.jpg)
ភ្នំពេញៈ កសិករនៅខេត្តបាត់ដំបង និងខេត្តបន្ទាយមានជ័យ មានចិត្តសប្បាយរីករាយ និងបានសហការលក់ស្រូវទៅតាមតម្លៃដែលបានកំណត់ ហើយមកទល់ពេលនេះរោងម៉ាស៊ីននៅតែបន្តប្រមូលទិញយ៉ាងសស្រាក់សស្រាំ។
នេះបើតាមការលើកឡើងរបស់លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ដែលបង្ហោះលើបណ្តាញសង្គមហ្វេសប៊ុកនៅយប់ថ្ងៃទី ១៨ ខែវិច្ឆិកា។ តាមរយៈហ្វេសប៊ុកលោករដ្ឋមន្ត្រីកសិកម្មសរសេរថា ៖«កសិករនៅខេត្តទាំងពីរមានចិត្តសប្បាយរីករាយ និងបានសហការលក់ស្រូវទៅតាមតម្លៃដែលបានកំណត់ ហើយមកទល់ពេលនេះរោងម៉ាស៊ីននៅតែបន្តប្រមូលទិញយ៉ាងសស្រាក់សស្រាំ។ ក្រុមការងារនៅតែបន្តតាមដានយកចិត្តទុកដាក់ដោយមិនឱ្យប្រជាកសិករយើងបាត់បង់ប្រយោជន៍ដោយគ្មានហេតុផលនោះឡើយ»។
តាមរយៈវីដេអូឃ្លីបដែលបង្ហោះដោយលោករដ្ឋមន្ត្រីក្រសួងកសិកម្មបានបង្ហាញពីសំឡេងកសិករម្នាក់ បានធ្វើការថ្លែងអំណរគុណដល់រដ្ឋមន្ត្រីក្រសួងកសិកម្ម ព្រមទាំងមន្ត្រីមន្ទីរកសិកម្ម និងអ្នកសារព័ត៌មាន ដែលបានជួយនិងផ្សព្វផ្សាយពីការត្អូញត្អែររបស់ប្រជាកសិករ។
កសិករម្នាក់នេះបញ្ជាក់ថា៖ «បងប្អូនកសិករកំពុងតែមមាញឹកយកស្រូវមកលក់នៅសាលាឃុំទ្រាសបានតម្លៃសមរម្យដូចការរំពឹងទុករបស់ពួកគាត់ពិតមែន។ គោរពអរគុណដល់ឯកឧត្តមនិងមន្ទីរក្រសួងកសិកម្មទាំងអស់ដែលបានធ្វើតាមការសន្យា»។
អភិបាលខេត្តបន្ទាយមានជ័យ លោក អ៊ុំ រាត្រី បានឱ្យដឹងថា គោលការណ៍ទិញស្រូវនៅក្នុងខេត្តបន្ទាយមានជ័យ ត្រូវបានអនុវត្តដូចគ្នាទៅនឹងខេត្តបាត់ដំបងដែរ ដោយក្នុងនោះ ១ គីឡូក្រាម តម្លៃមិនក្រោម ១ ០៤០ រៀល សម្រាប់ស្រូវផ្ការំដួល ប្រភេទលេខ ១ (ស្រូវសើម)។
អភិបាលខេត្តបន្ទាយមានជ័យបានឱ្យដឹងទៀតថា នៅក្នុងខេត្តបន្ទាយមានជ័យ ស្រូវដែលប្រជាកសិករកំពុងប្រមូលផលនេះ មានប្រមាណ ១០ ម៉ឺនហិកតា។ ដែលមកដល់ពេលនេះប្រមូលអស់ប្រមាណ ២ ម៉ឺនហិកតាហើយ នៅសល់ ៧ ទៅ ៨ ម៉ឺនហិកតាទៀត។
