.jpg)
លោកទៀ បាញ់ រដ្ឋមន្ត្រីក្រសួងការពារជាតិដឹកនាំកិច្ចប្រជុំនាពេលកន្លងមក។ ហេង ជីវ័ន
ភ្នំពេញៈ រដ្ឋមន្ត្រីក្រសួងការពារជាតិអាស៊ាន-អាស៊ានបូក នឹងចូលរួមក្នុងកិច្ចប្រជុំរដ្ឋមន្ត្រីក្រសួងការពារជាតិអាស៊ានលើកទី៩ ចាប់ពីថ្ងៃទី ២១ ដល់ថ្ងៃទី ២៣ ខែវិច្ឆិកា នៅក្រុងសៀមរាប ខេត្តសៀមរាប ដែលរដ្ឋមន្ត្រីការពារជាតិកម្ពុជាធ្វើជាម្ចាស់ផ្ទះ ដើម្បីពិភាក្សាការងារលើកកម្ពស់កិច្ចសហប្រតិបត្តិការលើវិស័យការពារជាតិក្នុងតំបន់ និងសកលលោក។
យោងតាមសេចក្ដីប្រកាសព័ត៌មានរបស់ក្រសួងការពារជាតិដែលបានចេញផ្សាយកាលពីថ្ងៃទី ១៤ ខែវិច្ឆិកា បានឱ្យដឹងថា៖ «កិច្ចប្រជុំចង្អៀតរដ្ឋមន្ត្រីការពារជាតិអាស៊ាន នឹងផ្តោតជាសំខាន់លើការផ្លាស់ប្តូរទស្សនៈ ស្តីពីការលើកកម្ពស់កិច្ចសហប្រតិបត្តិការការពារជាតិ ដើម្បីពង្រឹងសាមគ្គីភាពសម្រាប់សន្តិសុខ ប្រកបដោយភាពសុខដុម»។
លោក ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នឹងចូលរួមជាអធិបតីដើម្បីថ្លែងសន្ទរកថាគន្លឹះក្នុងពិធីបើកជាផ្លូវការនៃកិច្ចប្រជុំរដ្ឋមន្ត្រីការពារជាតិអាស៊ានបូកលើកទី៩ ហើយនឹងជួបរដ្ឋមន្ត្រីការពារជាតិអាស៊ានបូក និងអគ្គលេខាធិការអាស៊ាន។
សេចក្ដីប្រកាសព័ត៌មានដដែលនេះបានបញ្ជាក់ថា៖ «នៅក្នុងកិច្ចប្រជុំរដ្ឋមន្ត្រីការពារជាតិអាស៊ានបូក ក៏នឹងស្ដាប់របាយការណ៍នៃការអភិវឌ្ឍន៍ថ្មីៗនៅក្នុងអាស៊ាន ការផ្លាស់ប្ដូរទស្សនៈស្ដីពី បរិយាកាសសន្តិសុខតំបន់ និងអន្តរជាតិ និងកិច្ចសន្ទនាយុទ្ធសាស្ត្រដើម្បីលើកកម្ពស់កិច្ចសហប្រតិបត្តិការការពារជាតិក្នុងតំបន់»។
លោក ទៀ បាញ់ រដ្ឋមន្ត្រីការពារជាតិនៃព្រះរាជាណាចក្រកម្ពុជាក៏នឹងផ្ទេរតំណែងជាប្រធានកិច្ចប្រជុំរដ្ឋមន្ត្រីការពារជាតិអាស៊ាន និងកិច្ចប្រជុំពាក់ព័ន្ធ ជូនទៅលោក ប្រាបូវូ ស៊ូប៊ីយ៉ានតូ រដ្ឋមន្ត្រីក្រសួងការពារជាតិសាធារណរដ្ឋឥណ្ឌូនេស៊ី ដែលជាប្រធានប្ដូរវេន នៅឆ្នាំ ២០២៣។
លោក សៅ សុខា មេបញ្ជាការកងរាជអាវុធហត្ថលើផ្ទៃប្រទេស បាន ចុះត្រួតពិនិត្យកម្លាំងដើម្បីពង្រឹងកិច្ចការពារសន្តិសុខមុនកិច្ចប្រជុំរដ្ឋមន្ត្រីការពារជាតិអាស៊ាននៅខេត្តសៀមរាប។នេះបើតាមការបញ្ជាក់របស់អ្នកនាំពាក្យកងរាជអាវុធហត្ថលើផ្ទៃប្រទេស លោកឧត្តមសេនីយ៍ អេង ហ៊ី ដែលបានផ្សាយជាសាធារណៈនៅថ្ងៃទី ១៥ ខែវិច្ឆកា។
អ្នកនាំពាក្យកងរាជអាវុធហត្ថលើផ្ទៃប្រទេសលោក អេង ហ៊ី លើឡើងថា មេបញ្ជាការកងរាជអាវុធហត្ថលើផ្ទៃប្រទេសបានទៅដល់ខេត្តសៀមរាបតាំងពីថ្ងៃទី ១៤ ខែវិច្ឆកា ដើម្បីត្រួតពិនិត្យលើការងារចាំបាច់ជាច្រើនពាក់ព័ន្ធនឹងកិច្ចការពារសន្តិសុខសម្រាប់កិច្ចប្រជុំរដ្ឋមន្ត្រីការពារជាតិអាស៊ាន។
លោក អេង ហ៊ី៖ «នាយឧត្តមសេនីយ៍ សៅ សុខា បានអញ្ជើញចុះត្រួតពិនិត្យទីតាំងភូមិសាស្ត្រក្នុងខេត្តសៀមរាប ដើម្បីរៀបចំផែនការការពារសន្តិសុខ សណ្តាប់ធ្នាប់ និងសង្គ្រោះ ក្នុងកិច្ចប្រជុំថ្នាក់រដ្ឋមន្ត្រីការពារជាតិអាស៊ាន និងប្រជុំនានា នាពេលខាងមុខ»។
លោកបន្តថា៖ «នាយឧត្តមសេនីយ៍ សៅ សុខា បានត្រួតពិនិត្យជាក់ស្តែងក្នុងសណ្ឋាគារដែលភ្ញៀវស្នាក់នៅ ទីកន្លែងប្រជុំ អាកាសយានដ្ឋានអន្តរជាតិសៀមរាប តម្រាយផ្លូវ និងរៀបចំគោលដៅឈរជើងការពាផ្ទាល់ ការពារដោយប្រយោល កម្លាំងអន្តរាគមន៍ ពេទ្យ រថយន្តអគ្គីភ័យ រថពាសដែក រថយន្តនាំក្បួន ម៉ូតូ គ្រឿងបំពាក់ យុទ្ធោបករណ៍ កាំម៉ារ៉ាសុវត្ថិភាព កន្លែងស្នាក់នៅរបស់ទ័ព ការដាំស្ល បន្ទប់អនាម័យ»។
ទោះជាយ៉ាងណាក្ដីអ្នកសារព័ត៌មានមិនទាន់អាចស្វែងរកព័ត៌មានពីចំនួនកងកម្លាំងដែលអាជ្ញាធរកម្ពុជាគ្រោងដាក់ពង្រាយដើម្បីការពារសន្តិសុខក្នុងកិច្ចប្រជុំបាននៅឡើយ៕
