ភ្នំពេញៈ តម្រូវការអុកស៊ីហ្ស៊ែន គឺមានគ្រប់មន្ទីរពេទ្យនៅទូទាំងប្រទេស ហើយការផ្គត់ផ្គង់ភាគច្រើន គឺមានតែនៅក្នុងរាជធានីភ្នំពេញតែប៉ុណ្ណោះនាពេលកន្លងមក ដែលធ្វើឱ្យតាមមន្ទីរពេទ្យរដ្ឋ និងឯកជននៅតាមបណ្តាខេត្តឆ្ងាយៗបានជួបប្រទះការលំបាក ព្រោះតែត្រូវចំណាយពេលវេលាយូរ ថវិកាច្រើនក្នុងការដឹកជញ្ជូន។
ដូច្នេះការផលិតអុកស៊ីហ្ស៊ែនបានដោយខ្លួនឯងក្នុងការចែកចាយនៅតាមបណ្តាខេត្ត គឺជាការចូលរួមចំណែកជួយសន្សំសំចៃពេលវេលា ថវិកា និងកាត់បន្ថយការប្រឈមនឹងកង្វះអុកស៊ីហ្ស៊ែន ថែមទាំងបង្កភាពងាយស្រួលដល់ការព្យាបាលអ្នកជំងឺទៀតផង។
ម៉ាស៊ីនផលិតអុកស៊ីហ្ស៊ែន គឺជាម៉ាស៊ីនមួយដែលអាចផលិតអុកស៊ីហ្ស៊ែនក្នុងចំនួនមួយច្បាស់លាស់ អាស្រ័យទៅតាមប្រភេទ និងទំហំ ដែលបានដំឡើងនៅតាមទីតាំងនីមួយៗ។ តាមផែនការរបស់ក្រសួងសុខាភិបាល គឺធ្វើយ៉ាងណាជំរុញឱ្យគ្រប់បណ្តាខេត្តទូទាំងប្រទេស មានម៉ាស៊ីនផលិតអុកស៊ីហ្ស៊ែនបានដោយខ្លួនឯង។
ក្រសួងសុខាភិបាលបានឱ្យដឹងថា ការបង្កើតឱ្យមានម៉ាស៊ីនសម្រាប់ផលិតអុកស៊ីហ្ស៊ែននៅតាមបណ្តាខេត្តទូទាំងប្រទេសនឹងជួយឱ្យមន្ទីរពេទ្យនៅតាមបណ្តាខេត្តទាំងនោះ ឈប់ទិញបំពង់អុកស៊ីហ្ស៊ែនពីអ្នកផ្គត់ផ្គង់ឯកជន ដើម្បីបំពេញតម្រូវការនៅតាមមន្ទីរពេទ្យ។
ក្រសួងបន្ថែមថា ការដែលមន្ទីរសុខាភិបាលខេត្តទូទាំងប្រទេស មានម៉ាស៊ីនសម្រាប់ផលិតអុកស៊ីហ្ស៊ែនដោយខ្លួនឯងក្នុងការចែកចាយនៅក្នុងមូលដ្ឋានខេត្តរបស់ខ្លួន គឺវាពិតជាមានសារៈសំខាន់បំផុតព្រោះអាចរួមចំណែកយ៉ាងសំខាន់ ដើម្បីឆ្លើយតបទាន់ពេលវេលាក្នុងការសង្គ្រោះជីវិតអ្នកជំងឺ។ ក្រសួងបញ្ជាក់ថា៖ «ដូច្នេះវានឹងជួយសន្សំសំចៃពេលវេលា ថវិកា និងកាត់បន្ថយការប្រឈមនឹងកង្វះអុកស៊ីហ្ស៊ែនដែលបង្កគ្រោះថ្នាក់ដល់ការព្យាបាលអ្នកជំងឺទៀតផង»។
ខេត្តព្រះសីហនុ គឺជាខេត្តមួយក្នុងចំណោមខេត្តជាច្រើនទៀតដែលអាចផលិតអុកស៊ីហ្ស៊ែនបានដោយខ្លួនឯង ហើយកាលពីថ្ងៃទី ២០ ខែកញ្ញា ឆ្នាំ ២០២២ ខេត្តនេះ បានបើកសម្ពោធដាក់ឱ្យប្រើប្រាស់នូវអគារតេជោព្យាបាលជំងឺកូវីដ ១៩ មន្ទីរពិសោធន៍ និងម៉ាស៊ីន សម្រាប់ផលិតអុកស៊ីហ្ស៊ែននៅក្នុងមន្ទីរពេទ្យបង្អែកខេត្តព្រះសីហនុ។
