ភ្នំពេញៈ រដ្ឋបាលសាលារាជធានីភ្នំពេញជូនដំណឹងថា នៅយប់ថ្ងៃទី ២១ និងទី ៣០ ខែវិច្ឆិកា នឹងមានការអុជកាំជ្រួច ដើម្បីសាទរពិធីបើក និងបិទការប្រកួតកីឡាជាតិលើកទី៣ នៅពហុកីឡដ្ឋានជាតិមរតកតេជោ ស្ថិតនៅភូមិព្រែកតារ័ត្ន សង្កាត់ព្រែកតាសេក ខណ្ឌជ្រោយចង្វារ។
សេចក្តីជូនដំណឹងរបស់រដ្ឋបាលសាលារាជធានីភ្នំពេញ នៅថ្ងៃទី ១៨ ខែវិច្ឆិកាបានឱ្យដឹងថា ក្រសួងអប់រំ យុវជន និងកីឡា សហការជាមួយគណៈកម្មាធិការជាតិអូឡាំពិកកម្ពុជា គណៈកម្មាធិការជាតិ ប៉ារ៉ាឡាំពិកកម្ពុជា សហព័ន្ធកីឡាជាតិ និងស្ថាប័នពាក់ព័ន្ធ នឹងរៀបចំពិធីបើកការប្រកួតកីឡាជាតិលើកទី៣ នាថ្ងៃទី ២១ ខែវិច្ឆិកា ឆ្នាំ ២០២២ និងពិធីបិទនាថ្ងៃទី ៣០ ខែវិច្ឆិកា ឆ្នាំ ២០២២ នៅពហុកីឡដ្ឋានជាតិមរតកតេជោ ដែលស្ថិតនៅភូមិព្រែកតារ័ត្ន សង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ។
រដ្ឋបាលរាជធានីភ្នំពេញបញ្ជាក់ថា៖ «ដើម្បីអបអរសាទរក្នុងព្រឹត្តិការណ៍ខាងលើនេះ ក្រសួងអប់រំ យុវជន និងកីឡា នឹងមានការចាត់តាំង អុជកាំជ្រួចនាថ្ងៃទី ២១ និងថ្ងៃទី ៣០ ខែវិច្ឆិកា ឆ្នាំ ២០២២ វេលាម៉ោង ១៩:០០ នាទី នៅពហុកីឡដ្ឋានជាតិ មរតកតេជោ។ អាស្រ័យហេតុនេះ សូមជម្រាបជូនសាធារណជនទាំងអស់ ក្នុងរាជធានីភ្នំពេញ មេត្តាជ្រាបជាព័ត៌មាន»។
អាជ្ញាធររាជធានីភ្នំពេញ បានបញ្ជាក់ប្រាប់ទៅ ស្នងការដ្ឋាននគរបាលរាជធានីភ្នំពេញ បញ្ជាការដ្ឋានកងរាជអាវុធហត្ថរាជធានីភ្នំពេញ រដ្ឋបាលខណ្ឌទាំង ១៤ និងអាជ្ញាធរពាក់ព័ន្ធគ្រប់លំដាប់ថ្នាក់ ត្រូវធ្វើការផ្សព្វផ្សាយឱ្យបាន ទូលំទូលាយ និងចាត់តាំងអនុវត្តឱ្យមានប្រសិទ្ធភាពខ្ពស់៕