ភ្នំពេញៈ ក្រសួងអប់រំ យុវជន និងកីឡា រៀបចំព្រឹត្តិការណ៍អបអរសាទរសមិទ្ធផលរួមគ្នារបស់ GPE-3 នៅថៃ្ងទី ១៧ ខែវិច្ឆិកា នៅវិទ្យានស្ថានគរុកោសល្យរាជធានីភ្នំពេញ (PTEC) ដើម្បីចែករំលែកលទ្ធផលនិងឧត្តមានុវត្តន៍នៃកម្មវិធី GPE-3 ជាមួយអ្នកពាក់ព័ន្ធផ្នែកអប់រំសំខាន់ៗ រួមមានថ្នាក់ដឹកនាំ និងមន្ត្រីក្រសួងអប់រំ ដៃគូអភិវឌ្ឍន៍ គណៈគ្រប់គ្រងសាលា និងគ្រូបង្រៀន។នេះបើតាមសេចក្តីប្រកាសព័ត៌មានរួមនៃក្រសួងអប់រំ អង្គការយូណេស្កូ កម្មវិធី GPE និងអង្គការយូនីសេហ្វ។
សេចក្តីប្រកាសព័ត៌មានបានឱ្យដឹងថា ព្រឹត្តិការណ៍នេះនឹងផ្តល់នូវលទ្ធផលសំខាន់ៗ ដើម្បីជូនដំណឹងដល់ការផ្ដោតអាទិភាពជាយុទ្ធ សាស្ត្រសម្រាប់ដាក់បញ្ចូលក្នុងកម្មវិធីថ្មី GPE 2025 ដើម្បីទ្រទ្រង់ និងបន្តពីសមិទ្ធផលសម្រេចបានដោយ GPE-3 ។
កម្មវិធី GPE-3 ត្រូវបានរៀបចំឡើងដើម្បីដោះស្រាយបញ្ហានៃលទ្ធផលសិក្សាទាបរបស់សិស្សដែលសិស្សមិនទទួលបានកម្រិតស្ទាត់ជំនាញផ្នែកភាសាខ្មែរ និងគណិតវិទ្យាដែលរំពឹងទុកទៅតាមកម្រិតថ្នាក់របស់ពួកគេសូម្បីតែនៅថ្នាក់ដំបូងក៏ដោយ។ កម្មវិធីនេះទទួលស្គាល់ថា គ្រូដែលបានត្រៀមខ្លួនជាស្រេច មានសមត្ថភាព និងមានទឹកចិត្តបន្តអភិវឌ្ឍវិជ្ជាជីវៈ គឺជាកត្តានៅកម្រិតសាលារៀនដ៏រឹងមាំបំផុតសម្រាប់ការកែលម្អការសិក្សារបស់សិស្សហើយអន្តរាគមន៍ ត្រូវបានបង្កើតឡើងស្របតាមអាទិភាពជាតិនៃការអភិវឌ្ឍគ្រូបង្រៀន។
ប្រភពដដែលបានឱ្យដឹងទៀតថា កម្មវិធីនេះ សម្រេចបាននូវគោលដែលអង្គការយូណេស្កូជាភ្នាក់ងារគ្រប់គ្រងហិរញ្ញប្បទាន របស់ខ្លួនតាមរយៈផ្នែកបំពេញគ្នាចំនួន ២សំណង “ផ្នែកថេរចំនួន ១៤,៤ លានដុល្លារអាមេរិក ដែលត្រូវបានគេស្គាល់ថាជាគម្រោងពង្រឹងកម្មវិធីអប់រំគ្រូ បង្រៀននៅកម្ពុជា (STEPCam) ហើយអង្គការយូនីសេហ្វគឺជាភ្នាក់ងារគ្រប់គ្រងជំនួយចំនួន ៦,២ លានដុល្លារអាមរិក"ផ្នែកអថេរ"។ តាមរយៈ STEPCam ប្រព័ន្ធថ្មីដំបូងគេបង្អស់ត្រូវបានបង្កើតឡើងនិងណែនាំនៅក្នុងប្រព័ន្ធអប់រំរបស់កម្ពុជា។
លោក Sardar Umar Alam តំណាងអង្គការយូណេស្កូប្រចាំកម្ពុជា ថ្លែងថា៖ «សមិទ្ធផលរួមគ្នារបស់យើងតាមរយៈ STEPCam ក្រោមការគាំទ្រថវិកាពី GPE-3 គឺអាចធ្វើទៅបានដោយមានការដឹកនាំដ៏រឹងមាំរបស់ក្រសួងអប់រំ យុវជន និងកីឡា កិច្ចខិតខំប្រឹងប្រែងរបស់នាយកដ្ឋានបច្ចេកទេសសំខាន់ៗទាំងអស់ និងការគាំទ្របន្ថែមដែលផ្តល់ដោយដៃគូអភិវឌ្ឍន៍ និងដៃគូវិស័យឯកជន»។