ទន្ទឹមនឹងខេត្តព្រះសីហនុកាលពីថ្ងៃទី ១៤ ខែកញ្ញា ឆ្នាំ ២០២២ រដ្ឋបាលខេត្តព្រះវិហារ ក៏បានរៀបចំពិធីសម្ពោធដាក់ឱ្យប្រើប្រាស់នូវអគារ និងម៉ាស៊ីនផលិតខ្យល់អុកស៊ីហ្ស៊ែន នៅក្នុងមន្ទីរពេទ្យបង្អែកខេត្ត ១៦ មករា ដែលជាអំណោយរបស់ទីភ្នាក់ងារសហរដ្ឋអាមេរិកសម្រាប់ការអភិវឌ្ឍផងដែរ។ ក្រៅពីខេត្តទាំង ២ នេះ ខេត្តបាត់ដំបង ខេត្តកោះកុង និងខេត្តបន្ទាយមានជ័យជាដើម ក៏បានប្រកាសពីភាពជោគជ័យក្នុងការផលិតអុកស៊ីហ្ស៊ែនសម្រាប់ប្រើប្រាស់បានដោយខ្លួនឯងផងដែរ ខណៈរាជធានីភ្នំពេញ គឺជាមូលដ្ឋានដ៏សំខាន់មួយដែលមានម៉ាស៊ីនផលិតអុកស៊ីហ្ស៊ែនមុនគេបង្អស់ ដើម្បីធ្វើការចែកចាយ និងផ្គត់ផ្គង់ទៅតាមមន្ទីរពេទ្យរដ្ឋ និងឯកជនទូទាំងប្រទេស។
លោក ឡុង ឌីម៉ង់ អភិបាលរងខេត្តព្រះសីហនុបានប្រាប់ភ្នំពេញប៉ុស្តិ៍ថា ការដែលខេត្តព្រះសីហនុ អាចផលិតអុកស៊ីហ្ស៊ែន បានដោយខ្លួនឯង គឺជាការប្រសើរ និងបានបង្ហាញអំពីការយកចិត្តទុកដាក់របស់រាជរដ្ឋាភិបាល ក៏ដូចជាឆន្ទៈប្រកបដោយការទទួលខុសត្រូវរបស់អាជ្ញាធរខេត្តព្រះសីហនុ ចំពោះសុខុមាលភាពរបស់ប្រជាពលរដ្ឋ។
លោកបានបន្តថា ការផលិតអុកស៊ីហ្ស៊ែន បានដោយខ្លួនឯង មានសារៈសំខាន់បំផុត ព្រោះអាចរួមចំណែកយ៉ាងសំខាន់ដល់មន្ទីរពេទ្យទូទាំងខេត្ត ដើម្បីឆ្លើយតបទាន់ពេលវេលាក្នុងការសង្គ្រោះជីវិតអ្នកជំងឺ។ លោក បញ្ជាក់ថា៖ «យើងអាចកាត់បន្ថយការចំណាយ ព្រោះពីមុនយើងទិញអុកស៊ីហ្ស៊ែនពីភ្នំពេញ។ យើងចំណេញពេលវេលា ចំណេញថវិកា ចំណេញកម្លាំងពលកម្ម មិនចំណាយបំពង់ច្រើន និងមានភាពទៀងទាត់ ឬស្ថិរភាពនៃការផ្គត់ផ្គង់»។
