ភ្នំពេញៈ ក្រសួងសាធារណការ និងដឹកជញ្ជូន និងក្រុមហ៊ុនផ្លូវល្បឿនលឿនភ្នំពេញ-ព្រះសីហនុ ពិភាក្សាគ្នាបន្ថែម ដើម្បីធ្វើឱ្យប្រសើរឡើង លើការគ្រប់គ្រងតាមច្រកចេញចូលលើផ្លូវនេះឱ្យកាន់តែលឿនរហ័ស និងកាត់បន្ថយការកកស្ទះ ខណៈអត្រារថយន្តបើកបរតាមផ្លូវជាតិលេខ ៤ មានការថយចុះគួរឱ្យគត់សម្គាល់។
កាលពីថ្ងៃទី ១៦ ខែវិច្ឆិកា លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានជួបពិភាក្សាជាមួយលោក Zhou Yang អគ្គនាយកក្រុមហ៊ុនសាជីវកម្មស្ពានថ្នល់ចិន និងលោក Mo Kun អគ្គនាយកក្រុមហ៊ុនផ្លូវល្បឿនលឿនភ្នំពេញព្រះសីហនុ ដើម្បីពិនិត្យពិភាក្សាលើវិធីធ្វើឱ្យប្រសើរឡើងលើការគ្រប់គ្រងការចេញចូលផ្លូវល្បឿនលឿនភ្នំពេញ-ក្រុងព្រះសីហនុ។
ក្នុងឱកាសនោះ ភាគីទាំង ២ បានផ្តោតសំខាន់ទៅលើការធានាលំហូរយានយន្តចូលចេញ ដែលកន្លងទៅតម្រូវឱ្យបង់ជាសាច់ប្រាក់នៅគ្រប់គន្លងច្រកចេញពីផ្លូវល្បឿនលឿន ជាបច្ច័យអាចធ្វើឱ្យការកកស្ទះ នៅពេលមានតម្រូវការចរាចរណ៍ខ្ពស់ ជាពិសេសថ្ងៃបុណ្យទាន និងថ្ងៃឈប់សម្រាកនានា។
ក្នុងនោះភាគីទាំង ២ ក៏បានលើកយកបញ្ហាប្រឈមមួយចំនួនដែលបានកើតឡើងក្នុងរយៈពេល ២ សប្តាហ៍កន្លងទៅ និងពិភាក្សាលើដំណោះស្រាយថ្មីតាមប្រព័ន្ធបច្ចេកវិទ្យា DIP អនុញ្ញាតឱ្យបញ្ចូលប្រាក់តាមស្លាកលេខមុនចូលប្រើប្រាស់ផ្លូវល្បឿនលឿន ដែលបានប្រកាសដាក់ឱ្យសាកល្បងកាលពីថ្ងៃទី ១៤ វិច្ឆិកា ២០២២ កន្លងទៅ។ នេះបើតាមការអះអាងរបស់ក្រសួងសាធារណការ និងដឹកជញ្ចូន។
លោក ស៊ុន ចាន់ថុល បាននិយាយថា ប្រព័ន្ធបច្ចេកវិទ្យា DIP គឺជាគំនិតផ្តួចផ្តើមមួយ ត្រូវបានដាក់ចេញ ដើម្បីធានាការធ្វើអាជីវកម្មរបស់ក្រុមហ៊ុន កាន់តែមានតម្លាភាព ក្នុងការគ្រប់គ្រងការងារផ្តល់សេវាប្រើប្រាស់ផ្លូវ ការកត់ត្រាការប្រមូលចំណូលសម្រាប់ការបង់ពន្ធជូនរាជរដ្ឋាភិបាល ឱ្យបានត្រឹមត្រូវ។
លោកបានបញ្ជាក់ថា៖ «ប្រព័ន្ធនេះ ក៏នឹងធានាឱ្យការធ្វើដំណើរកាន់តែមានសុវត្ថិភាពខ្ពស់ កាត់បន្ថយគ្រោះថ្នាក់ចរាចរណ៍ និងទទួលបានសេវាប្រើប្រាស់ផ្លូវបានលឿនរហ័ស ចៀសផុតពីជំងឺកូវី ១៩ កាត់បន្ថយភាពស្មុគស្មាញ និងកាត់បន្ថយការរង់ចាំយូរដែលបណ្តាលមកពីការកកស្ទះចរាចរណ៍ជាដើម»។