លោកបន្តថា អង្គការយូណេស្កូ មានមោទនភាពដែលបានជួយដល់ការអភិវឌ្ឍគ្រូបង្រៀននៅកម្ពុជា។ តាមរយៈ STEPCam យើងបានផ្តល់ឱ្យគ្រូបង្រៀននៅក្នុងប្រទេសកម្ពុជានូវលទ្ធភាពទទួលបានការអភិវឌ្ឍវិជ្ជាជីវៈនិងបានរួមចំណែកក្នុងការធ្វើឱ្យប្រសើរឡើងនូវស្ថានភាពវិជ្ជាជីវៈ និងលក្ខខណ្ឌការងាររបស់ពួកគេ។
លោកបញ្ជាក់ថា៖«ជាមួយនឹងគ្រូដែលមានការទទួលស្គាល់ មានសមត្ថភាព មានការលើកទឹកចិត្ត និងការគាំទ្រ ដែលមានចំណេះដឹងនិងជំនាញត្រឹមត្រូវ យើងអាចធានាថាសិស្សានុសិស្សក្នុងប្រទេសកម្ពុជាទទួលបានការអប់រំប្រកបដោយគុណភាពសម្រាប់ការរៀនសូត្រ និងការអភិវឌ្ឍរបស់ពួកគេ» ។
លោកបានលើកឡើងថា "ផ្នែកអថេរ" ជាផ្នែកមួយនៃជំនួយ GPE3 គាំទ្រដល់ការលើកកម្ពស់សមធម៌ ប្រសិទ្ធភាព និងលទ្ធផលសិក្សាត្រូវបានគ្រប់គ្រងដោយអង្គការយូនីសេហ្វតាមរយៈមូលនិធិភាពជាដៃគូសម្រាប់អភិវឌ្ឍសមត្ថភាពវិស័យអប់រំ(CDPF|| ភាពជាដៃគូរវាង EU, USAID, Sida, GPE and UNICEF)។
លោកថា ដើម្បីបំពេញបន្ថែមលើការងារក្រោម "ផ្នែកថេរ” ការ ផ្តល់ហិរញ្ញប្បទានដល់ផ្នែកអថេរគឺអាស្រ័យលើការសម្រេចបាននូវសូចនាករដែលបានព្រមព្រៀងគ្នាដោយជំរុញឱ្យមានការប្រមូលផ្តុំកិច្ចខិតខំប្រឹងប្រែងដើម្បីធ្វើឱ្យប្រសើរឡើងនូវលទ្ធផលមួយចំនួនក្នុងវិស័យអប់រំរួមមាន៖ការពង្រឹងប្រព័ន្ធ និងកាអនុវត្តកម្មវិធីអាហារូបករណ៍ ការផ្តល់បច្ចេកទេសដល់ការបង្រៀនថ្នាក់ដំបូងនិងការពង្រឹងសមត្ថភាពនាយកសាលាក្នុងការរៀបចំនិងអនុវត្តផែនការអភិវឌ្ឍន៍សាលារៀន និងផែនការថវិកា។
លោកបន្ថែមថា ការផ្តល់ហិរញ្ញប្បទានដោយផ្អែកលើលទ្ធផលនេះ គឺជារឿងថ្មីសន្លាងសម្រាប់ប្រទេសកម្ពុជា ក៏ដូចជា ក្រសួងអប់រំ យុវជន និងកីឡា។ ហេតុនេះមេរៀនសំខាន់ៗមួយចំនួនត្រូវបានសិក្សាក្នុងដំណើរការអនុវត្តកម្មវិធី រួមទាំងការបង្កើតសូចនាករឱ្យសមស្រប ដំណើរការត្រួតពិនិត្យ និងផ្ទៀងផ្ទាត់របាយការណ៍ ហើយនិងយន្តការបញ្ចេញថវិកាឱ្យបានសមស្របបំផុត។
