន់កសិកម្មដោយផ្តោតលើការអនុវត្តកសិកម្មដែលគិតគូរពីបរិស្ថានទៀតផង។
តាមសេចក្តីប្រកាសរបស់អង្គការនេះបានឱ្យដឹងថា ព្រឹត្តការណ៍នេះនឹងប្រព្រឹត្តទៅថ្ងៃទី ១៧ វិច្ឆិកា ក្រោមប្រធានបទ ទឹកដីនិងការច្នៃប្រឌិត ហើយបេក្ខជនទាំងអស់ តម្រូវឱ្យរៀបចំចម្អិនមុខម្ហូបប្រចាំខេត្ត ១ មុខ គឺទឹកគ្រឿងសៀមរាប ដែលតម្រូវឱ្យប្រើបន្លែ ២ ផ្នែក គឺបន្លែក្នុងស្រុក និងបន្លែនាំចូលមកដាំថ្មី ក្នុងប្រទេសកម្ពុជា។
សេចក្តីប្រកាសដដែលបានបញ្ជាក់ថា៖ «បេក្ខជនដែលត្រូវចូលរួមប្រកួត នឹងត្រូវអញ្ញើញតាមរយៈសមាគមចុងភៅកម្ពុជា ពីតាមបណ្តាភោជនីយដ្ឋានក្នុងខេត្តសៀមរាប។បេក្ខជនចំនួន ៣ ស្ថាប័ននិងត្រូវជា ៦ រូប នឹងចូលរួមមកពីភោជនីយដ្ឋានអង្គាដី ភោជនីយដ្ឋានមេអំបៅ និងភោជនីយដ្ឋានក្នុងភូមិព្រះដាក់»។
លោក ជិញ ភារៈ អនុប្រធានអង្គការអាគ្រីស៊ុតកម្ពុជា បានប្រាប់ ភ្នំពេញ ប៉ុស្តិ៍ នៅថ្ងៃទី ១៣ វិច្ឆិកា ថា ការរៀបចំកម្មវិធីនេះ ឡើងគឺមានគោលបំណងលើកកម្ពស់ដល់ផលិតផលកសិកម្មខ្មែរនិងដើម្បីណែនាំឱ្យអនាគតមេចុងភៅទាំងអស់បានស្គាល់ និងចូលរួមក្នុងការប្រើផលិតផលក្នុងស្រុកមកចម្អិនអាហារ។
លោកបានបន្ថែមថា អង្គការអាគ្រីស៊ុត ក៏ចង់បង្ហាញពីថ្វីដៃរបស់ចុងភៅនៅខេត្តសៀមរាប ក៏ដូចជាផ្សព្វផ្សាយ និងធ្វើនវានុវត្តន៍នៃប្រព័ន្ធម្ហូបអាហារក្នុងខេត្តសៀមរាប ដោយលើកបង្ហាញពីមុខម្ហូបប្រចាំខេត្តសៀមរាប ដែលមានឈ្មោះថា ទឹកគ្រឿងសៀមរាប ផងដែរ។
លោកបានបញ្ជាក់ថា៖ «យើងធ្វើកម្មវិធីប្រកួតអ៊ីចឹងដើម្បីចង់បង្ហាញថា នៅក្នុងខេត្តសៀមរាប មានបន្លែដាំដុះនៅក្នុងស្រុកដែរ។យើងចង់លើកកម្ពស់ឱ្យមានការប្រើប្រាស់ផលិតផលក្នុងស្រុកដោយបង្ហោះពីកន្លែងគោលដៅដែលមានការដាំបន្លែសុវត្ថិភាព។ កន្លងទៅយើងតែងធ្វើការតាំងពិព័រណ៍នូវបន្លែសុវត្ថិភាពដែលដាំដុះពីកសិករយើង»។
បើតាមលោក ជិញ ភារៈ បន្លែក្នុងស្រុក និងបន្លែនាំចូលថ្មី ដែលតម្រូវឱ្យចុងភៅធ្វើម្ហូបក្នុងការប្រកួត គឺសុទ្ធតែជាបន្លែដែលដាំដោយកសិករខ្មែរប្រកបដោយសុវត្ថិភាព ដែលមានដូចជា ផ្កាអង្គាដី ផ្កាស្នោ ផ្កាកំប្លោក ត្រប់ស្រួយ ល្ហុងខ្ចី ប្រពាយ ស្អំ ផ្ទី សណ្តែកកួរ ត្រសក់ ននោង ព្រលឹត និងអូក្រា ជាដើម។ លោកអះអាងថា ផលិតផលបន្លែសុវត្ថិភាពទាំងនេះគឺបានធ្វើការដាំដុះទៅតាមរដូវនិងមិនមានប្រើប្រាស់ថ្នាំគីមីនោះទេ ហើយការបរិភោគ គឺប្រកបដោយសុវត្ថិភាព និងមានរសជាតិឆ្ងាញ់។
លោកបានបញ្ជាក់ថា៖ «បន្លែសុវត្ថិភាពទាំងនេះ យើងមិនទាន់ផ្គត់ផ្គង់ទៅលើទីផ្សារបានគ្រប់គ្រាន់ទេ ព្រោះយើងស្ថិតនៅក្នុងការធ្វើជាលក្ខណៈគ្រួសារតូចៗនិងតាមរដូវកាល។ ប៉ុន្តែចំពោះតម្រូវការទីផ្សារនូវបន្លែសុវត្ថិភាពនេះ គឺមានតម្រូវការខ្ពស់ ជាពិសេសគឺក្នុងរដូវរីករាលដាលជំងឺកូវីដ ១៩ នេះតែម្តង»។
តាមរបៀបវារៈនៃកម្មវិធីដែលបានប្រកាសដោយអង្គការអាគ្រីស៊ុត បានអះអាងថា ម្ចាស់ជយលាភីក្នុងការប្រកួតនេះ នឹងទទួលបានពាន មេដាយ ព្រមទាំងវិញ្ញាបនបត្រផងដែរ បន្ទាប់ពីមានការវាយតម្លៃពីសមាជិកគណៈវិនិច្ឆ័យដែលមានសមាសភាពដូចជា លោក ប្រាក់ សោភ័ណ អភិបាលរងខេត្តសៀមរាប លោក ឡុង ប៊ុនហោ ប្រធានសមាគមចុងភៅកម្ពុជា និងសមាសភាពមកពីអង្គការអាគ្រីស៊ុតចំនួន ៤ រូប៕