ភ្នំពេញៈ ក្រសួងសុខាភិបាលបានប្រកាសរកឃើញអ្នកឆ្លងមេរោគកូវីដ ១៩ ថ្មីចំនួន ៣ នាក់ នៅថ្ងៃទី ១៣ វិច្ឆិកា ដែលជាប្រភេទអូមីក្រុងទាំងអស់ ប៉ុន្តែមិនមានករណីស្លាប់ និងជាសះស្បើយថ្មីនោះទេ។
យោងតាមសេចក្តីប្រកាសរបស់ក្រសួងសុខាភិបាល សម្រាប់ថ្ងៃទី ១៣ ខែវិច្ឆិកា ឆ្នាំ ២០២២ កម្ពុជាបានរកឃើញអ្នកឆ្លងថ្មីចំនួន ៣ នាក់ ដែលជាប្រភេទអូមីក្រុង បន្ទាប់ពីការពិនិត្យ PCR បានចេញលទ្ធផល។
ក្រសួងក៏បានបញ្ជាក់ដែរថា នៅថ្ងៃទី ១៣ វិច្ឆិកា មិនមានករណីជាសះស្បើយ និងករណីស្លាប់នោះទេ ដែលធ្វើឱ្យចំនួននៃការស្លាប់សរុប គិតត្រឹមថ្ងៃទី ១៤ វិច្ឆិកា គឺនៅដដែលចំនួន ៣ ០៥៦ នាក់។ រីឯករណីឆ្លងសរុបចំនួន ១៣៧ ៩៩៩ នាក់ និងករណីជាសះស្បើយសរុបចំនួន ១៣៤ ៩៤០ នាក់៕