ជាមួយគ្នានោះលោក ស៊ុន ចាន់ថុល ក៏បានណែនាំឱ្យភាកីក្រុមហ៊ុនធ្វើការយកចិត្តទុកដាក់ លើការបណ្តុះបណ្តាលបុគ្គលិកនៅតាមច្រកចូលចេញឱ្យមានសមត្ថភាពគ្រប់គ្រាន់ក្នុងការបំពេញការងារឱ្យបានលឿនរហ័ស លើការកាត់ទឹកប្រាក់ពីក្នុងស្លាកលេខ ព្រមទាំងមានសមត្ថភាពដោះស្រាយបញ្ហាជូនអ្នកធ្វើដំណើរ ក្នុងពេលបំពេញភារកិច្ចការងាររបស់ខ្លួន។
ដើម្បីឱ្យការចេញពីផ្លូវបានលឿនរហ័ស អគ្គនាយកដ្ឋានបច្ចេកវិទ្យា និងទំនាក់ទំនងសាធារណៈ បានសហការរួមគ្នាជាមួយក្រុមហ៊ុនផ្លូវល្បឿនលឿន បានសម្រួលផ្តល់លទ្ធភាពឱ្យអ្នកបើកបរ អាចធ្វើការបញ្ចូលសមតុល្យទឹកប្រាក់ជាមុនទៅក្នុងស្លាកលេខសម្គាល់យានយន្ត មុនចូលប្រើប្រាស់ផ្លូវល្បឿនលឿន។ ក្រសួងបានអះអាងថា នេះគឺជាផ្នែកមួយនៃ ប្រព័ន្ធបច្ចេកវិទ្យា DIP របស់ក្រសួង។
ការបញ្ចូលទឹកប្រាក់ក្នុងស្លាកលេខ ជាមុន (Prepaid License Plate Top-Up) ត្រូវបានផ្តល់លទ្ធភាពឱ្យធ្វើតាមកម្មវិធីទូរស័ព្ទដៃទូទាត់ប្រាក់អេឡិចត្រូនិក (Mobile Banking) ឬបញ្ជរបង់ប្រាក់របស់គ្រឹះស្ថានហិរញ្ញវត្ថុ និងធនាគារដៃគូ របស់ក្រសួងសាធារណការ និងដឹកជញ្ជូន។
លោក Zhou Yang អគ្គនាយកក្រុមហ៊ុនសាជីវកម្មស្ពានថ្នល់ចិន បាននិយាយថា គិតត្រឹមថ្ងៃទី ១៦ វិច្ឆិកា ឆ្នាំ ២០២២ មានគ្រឹះស្ថានដៃគូចំនួន ០៥ ដែលដែលត្រូវអនុញ្ញាតឱ្យបញ្ចូលទឹកប្រាក់ក្នុងស្លាកលេខសម្គាល់យានយន្ត។ លោកថា គ្រឹះស្ថានទាំងនោះ មានដូចជាធនាគារ ជីបម៉ុង (Chip Mong Bank),ធនាគារ អេស៊ីលីដា (ACLEDA Bank), ធនាគារ វឌ្ឍនៈអាស៊ីចំកាត់ (ABA Bank),ធនាគារវីង (Wing Bank) និងធនាគារ វឌ្ឍនៈ (VATTANAC Bank)។
លោកZhou Yang បានបញ្ជាក់ថា៖ «ធនាគារមួយចំនួនទៀត នឹងត្រូវបានអនុញ្ញាតឱ្យចូលរួមក្នុងគំនិតផ្តួចផ្តើមនេះ ក្នុងពេលដ៏ខ្លីខាងមុខ។ ការបញ្ចូលទឹកប្រាក់ក្នុងស្លាកលេខ គឺត្រូវបានអនុញ្ញាតសម្រាប់គ្រប់យានយន្ត បើទោះជាយានយន្តនោះ មិនបានចុះឈ្មោះបំពាក់ឧបករណ៍ OBU ក្តី»។
