.jpg)
ថ្នាក់ដឹកនាំអាស៊ាននិងដៃគូ នៅក្នុងកិច្ចប្រជុំកំពូល កាលពីថ្ងៃទី ១៣ វិច្ឆិកា ឆ្នាំ ២០២២។ រូបថត ហុង មិនា
ភ្នំពេញៈ លោកនាយករដ្ឋមន្ត្រី ហ៊ុន សែន អះអាងថា សន្តិភាព និងការគ្មានជំងឺរាតត្បាតកូវីដ ១៩ បានធ្វើឱ្យមេដឹកនាំនៃប្រទេសដទៃមានទំនុកចិត្តក្នុងការចូលរួមកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធដែលកម្ពុជាធ្វើជាម្ចាស់ផ្ទះរយៈពេល ៤ ថ្ងៃ។
ការថ្លែងអះអាងបែបនេះ បានធ្វើឡើងក្នុងពេលលោកធ្វើសន្និសីទសារព័ត៌មាន ដើម្បីបង្ហាញពីលទ្ធផលជុំវិញកិច្ចប្រជុំកំពូលអាស៊ានលើកទី៤០ និងទី៤១ និងកិច្ចប្រជុំកំពូលពាក់ព័ន្ធដោយមានការចូលរួមពីបណ្ដាញអ្នកសារព័ត៌មានជាតិ និងអន្តរជាតិប្រមាណជាង ៥០ ស្ថាប័ន កាលពីរសៀលថ្ងៃទី ១៣ ខែវិច្ឆិកា នៅវិមានសន្តិភាព។
លោកនាយករដ្ឋមន្ត្រីបានថ្លែងថា៖ «ជាក់ស្តែងវានៅកន្លែងណាទើបគេមក (ចូលរួមកិច្ចប្រជុំអាស៊ាន)។ ទី១ ត្រូវធានាសន្តិភាពឱ្យបាន ដោយមិនត្រូវឱ្យមានអំពើភេរវកម្ម សង្គ្រាមនោះទេ។ សុខសន្តិភាព គឺជាកត្តាចម្បងក្នុងការធានាឱ្យបានច្បាស់លាស់សម្រាប់មេដឹកនាំ»។
លោកបានបន្តថា សន្តិភាព គ្មានសង្គ្រាម ហើយសន្តិភាពដែលគ្មានភេរវកម្ម និងការបាញ់ប្រហារ គឺជាកត្តាសំខាន់ណាស់សម្រាប់ប្រមុខរដ្ឋ ប្រមុខរដ្ឋាភិបាលនៃប្រទេសនានាដែលមកដល់កម្ពុជា ខណៈការទទួលខុសត្រូវខ្ពស់របស់កម្ពុជា ដោយផ្តល់កិច្ចសហប្រតិបត្តិការពេញលេញជាមួយនឹងកងអង្គរក្សជាមួយបណ្តាប្រទេសទាំងអស់ ដែលមានវត្តមាននៅក្នុងប្រទេស។
លោកបានបញ្ជាក់ទៀតថា៖ «ចំណុចទី២ គឺយើងគ្រប់គ្រងបានកូវីដ ១៩។ ការគ្រប់គ្រងបានកូវីដ ធ្វើឱ្យគេមិនភ័យខ្លាច ជាមួយនឹងការមកដល់ ហើយឆ្លងជំងឺកូវីដពីកម្ពុជា។ ចំណុចនេះ ក៏ជាមូលហេតុដែលធ្វើឱ្យប្រទេសនានាហ៊ានមកកាន់កម្ពុជា។ បើសិនជាកម្ពុជា ពោរពេញដោយហិង្សាឬក៏អ្វីដែលកើតមានភាពជ្រួលច្របល់ ហើយថែមពីលើនោះកូវីដញាំញី ក៏ជាមូលហេតុដែលធ្វើឱ្យមានការភ័យខ្លាច មិនមានការជួបជុំនៅទីក្រុងភ្នំពេញដែរ»។
ក្រៅពីអះអាងយ៉ាងដូច្នេះ ក្នុងនាមជាម្ចាស់ផ្ទះលោកនាយករដ្ឋមន្ត្រី ហ៊ុន សែន ក៏បានថ្លែងអរគុណដល់មេដឹកនាំអាស៊ានទាំងអស់ និងប្រទេសជាដៃគូ អង្គការអន្តរជាតិនានា ដែលបានអញ្ជើញធ្វើដំណើរមកកាន់ប្រទេសកម្ពុជា ខណៈកិច្ចប្រជុំបញ្ចប់ទៅដោយជោគជ័យ។