ការផ្តល់ហិរញ្ញប្បទាន "ផ្នែកអថេរ" តាមរយៈ CDPF បានរួមចំណែកគាំទ្រដល់ការសម្រេចបាននូវកំណែទម្រង់សំខាន់ៗនិង អាទិភាពដែលមានចែងក្នុងផែនយុទ្ធសាស្ត្រការវិស័យអប់រំ(ESP)ជាពិសេសលើការពង្រីកការរៀនថ្នាក់ដំបូង ការពិនិត្យកម្មវិធីអាហារូបករណ៍ឡើងវិញ និងការគាំទ្រដល់ការឆ្លើយតបនឹងជំងឺកូវីដ ១៩។
លោក Anirban Chatterjee នាយកស្ដីទីអង្គការយូនីសេហ្វប្រចាំប្រទេសកម្ពុជាបានថ្លែងថា៖ការផ្តល់ហិរញ្ញប្បទានផ្អែកលើលទ្ធផលត្រូវបានអនុវត្តយ៉ាងល្អនៅក្នុងប្រទេសកម្ពុជាក្រោមការដឹកនាំដ៏ល្អរបស់ក្រសួងអប់រំយុវជន និងកីឡា ហើយវាបានបង្ហាញពីសមត្ថភាពបច្ចេកទេសរបស់ក្រសួងក្នុងការរៀបចំផែនការអនុវត្ត និងតាមដានសកម្មភាពសំខាន់ៗរបស់កម្មវិធី។
លោកថ្លែងថា៖ «យូនីសេហ្វ តាមរយៈ CDPF មានក្តីសោមនស្សរីករាយដែលបានធ្វើការយ៉ាងជិតស្និទ្ធជាមួយក្រសួងអប់រំយុវជន និងកីឡាលើការងារមួយចំនួនធំ ដោយរួមទាំងគម្រោង GPE3 ដើម្បីពង្រឹងកម្មវិធីអាហារូបករណ៍ ការសិក្សាថ្នាក់ដំបូង និងការឆ្លើយតបនឹងជំងឺកូវីដ ១៩ ដើម្បីធានាឱ្យបានថាកុមារទាំងអស់ អាចទទួលបានការអប់រំប្រកបដោយគុណភាព និងរៀន»។
លោកបន្តថា ភាពជោគជ័យរបស់ GPE-3 ត្រូវបានទទួលស្គាល់យ៉ាងខ្លាំងពីសំណាក់ GPE ដោយបានជ្រើសរើសប្រទេសកម្ពុជា កាលពីដើមឆ្នាំនេះ ជាប្រទេសដំបូងគេនៅក្នុងតំបន់អាស៊ីប៉ាស៊ីហ្វិកដែលត្រូវបានបង្ហាញជាប្រទេសជោគជ័យក្នុងការអភិវឌ្ឍគ្រូបង្រៀន និងចែករំលែកសមិទ្ធផល និងមេរៀនជាមួយប្រទេសផ្សេងៗទៀត។
លោកបញ្ជាក់ថា៖ «លទ្ធផលទាំងនេះ គឺជាសក្ខីភាពមួយចំពោះភាពជាដៃគូដ៏យូរអង្វែងដែលបានបង្កើតឡើងរវាងប្រទេសកម្ពុជា និង GPE ដោយមានការគាំទ្រពីអង្គការយូណេស្កូ និងយូនីសេហ្វ ដើម្បីពន្លឿនវឌ្ឍនភាពផ្នែកអប់រំនៅកម្ពុជា»។
លោក ហង់ជួន ណារ៉ុន រដ្ឋមន្ត្រីក្រសួងអប់រំយុវជន និងកីឡា បានថ្លែងបានអំណរគុណ និងវាយតម្លៃខ្ពស់ចំពោះក្រុមការងារអនុវត្តកម្មវិធី ព្រមទាំងអង្គការយូណេស្កូ និងអង្គការយូនីសេហ្វ ដែលជាភ្នាក់ងារគ្រប់គ្រងការអនុវត្ត បានសហការគ្នាយ៉ាងជិតស្និទ្ធធ្វើឱ្យសម្រេចលទ្ធផលគួរឱ្យកត់សម្គាល់។
លោកថ្លែងថា៖ «លទ្ធផល និងឧត្តមានុវត្តន៍កម្មវិធីមូលនិធិភាពជាដៃគូសកលដំណាក់កាលទី៣ នេះ ពិតជាបានរួមចំណែកដល់សមិទ្ធផលទាំងមូលរបស់ក្រសួងអប់រំយុវជន និងកីឡា ដោយបានឆ្លើយតបទៅនឹងការអនុវត្តអាទិភាពកំណែទម្រង់របស់ក្រសួងបានដាក់ចេញ»។
