កណ្តាលៈ អង្គភាពប្រឆាំងអំពើពុករលួយ (អបព) បានចេញប្រកាសព័ត៌មាន ស្តីពីការឃាត់ខ្លួនជនសង្ស័យ ឈ្មោះ សុខ សុផា ស្មៀនសង្កាត់តាខ្មៅ ក្រុងតាខ្មៅ កាលពីវេលាម៉ោង ៥ ល្ងាច ថ្ងៃទី ១៦ ខែវិច្ឆិកា ឆ្នាំ ២០២២ ពាក់ព័ន្ធនឹងការមិនបើកប្រាក់ឧបត្ថម្ភជូនគ្រួសារក្រីក្រ និងងាយរងគ្រោះមានទឹកប្រាក់សរុបជាង ៧០ លានរៀល ក្នុងអំឡុងពេលប្រយុទ្ធនឹងជំងឺកូវីដ ១៩។
សេចក្តីប្រកាសព័ត៌មានបានបញ្ជាក់ថា អបព ពិតជាបានទទួលជនសង្ស័យឈ្មោះ សុខ សុផា ភេទប្រុស អាយុ ៤៥ ឆ្នាំ ស្មៀនសង្កាត់តាខ្មៅ ពីស្នងការដ្ឋាននគរបាលខេត្តកណ្តាល ដូចការចុះផ្សាយរបស់សារព័ត៌មាននានា និងបានសម្រេចធ្វើការឃាត់ខ្លួនជននេះ។
ស្មៀនសង្កាត់តាខ្មៅ គឺលោក សុខ សុផា ត្រូវបានក្រសួងសង្គមកិច្ចនិងកម្លាំងនគរបាល ចាប់ខ្លួនបញ្ជូនទៅកាន់ស្នងការដ្ឋាននគរបាលខេត្តកណ្តាល បន្ទាប់ពីសង្ស័យថា បុគ្គលរូបនេះកិបកេងថវិការដ្ឋជាង ៧០ លានរៀល ពីកម្មវិធីមូលនិធិជាតិជំនួយសង្គម។
បើតាមលោក ឈួរ សុបញ្ញា ប្រធាននាយកដ្ឋានសុខុមាលភាពសង្គម នៃក្រសួងសង្គមកិច្ច អតីតយុទ្ធជន និងយុវនីតិសម្បទា បានប្រាប់ថា ដោយសារបានទទួលពាក្យបណ្ដឹងពីប្រជាពលរដ្ឋ និងពិនិត្យទៅលើបច្ចេកទេសផងដែរ ទើបរកឃើញករណីមិនប្រក្រតីនេះ។
លោកបញ្ជាក់ថា ក្រុមការងារមូលនិធិជាតិគាំពារសង្គម បានចុះទៅពិនិត្យទៅលើស្ថានភាពតែបច្ចេកទេសទេ ដូចជាពិនិត្យលើពាក្យបណ្ដឹងប្រជាពលរដ្ឋថា វាត្រឹមត្រូវដែរទេ។ ប៉ុន្តែចំពោះនីតិវិធីនៃការបញ្ជូនបន្ត ឬក៏អនុវត្តនីតិវិធីច្បាប់ គឺមានតែសួរទៅខាងសមត្ថកិច្ចដែលអនុវត្តច្បាប់។
លោក ឈួរ សុបញ្ញា ថា៖ «យើងរកឃើញស្មៀនកិបកេងលុយពីកម្មវិធីនេះ គឺដោយសារទទួលបានពាក្យបណ្ដឹងពីប្រជាពលរដ្ឋ ហើយមួយទៀត យើងមានប្រព័ន្ធព័ត៌មានវិទ្យាមួយដែលរាល់ថ្ងៃយើងមានប្រើប្រាស់កម្មវិធីហ្នឹង។
អ៊ីចឹងនៅក្នុងប្រព័ន្ធហ្នឹង យើងបានពិនិត្យមើលទៅលើយន្តការនៃអនុវត្តកម្មវិធីនេះ ដូច្នេះយើងមើលប្រព័ន្ធទៅ គឺអាចដឹងថា វាមានភាពប្រក្រតី ឬមិនមានភាពប្រក្រតី»។
លោកបន្ថែមថា ពេលដែលពិនិត្យឃើញហើយថា មានភាពមិនប្រក្រតី ខាងក្រសួងក៏បានបញ្ជូនបញ្ហាព័ត៌មានបច្ចេកទេសទាំងនេះទៅសមត្ថកិច្ច ដើម្បីឱ្យពួកគាត់អនុវត្តតាមនីតិវិធីច្បាប់។
លោក ឯក ស៊ុនរស្មី ព្រះរាជអាជ្ញារងអមសាលាដំបូងខេត្តកណ្ដាល បានប្រាប់ថា ករណីនេះ ខាងនរគបាល គឺមិនទាន់បានបញ្ចូនមកអយ្យការនៅឡើយទេ ហើយលោកសូមឱ្យសួរទៅខាងនរគបាលវិញ។