លោកបានបន្តថា៖ «លើសពីនេះទៅទៀតយើងអាចដោះស្រាយហានិភ័យពីការទិញអុកស៊ីហ្ស៊ែនពីភ្នំពេញដូចជា ហានិភ័យក្នុងពេលដឹកជញ្ជូន (ចង្វាក់ផ្គត់ផ្គង់) ចំណាយពេលរង់ចាំយូរ ក្នុងពេលមានតម្រូវការប្រើប្រាស់ច្រើន ដែលយើងមិនអាចដឹកមកទាន់ពេលវេលា។ មិនមានការខាតបង់ដោយពេលខ្លះអុកស៊ីហ្ស៊ែន ដែលទិញមកមានចំណុះមិនគ្រប់។ នៅពេលយើងមានម៉ាស៊ីនផលិតខ្លួនឯងបាន នៅពេលមានតម្រូវការខ្ពស់ យើងអាចបង្កើនការផលិតខ្លួនឯងបាន»។
ម៉ាស៊ីនផលិតអុកស៊ីហ្ស៊ែនរបស់មន្ទីរពេទ្យបង្អែកខេត្តព្រះសីហនុ គឺអាចផលិតបានអុកស៊ីហ្ស៊ែនប្រមាណ ៦០ ម៉ែត្រគុប ក្នុង ១ ម៉ោង ឬស្មើនឹង ១០ បំពង់។ នេះបើតាមលោក ឡុង ឌីម៉ង់។ លោកឱ្យដឹងថា ជាមធ្យម មន្ទីរពេទ្យបង្អែកខេត្តព្រះសីហនុអាចដំណើរការម៉ាស៊ីន ៨ ម៉ោងក្នុង ១ ថ្ងៃ ដែលបរិមាណអុកស៊ីហ្ស៊ែនទទួលបានសរុបគឺប្រមាណ ៤៨០ ម៉ែត្រគុប។
ចំណែកលោក ទៅ ម៉ឹង ប្រធានមន្ទីរសុខាភិបាលខេត្តកោះកុងក៏បានថ្លែងស្រដៀងគ្នានេះដែរថា ការមានម៉ាស៊ីនផលិតអុកស៊ីហ្ស៊ែននៅក្នុងខេត្ត ដើម្បីផលិតអុកស៊ីហ្ស៊ែនដោយខ្លួនឯង គឺបានជួយដល់ជីវិតអ្នកជំងឺច្រើនណាស់ ជាពិសេសគឺនៅក្នុងអំឡុងពេលមានការផ្ទុះជំងឺកូវីដ ១៩ ដែលអាចជួយសង្គ្រោះបន្ទាន់ដល់អ្នកជំងឺកូវីដ ១៩ កម្រិតធ្ងន់បានផងដែរ។
ប្រធានមន្ទីរសុខាភិបាលខេត្តកោះកុងរូបនេះបាននិយាយទៀតថា ចាប់ពីពេលនេះតទៅបញ្ហាខ្វះខាតអុកស៊ីហ្ស៊ែនជួយសង្គ្រោះអ្នកជំងឺកូវីដ ១៩ ឬអ្នកជំងឺទូទៅផ្សេងៗលែងជួបបញ្ហាប្រឈមទៀតហើយ ខណៈកន្លងមក ពេលអស់អុកស៊ីហ្ស៊ែនត្រូវដឹកជញ្ជូនទៅរាជធានីភ្នំពេញ ដើម្បីដោះដូរ។
លោកបានបញ្ជាក់ថា៖ «ម៉ាស៊ីនបច្ចេកវិទ្យាទំនើប ហើយអានុភាពផលិតអុកស៊ីហ្ស៊ែនក្នុង ១ ថ្ងៃបានដល់ទៅ ១០ ធុងធំៗ ស្មើនឹង ៤០ លីត្រ ត្រូវបានក្រុមការងារបច្ចេកទេសកំពុងរៀបចំដំឡើងនៅក្នុងអគារមានសុវត្ថិភាពនៅក្បែរមន្ទីរពេទ្យបង្អែកខេត្តកោះកុង»។
អុកស៊ីហ្ស៊ែន គឺជាសារធាតុទូទៅបំផុតនៅលើផែនដី ហើយវាមាននៅក្នុងសារពាង្គកាយមានជីវិតរហូតដល់ ៦៥ ភាគរយ។ អុកស៊ីហ្ស៊ែន គឺមានសារៈសំខាន់ណាស់សម្រាប់សេវាសំខាន់ៗ ដូចជាការព្យាបាលអ្នកជំងឺកូវីដ ១៩ ក្នុងពេលបច្ចុប្បន្ន ការតាមដាន និងការព្យាបាលអ្នកជំងឺដែលកំពុងត្រូវសង្គ្រោះបន្ទាន់។