លោករដ្ឋមន្ត្រីក្រសួងអប់រំបន្តថា ការអភិវឌ្ឍសមត្ថភាពគ្រូបង្រៀនជាអាទិភាពចម្បងនិងនៅតែជាអាទិភាពរបស់ក្រសួងសម្រាប់បណ្តាឆ្នាំខាងមុខ។ឧត្តមានុវត្តន៍ទាំងនេះជាការបង្ហាញឱ្យឃើញពីការប្រែប្រួលដ៏ល្អនៃប្រព័ន្ធអប់រំនិងជាម៉ូដែលអាចត្រូវពិនិត្យពិចារណាយកទៅបន្តអនុវត្តឬក្លាយជាមូលដ្ឋានសម្រាប់គម្រោង និង កម្មវិធីដែលនឹងត្រូវអនុវត្តនៅពេលខាងមុខ។
តាមរយៈការអនុវត្តរយៈពេល ៤ ឆ្នាំ ក្រោមការគាំទ្រថវិកាពី GPE-3 ក្រសួងអប់រំ យុវជន និងកីឡា រួមជាមួយអង្គការយូណេស្កូ និងយូនីសេហ្វបានជំរុញការអភិវឌ្ឍគ្រូបង្រៀនដើម្បីធ្វើបរិវត្តកម្មការបង្រៀន និងការរៀននៅក្នុងថ្នាក់រៀន។ អន្តរាគមន៍នេះក៏រួមចំណែកដល់ការលើកកម្ពស់ស្ថានភាពវិជ្ជាជីវៈនិងលក្ខខណ្ឌការងារទូទៅរបស់គ្រូបង្រៀននៅកម្ពុជានិងធានាថា ពួកគេត្រូវបានគាំទ្រក្នុងការអភិវឌ្ឍវិជ្ជាជីវៈរបស់ពួកគេ។
លោកថ្លែងថា៖ «កត្តាទាំងនេះមានសារៈសំខាន់ក្នុងការទាក់ទាញបេក្ខភាពពូកែៗ មានសមត្ថភាព និងមានទឹកចិត្តបំពេញការងារបំផុតនៅក្នុងប្រទេសឱ្យចូលរួមក្នុងវិជ្ជាជីវៈគ្រូបង្រៀន»។
លោក ណាត ប៊ុនរឿន រដ្ឋលេខាធិការក្រសួងអប់រំ យុវជន និងកីឡា និងជានាយកគម្រោង GPE-3 ថ្លែងថា នៅពេលដែលប្រទេសកម្ពុជាឈានទៅដំណាក់កាលបន្ទាប់នៃ GPE 2025 សម្ទុះដែលបង្កើតបានតាមរយៈGPE-3ដើម្បីលើកកម្ពស់ការអភិវឌ្ឍគ្រូបង្រៀន និងការអប់រំប្រកបដោយគុណភាព ចាំបាច់ត្រូវបន្តឱ្យមាននិរន្តរភាព និងពង្រីកការអនុវត្តបន្ថែមទៀត។
លោកមានប្រសាសន៍ថា៖ «យើងសម្រេចបានលទ្ធផលជាវិជ្ជមានជាច្រើននៅក្នុងរយៈពេល ៤ ឆ្នាំនៅក្នុងគម្រោងង GPE-3 ក្នុងការជំរុញការអភិវឌ្ឍគ្រូបង្រៀន។ ឥឡូវនេះជំហានទៅមុខគឺយើងគួរយកឧត្តមានុវត្តន៍របស់គម្រោង GPE-3 ទៅអនុវត្តបន្តទៀត» ។
បើតាមលោក ណាត ប៊ុនរឿន ការវិនិយោគថ្មីនឹងធានាថា អន្តរាគមន៍ដែលដាក់ឱ្យប្រើប្រាស់តាមរយៈ GPE-3 អាចត្រូវបានពង្រីកជាលំដាប់រហូតទូទាំងប្រទេស ហើយគ្រូបង្រៀននៅកម្ពុជាត្រូវបានបន្តការគាំទ្រដើម្បីកែលម្អគរុកោសល្យ និងជំនាញ ICT របស់ពួកគេដើម្បីគាំទ្រដល់ការសិក្សា និងការអភិវឌ្ឍផ្ទាល់ខ្លួនរបស់កុមារទាំងអស់នៅកម្ពុជា៕