លោកបញ្ជាក់ទៀតថា ក្រុមការងារចម្រុះខេត្តដែលមានខាងកសិកម្មខេត្ត ពាណិជ្ជកម្មខេត្ត អាជ្ញាធរមូលដ្ឋាន ក្រុមហ៊ុនបៃតង បាននឹងកំពុងជួយសម្របសម្រួលជាប្រចាំជាមួយឈ្មួញ និងប្រជាកសិករ តាមគោលដៅដែលបានរៀបចំ។
លោកបានឱ្យដឹងថា យោងតាមសេចក្តីប្រកាសព័ត៌មានរបស់ក្រសួងកសិកម្ម បានឱ្យដឹងថា នៅថ្ងៃទី ១៧ ខែវិច្ឆិកា ឆ្នាំ ២០២២ ក្រុមការងារបានជួបជាមួយភាគីពាក់ព័ន្ធ រួមមាន លោកឧកញ៉ា ភូ ពុយ អគ្គនាយកនៃរោងម៉ាស៊ីនកិនស្រូវបៃតង លោក ឃ្លោក នួយ អភិបាលរងខេត្តបន្ទាយមានជ័យ តំណាងមន្ទីរកសិកម្ម រុក្ខាប្រមាញ់ និងនេសាទ តំណាងមន្ទីរពាណិជ្ជកម្ម តំណាងធនាគារអភិវឌ្ឍន៍កសិកម្ម និង ជនបទ លោក លោកស្រីអភិបាលស្រុក មេឃុំតំណាង រោងម៉ាស៊ីនកិនស្រូវ និងអ្នកប្រមូលទិញស្រូវផ្គត់ផ្គង់ទៅរោងម៉ាស៊ីនកិនស្រូវ។
ជាលទ្ធផល ក្រោយកិច្ចប្រជុំដើម្បីធានាស្ថិរភាពតម្លៃស្រូវ លោកឧកញ៉ា ភូ ពុយ បានសម្រេចប្រកាសកំណត់យកថ្លៃគោល សម្រាប់ស្រូវផ្ការំដួលប្រភេទលេខ១ (ស្រូវសើម) មិនក្រោម៩បាត ក្នុង ១ គីឡូក្រាម ឬ ១ ០៤០រៀល ក្នុង ១ គីឡូក្រាម នៅនឹងកន្លែងដូចនៅខេត្តបាត់ដំបងដែរ និងបានអំពាវនាវដល់ម្ចាស់រោងម៉ាស៊ីនកិនស្រូវ និងឈ្មួញប្រមូលទិញស្រូវ ក្នុងខេត្តបន្ទាយមានជ័យ ឱ្យចុះប្រមូលទិញ ដោយអនុវត្តតាមថ្លៃដែលបានកំណត់ ចាប់ពីរសៀលថ្ងៃ ទី ១៧ ខែវិច្ឆិកា ឆ្នាំ ២០២២ នេះទៅ។
លោកបញ្ជាក់ថា៖ «ការអនុវត្ដនឹងចាប់ផ្តើមពីគោលដៅចំនួន៨ទីតាំង រួមមាន៖ ១ ទីតាំងនៅ ស្រុកភ្នំស្រុក ១ ទីតាំង នៅស្រុកព្រះនេត្រព្រះ ៣ ទីតាំងនៅស្រុកស្វាយចេក និង ៣ ទីតាំងនៅស្រុកថ្មពួក»។
ប្រភពដដែលបន្ថែមថា ប្រជាកសិករគ្រប់គោលដៅទាំងអស់ បានសាទរទៅនឹងការអនុវត្តថ្លៃគោលនេះ។ ក្នុងករណីមានបញ្ហាអ្នកទិញអនុវត្តមិនត្រឹមត្រូវ សូមប្រជាកសិករមេត្តាទាក់ទងជាមួយមេឃុំ ឬមន្ទីរកសិកម្ម រុក្ខាប្រមាញ់ និងនេសាទខេត្តបន្ទាយមានជ័យ តាមរយៈទូរស័ព្ទលេខ ០១២ ៨៣៨ ៩៣៧ ដើម្បីទទួលបានការអន្តរាគមន៍៕