កម្ពុជាបានធ្វើជាម្ចាស់ផ្ទះកិច្ចប្រជុំអាស៊ានលើកទី៤០ និង៤១ និងកិច្ចប្រជុំកំពូលពាក់ព័ន្ធរយៈពេល ៤ ថ្ងៃ ចាប់ពីថ្ងៃទី ១០ ដល់ថ្ងៃទី ១៣ វិច្ឆិកា ដោយមានថ្នាក់ដឹកនាំជាង ៣០ ប្រទេស និងស្ថាប័នចូលរួម ក្នុងនោះក៏មានប្រធានាធិបតីអាមេរិក លោក ចូ បៃដិន និងនាយករដ្ឋមន្ត្រីចិនលោក លី កេឈាង ផងដែរ។
លោក ប៉ា ច័ន្ទរឿន ប្រធានវិទ្យាស្ថានប្រជាធិបតេយ្យកម្ពុជាបានថ្លែងថា ការចូលរួមរបស់ថ្នាក់ដឹកនាំទាំងអស់ក្នុងពេលនេះ គឺជាការផ្តល់ការជឿទុកចិត្តមកកាន់កម្ពុជា ទាំងសមត្ថភាព និងលទ្ធភាព ក្នុងការធ្វើជាម្ចាស់ផ្ទះ ជាពិសេសគឺការការពារសន្តិសុខ សុវត្ថិភាពរបស់កម្ពុជា ដែលអាចធ្វើបាន។
លោក ឡៅ ម៉ុងហៃ អ្នកវិភាគនយោបាយបានលើកឡើងពីថ្ងៃទី ១៣ វិច្ឆិកាថា នៅ ១០ ឬ ១១ ឆ្នាំទៀត នោះកម្ពុជានឹងដល់វេនធ្វើជាប្រធានអាស៊ានជាថ្មីទៀត ហើយដល់ពេលនោះកម្ពុជា នឹងអាចយកចំណេញ និងរកប្រយោជន៍ឱ្យខ្មែរ និងតំបន់បានកាន់តែច្រើន។ ជាមួយគ្នានោះ លោករំពឹងថា ក្នុងពេលនោះ មេដឹកនាំកម្ពុជា ក៏នឹងបានទៅជាមេដឹកនាំតំបន់ ១ រូបនឹងគេ បើសិនជាអនុវត្តបានគោលការណ៍សំខាន់មួយចំនួន។
លោកថា៖ «មេដឹកនាំកម្ពុជាមានវប្បធម៌ខ្ពស់ មានឈ្មោះល្អលើឆាកអន្តរជាតិ គោរពអនុវត្តកិច្ចព្រមព្រៀងសន្តិភាព និងរដ្ឋធម្មនុញ្ញ ប្រកាន់គោលនយោបាយអព្យាក្រឹតឱ្យច្បាស់។ កម្ពុជាមានមន្ត្រីទូតចំណានៗក្នុងកិច្ចការទូត។មានគុណសម្បត្តិជាសុភាពបុរស ស្គាល់វប្បធម៌ និងគោលនយោបាយថ្នាក់ដឹកនាំប្រទេសអាស៊ាន និងប្រទេសដៃគូ និងចេះភាសាប្រទេសទាំងនោះ»។
បន្ថែមពីនេះ ក្នុងពេលនោះ លោក ឡៅ ម៉ុងហៃ ក៏សម្លឹងឃើញដែរថា កម្ពុជានឹងអាចលើកកម្ពស់និងផ្សព្វផ្សាយវប្បធម៌របស់ខ្លួនឱ្យបានខ្ទរខ្ទារក្នុងពិភពលោកផងដែរ បើកម្ពុជារៀបចំកិច្ចប្រជុំកំពូលអាស៊ានឱ្យចំថ្ងៃបុណ្យអុំទូក អកអំបុក ហើយរៀបចំការប្រណាំងទូកង ដោយមានទូកង មកពីគ្រប់ប្រទេសអាស៊ាន និងប្រទេសដៃគូចូលរួមជូនមេដឹកនាំប្រទេសទាំងនោះទស្សនាកម្សាន្តជាមួយព្រះមហាក្សត្រខ្មែរ៕
