ភ្នំពេញៈ ក្រសួងសាធារណការ និងដឹកជញ្ចូន ដាក់ឱ្យប្រើប្រាស់កម្មវិធីបញ្ចូលសមតុល្យ ក្នុងស្លាកលេខយានយន្ត តាមរយៈ Mobile Banking ចំនួន ៥ ចាប់ពីថ្ងៃទី ១៤ វិច្ឆិកា ២០២២ តទៅ ដើម្បីអាចធ្វើការចូល-ចេញ និងទូទាត់សាច់ប្រាក់ ឬបញ្ចូលសមតុល្យទឹកប្រាក់ តាមរយៈកាមេរ៉ាចាប់ស្លាកលេខស្វ័យប្រវត្តិ មុនពេលចូលប្រើប្រាស់ផ្លូវល្បឿនលឿន។
បើតាមក្រសួងសាធារណការ អ្នកបើកបរត្រូវធ្វើដំណើរតាមច្រក ANPR នៅខាងស្តាំដៃបង្អស់នៃច្រកចូល-ចេញភ្នំពេញ និងព្រះសីហនុ ដោយប្រើប្រាស់កម្មវិធីថ្មីនេះ ដើម្បីបង្កនូវភាពងាយស្រួលក្នុងការធ្វើដំណើរ កាត់បន្ថយភាពស្មុគស្មាញ ដែលចំណាយរយៈពេលរង់ចាំយូរ និងកាត់បន្ថយការកកស្ទះចរាចរណ៍។
ក្រសួងបញ្ជាក់ថា៖ «សូមបងប្អូនប្រជាពលរដ្ឋដែលគ្រោងនឹងធ្វើដំណើរលើផ្លូវល្បឿនលឿនភ្នំពេញ-ក្រុងព្រះសីហនុ អាចធ្វើការចូល-ចេញ និងការទូទាត់សាច់ប្រាក់ ឬបញ្ចូលសមតុល្យទឹកប្រាក់ តាមរយៈកាមេរ៉ាចាប់ស្លាកលេខស្វ័យប្រវត្តិ ANPR និងទូទាត់ប្រាក់តាមរយៈប្រព័ន្ធធនាគារដៃគូរបស់ក្រសួងសាធារណការ និងដឹកជញ្ជូន»។
ការដាក់ដំណើរការសាកល្បងនេះ ធ្វើឡើងនៅតាមច្រកខាងស្តាំដៃបំផុតនៃស្ថានីយភ្នំពេញ និងស្ថានីយក្រុងព្រះសីហនុតែប៉ុណ្ណោះ ហើយដើម្បីការអនុវត្តច្បាប់ស្តីពីចរាចរណ៍ផ្លូវគោក ប្រកបដោយអនុលោមភាព ព្រមទាំងធានាសុវត្ថិភាពចរាចរណ៍ និងសណ្តាប់ធ្នាប់សាធារណៈ។ ក្រសួងប្រកាសថា រាល់យានយន្ត ដែលចូលទៅប្រើប្រាស់ផ្លូវល្បឿនលឿន តម្រូវឱ្យបំពេញនូវលក្ខខណ្ឌ ដូចជាត្រូវមានការចុះបញ្ជី និងបំពាក់ស្លាកលេខសម្គាល់ត្រឹមត្រូវ។ ត្រូវមានលតាបត្រត្រួតពិនិត្យលក្ខណៈបច្ចេកទេសយានជំនិះ(ឆៀក)មានសុពលភាព ត្រូវមានលតាបត្រទោចក្រយានយន្ត ដែលមានទំហំស៊ីឡាំចាប់ពី 500cc ឬប្រើប្រាស់ថាមពលអគ្គិសនី ចាប់ពី 27kW ឡើងទៅ។
លោក ហ៊ាង សុធាយុត្តិ អ្នកនាំពាក្យក្រសួងសាធារណការ និងដឹងជញ្ជូន បាននិយាយថា មុនចូលប្រើប្រាស់ផ្លូវល្បឿនលឿន លោកអ្នកអាចបញ្ចូលសមតុល្យទៅក្នុងស្លាកលេខសម្គាល់យានយន្តជាមុន (Prepaid License Plate Top-Up) ដោយប្រព័ន្ធទូទាត់ប្រាក់អេឡិចត្រូនិក តាមកម្មវិធីធនាគារក្នុងទូរស័ព្ទដៃ (Mobile Banking) នៃគ្រឹះស្ថានហិរញ្ញវត្ថុ និងធនាគារដៃគូរបស់ក្រសួងសាធារណការ និងដឹកជញ្ជូន។
លោកថា៖ «គិតត្រឹមថ្ងៃ ១៤ វិច្ឆិកា ឆ្នាំ ២០២២ មានគ្រឹះស្ថានដៃគូចំនួន៥ ដែលបានដាក់ឱ្យប្រើប្រាស់នូវកម្មវិធី Mobile Banking ដើម្បីបញ្ចូលសមតុល្យទឹកប្រាក់ តាមរយៈស្លាកលេខសម្គាល់យានយន្ត តាមរយៈធនាគារជីបម៉ុង(Chip Mong Bank) ធនាគារអេស៊ីលីដា (ACLEDA Bank) ធនាគារវឌ្ឍនៈអាស៊ីចំកាត់ (ABA Bank) ធនាគារវីង (Wing Bank) និងធនាគារវឌ្ឍនៈ (VATTANAC Bank)»។