លោក ប៉ិច ពិសី នាយកប្រតិបត្តិអង្គការតម្លាភាពកម្ពុជា (TI) បានថ្លែងថា ករណីនេះ គឺពាក់ព័ន្ធជាមួយនឹងអំពើពុករលួយហើយ ពីព្រោះស្មៀនសង្កាត់រូបនេះ បានកេងប្រវ័ញ្ច និងកិបកេងថវិកាជាតិ ដែលរាជរដ្ឋាភិបាលបានឧបត្ថម្ភទៅដល់គ្រួសារក្រីក្រ ដូច្នេះហើយនៅក្នុងច្បាប់ប្រឆាំងអំពើពុករលួយ បានចែងអំពីបទល្មើសហ្នឹងដែរ។
លោក ប៉ិច ពិសី បញ្ជាក់ថា៖ «ខ្ញុំគិតថា ដោយសារប្រជាពលរដ្ឋ គាត់មានភស្ដុងតាងខ្លះផង និងប៉ូលីសផង ជាការចាំបាច់ណាស់ដែលត្រូវតែក្រសួងសាមី ស្មៀនឃុំ ត្រូវស្ថិតក្នុងដែនសមត្ថកិច្ចរបស់ក្រសួងមហាផ្ទៃ។ អ៊ីចឹងជំហានដំបូងក្រសួងមហាផ្ទៃ គួរតែមានការស៊ើបអង្កេតទៅលើករណីហ្នឹង ទៅលើការកេងប្រវ័ញ្ច កាសង្ស័យថា មានការកិបកេងរបស់ស្មៀនហ្នឹង»។
លោកបន្តថា៖ «ហើយករណីនេះ ជាដែនសមត្ថកិច្ចរបស់អង្គភាពប្រឆាំងអំពើពុករលួយ។ អ៊ីចឹងខាងអង្គភាពគួរតែមានការស៊ើបអង្កេត ស្វែងរកការពិតបន្ថែម ដើម្បីឱ្យជនសង្ស័យហ្នឹងផ្ដល់ភាពយុត្តិធម៌ ដល់ខ្លួនឯងផង និងជនរងគ្រោះផង ពីព្រោះថា កេងប្រវ័ញ្ចពីកម្មវិធីគាំពារសង្គម គឺវាប៉ះពាល់ដល់អ្នកក្រ»។
លោកបន្ថែមថា ដើម្បីកុំឱ្យមានមន្ត្រីក្រោយៗណា ដែលបន្តសកម្មភាពដូចករណីនេះបន្តទៅទៀត អាជ្ញាធរត្រូវអនុវត្តទៅតាមច្បាប់ដែលចេញជាធរមាន នៃច្បាប់អំពើពុករលួយ ដោយមិនគួរបន្ធូរបន្ថយឬលើកលែងឡើយ។
សូមបញ្ជាក់ថា លោក សុខ សុផា ស្មៀនសង្កាត់តាខ្មៅ ត្រូវបានមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា បានសហការជាមួយកម្លាំងនគរបាលខេត្តកណ្ដាល ចុះឃាត់ខ្លួនកាលពីថ្ងៃទី ១៤ ខែវិច្ឆិកា ឆ្នាំ ២០២២ ដោយចោទថា ស្មៀនសង្កាត់រូបនេះ កិបកេងលុយជាង ៧០ លានរៀលពីកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងគ្រួសារងាយរងគ្រោះ ក្នុងកំឡុងពេលប្រយុទ្ធប្រឆាំងនឹងជំងឺកូវីដ-១៩។
លោក ឡាក់ ម៉េងធី ស្នងការរងទទួលផែនព្រហ្មទណ្ឌនៃស្នងការដ្ឋាននគរបាលខេត្តកណ្តាលបានប្រាប់ ភ្នំពេញ ប៉ុស្តិ៍ នៅថ្ងៃទី ១៦ វិច្ឆិកាថា ជនសង្ស័យជាស្មៀនសង្កាត់តាខ្មៅម្នាក់នេះ ត្រូវបានសមត្ថកិច្ចរបស់លោកបញ្ចប់ការសាកសួរហើយ ហើយបានបញ្ជូនបន្ត តាមសំណើររបស់អង្គភាពអំពើពុករលួយ (ACU)។ ទោះជាយ៉ាងណាលោកស្នងការរងរូបនេះមិនបានបញ្ជាក់លម្អិតពាក់ព័ន្ធនឹងចម្លើយរបស់ជនសង្ស័យឈ្មោះ សុខ សុផាឡើយ ៕