ផ្លូវល្បឿនលឿនភ្នំពេញ-ក្រុងព្រះសីហនុ ចាប់ផ្តើមគិតតម្លៃសេវាចាប់ពីថ្ងៃទី ១ ខែវិច្ឆិកា ឆ្នាំ ២០២២ ដែលការបង់ប្រាក់នឹងត្រូវធ្វើឡើងតាមចម្ងាយជាក់ស្តែងអាស្រ័យលើការធ្វើដំណើររបស់យានយន្តទាំងនោះ ខណៈក្នុងចម្ងាយ ១៨៧,០៥ គីឡូម៉ែត្រ សម្រាប់រថយន្តលក្ខណៈគ្រួសារត្រូវចំណាយប្រមាណ ១២ ដុល្លារអាមេរិក។
យោងតាមការអះអាងរបស់ក្រសួងសាធារណការ និងដឹកជញ្ចូន បើទោះជាផ្លូវនេះ ត្រូវបានបើកឱ្យប្រើប្រាស់ដោយគិតថ្លៃសេវា ក៏ក្នុង ១ ថ្ងៃៗ មានយានយន្តចន្លោះជាង ១ ម៉ឺនគ្រឿង ទៅជិត២ម៉ឺនគ្រឿងបានធ្វើដំណើរឆ្លងកាត់។ ការធ្វើដំណើរឆ្លងកាត់លើកផ្លូវល្បឿនលឿននេះ គឺជាមូលហេតុធ្វើឱ្យការធ្វើចរាចរណ៍ឆ្លងកាត់តាមផ្លូវជាតិលេខ ៤
មានការថយចុះស្ទើរពាក់កណ្តាល។ នេះបើតាមការអះអាងរបស់លោក វ៉ី សំណាង អភិបាលខេត្តកំពង់ស្ពឺ។
លោក វ៉ី សំណាង បានប្រាប់ ភ្នំពេញ ប៉ុស្តិ៍ថា៖«ការងាកទៅប្រើប្រាស់ផ្លូវល្បឿនលឿនព្រោះវាចំណេញពេលវេលាសម្រាប់ពួកគាត់ បើទោះជាពួកគាត់ចំណាយថវិការបង់ទៅលើសេវា។ អ្វីដែលពលរដ្ឋមួយចំនួន គាត់នៅតែប្រើប្រាស់ផ្លូវជាតិលេខ ៤ គឺមានមូលហេតុផ្សេងៗទីគាត់ អាចមានលំនៅនៅតាមបណ្តាយផ្លូវជាតិលេខ ៤។ ទី២ ព្រោះផ្លូវនេះ គឺជាមធ្យោបាយរួមដែលភាគច្រើន គឺជាអ្នករត់តាក់ស៊ី និងរថយន្តដឹកទំនេញជាដើម»។
បន្ថែមពីនេះលោក វ៉ី សំណាង បានអះអាងថា ក្រោយពីផ្លូវល្បឿនលឿនបានបើកដំណើរការ ចំពោះអាជីវកម្មមួយចំនួន ក៏បានបាត់បង់ចំណូលមួយផ្នែកតាមរយៈការទានផលប្រយោជន៍ពីអ្នកធ្វើដំណើរនៅតាមផ្លូវជាតិលេខ ៤ ផងដែរ។ ប៉ុន្តែ យល់ថា បញ្ហានេះ គឺមិនបង្កផលប៉ះពាល់ធ្ងន់ធ្ងរដល់ពលរដ្ឋនោះទេ។
លោកបានបញ្ជាក់ថា៖«សំខាន់យើងគិតប្រយោជនធំរួម ហើយផលប៉ះពាល់នេះ គឺដំបូងៗពលរដ្ឋមិនអាចទទួលយកបានទេ។ ប៉ុន្តែបច្ចុប្បន្ននេះ យើងមើលឃើញថា អ្នកប្រើប្រាស់ផ្លូវជាតិលេខ ៤ ពីមុន គឺគាត់នៅតែបន្តប្រើដដែល គ្រាន់តែកាត់បន្ថយជាងមុន ហើយការបាត់បង់ភ្ញៀវទេសចរគឺមិនប៉ុន្មាន»៕