តាមការប្រកាសរបស់ក្រសួង រាល់ការបញ្ចូលសមតុល្យទឹកប្រាក់ តាមរយៈស្លាកលេខសម្គាល់យានយន្តមុនពេលចូលប្រើប្រាស់ផ្លូវ (License Plate Top-Up)គឺមានទម្រង់ដូចគ្នាទៅនឹងការបញ្ចូលទឹកប្រាក់ក្នុងទូរស័ព្ទដៃ(Mobile Top-Up) ហើយអាចពិនិត្យសមតុល្យទឹកប្រាក់ដែលបានបញ្ចូល ឬនៅសល់ ដោយការស្កេន QR Code នៅលើលតាបត្រត្រួតពិនិត្យលក្ខណៈបច្ចេកទេសយានជំនិះ (ឆៀក) ឬលតាបត្រអនុញ្ញាតសម្រាប់ទោចក្រយានយន្ត។
ដោយសារតែប្រឈមនឹងបញ្ហាកកស្ទះ នៅតាមច្រកចេញ-ចូល នៃផ្លូវល្បឿនលឿន ដែលមានអ្នកប្រើប្រាស់ ជាមធ្យមប្រមាណ ១ ម៉ឺន ទៅជិត ២ ម៉ឺនគ្រឿង ក្នុង ១ ថ្ងៃ ក្រុមហ៊ុនផ្លូវល្បឿនលឿន និងក្រសួងសាធារណការ បានបង្កើតប្រព័ន្ធ ETC (Electronic Toll Collection) ដើម្បីប្រើប្រាស់លើផ្លូវល្បឿនលឿន។
ក្រុមហ៊ុនផ្លូវល្បឿនលឿន បានឱ្យដឹងថា ប្រព័ន្ធ ETC គឺជាប្រព័ន្ធបង់ថ្លៃសេវាផ្លូវល្បឿនលឿនដោយស្វ័យប្រវត្តិដោយប្រើប្រាស់បច្ចេកវិទ្យាទំនាក់ទំនងគ្នាដោយឥតខ្សែ តាមរយៈបំពាក់ឧបករណ៍ OBU នៅលើកញ្ចក់ខាងមុខនៃរថយន្ត អាចឆ្លងកាត់ច្រកបង់ប្រាក់ដោយមិនចាំបាច់ឈប់ជាបណ្ដោះអាសន្ន ដើម្បីទទួលកាតធ្វើដំណើរ។
ក្រុមហ៊ុននេះអះអាងថា៖ «ប្រើប្រាស់ប្រព័ន្ធ ETC មានអត្ថប្រយោជន៍ជាច្រើន ដូចជា ពេលឆ្លងកាត់បញ្ជរបង់ប្រាក់ដោយមិនចាំបាច់រង់ចាំ។ អាចទទួលការបញ្ចុះតម្លៃបន្ថែម និងកាត់បន្ថយការកកស្ទះចរាចរណ៍។ អាចឆ្លងកាត់បញ្ជរបង់ប្រាក់បានយ៉ាងរលូន និងងាយស្រួល ហើយស័ក្តិសមសម្រាប់សង្គមក្នុងយុគសម័យ ដែលជាការទូទាត់ដោយស្វ័យប្រវត្តិ»។
បន្ថែមពីនេះ ក្រុមហ៊ុនបញ្ជាក់ទៀតថា ការប្រើប្រាស់ប្រព័ន្ធ ETC ក៏ចូលរួមលុបបំបាត់ការឈប់រថយន្តម្តងហើយម្តងទៀតនៅកន្លែងបង់ប្រាក់ ដោយកាត់បន្ថយឧស្ម័នផ្សែង និងសំឡេងរំខាន ដែលជាលទ្ធផល នឹងធ្វើឱ្យបរិស្ថាននៅតាមដងផ្លូវនឹងប្រសើរឡើង ដោយមានសុវត្ថិភាពខ្ពស់ ឆ្លងបានដោយសេរី ងាយស្រួល និងឆាប់រហ័ស។
បើតាមការប្រកាសរបស់ក្រុមហ៊ុនផ្លូវល្បឿនលឿន ការធ្វើកាត ETC គឺអាចធ្វើបាននៅតាមបញ្ជរបង់ប្រាក់ភ្នំពេញ និងក្រុងព្រះសីហនុ ដោយភ្ជាប់មកជាមួយឯកសារដើម ដូចជាអត្តសញ្ញាណប័ណ្ណ ឆៀកឡាន និងកាតគ្រី ហើយបន្ទាប់ពីធ្វើការដំឡើងឧបករណ៍ ETC និងបញ្ចូលសមតុល្យទឹកប្រាក់ទៅក្នុងកាត ETC នៅលើយានយន្តរួចរាល់ នោះប្រតិបត្តិការនឹងចាប់ផ្តើមមានសុពលភាពអាចប្រើប្រាស់បានភ្លាមៗតែម្តង៕