លោកស្រី Foroogh Foyouzat តំណាងអង្គការយូនីសេហ្វប្រចាំកម្ពុជាធ្លាប់បាននិយាយថា អុកស៊ីហ្ស៊ែនអាចធ្វើឱ្យមានភាពខុសគ្នារវាងជីវិត និងសេចក្តីស្លាប់។
លោកស្រី បានលើកឡើងបន្តថា ដោយសារអុកស៊ីហ្ស៊ែនវាមានសារៈសំខាន់យ៉ាងដូច្នេះហើយ ទើបអង្គការយូនីសេហ្វបានធ្វើការជាមួយរាជរដ្ឋាភិបាលកម្ពុជា ដើម្បីកែលម្អការផ្គត់ផ្គង់អុកស៊ីហ្ស៊ែន និងហេដ្ឋារចនាសម្ព័ន្ធនៅកម្ពុជា ជាពិសេស គឺការកសាងសមត្ថភាពបុគ្គលិកសុខាភិបាលក្នុងការប្រើប្រាស់ម៉ាស៊ីនផលិតអុកស៊ីហ្ស៊ែន។
លោក អ៊ុង រតនា ប្រធានមន្ទីរសុខាភិបាលខេត្តរតនគិរីបានប្រាប់ ភ្នំពេញ ប៉ុស្តិ៍ កាលពីខែតុលាថា ខេត្តរតនគិរីកំពុងតែរៀបចំដំឡើងម៉ាស៊ីនផលិតអុកស៊ីហ្ស៊ែន និងប្រព័ន្ធបច្ចេកទេសនានា ដើម្បីអាចឱ្យខេត្តនេះ អាចផលិតអុកស៊ីហ្ស៊ែនបានដោយខ្លួនឯង។ លោកបានបន្តថា ការដែលខេត្តនៅមិនទាន់អាចមានលទ្ធភាពផលិតអុកស៊ីហ្ស៊ែនបានដោយខ្លួនឯង គឺជាឧបសគ្គមួយដែលខេត្តតែងតែចំណាយថវិកា និងពេលវេលា ដើម្បីទិញអុកស៊ីហ្ស៊ែនពីរាជធានីភ្នំពេញ សម្រាប់យកមកផ្គត់ផ្គង់តម្រូវនៅមន្ទីរពេទ្យក្នុងខេត្ត។
លោកបានគូសបញ្ជាក់ថា៖ «ដោយសារយើងមិនទាន់អាចផលិតបានដោយខ្លួនឯង យើងនៅតែបន្តយកអុកស៊ីហ្ស៊ែនពីភ្នំពេញមកប្រើប្រាស់។ យ៉ាងណាក្តីការនាំចូលអុកស៊ីហ្ស៊ែនពីក្រៅមកនេះ នៅតែអាចទប់ទល់ស្ថានភាពបាន ហើយតាំងពីមានករណីផ្ទុះជំងឺកូវីដ ១៩ មក ក្រសួងក៏បានផ្តល់មកឱ្យយើង ហើយយើងក៏បានប្រើប្រាស់ថវិកាជាតិ ដើម្បីទិញអុកស៊ីហ្ស៊ែនបន្ថែម»។
ទោះយ៉ាងណា លោក អ៊ុង រតនា បានឱ្យដឹងថា អាជ្ញាធរខេត្តរតនគិរីកំពុងបន្តរៀបចំដាក់ឱ្យដំណើរការនូវប្រព័ន្ធសម្រាប់ផលិតអុកស៊ីហ្ស៊ែននេះ ដើម្បីអាចប្រើប្រាស់បានក្នុងពេលឆាប់ៗ បន្ទាប់ពីផ្នែកខ្លះត្រូវបានរៀបចំរួចរាល់។ លោករំពឹងថា ម៉ាស៊ីនផលិតអុកស៊ីហ្ស៊ែនដែលគ្រោងនឹងដាក់ដំណើរការពេលឆាប់ៗ នឹងចូលរួមជួយបំពេញតម្រូវការអុកស៊ីហ្ស៊ែននៅក្នុងខេត្តឱ្យកាន់តែងាយស្រួលបន្ថែមទៀត៕