ក្រសួងអប់រំ យុវជន និងកីឡា នឹងរៀបចំសន្និសីទសារព័ត៌មានមួយ ដើម្បីផ្ដល់ព័ត៌មានពិស្ដារអំពីដំណើរការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប សម័យប្រឡង ៥ ធ្នូ ២០២២។ បើតាមសេចក្ដីប្រកាសព័ត៌មានរបស់ក្រសួងអប់រំ សន្និសីទសារព័ត៌មាននេះ នឹងរៀបចំធ្វើនៅថ្ងៃចន្ទ ទី២១ ខែវិច្ឆិកា ឆ្នាំ២០២២ នៅអគារទីស្ដីការក្រសួងអប់រំ ដោយមានលោក ហង់ជួន ណារ៉ុន រដ្ឋមន្ដ្រីក្រសួងអប់រំ យុវជន និងកីឡា និងថ្នាក់ដឹកនាំពាក់ព័ន្ធជាវាគ្មិន។
សូមរំឭកជូនថា ការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប ឆ្នាំសិក្សា ២០២១-២០២២ នេះ ត្រូវបានលើកពេល ២ដងរួចមកហើយ។ ដំបូងឡើយ ក្រសួងគ្រោងរៀបចំការប្រឡងនេះនៅថ្ងៃទី១៤ និង១៥ ខែវិច្ឆិកា ទៅថ្ងៃទី២១ និងថ្ងៃទី២២ ខែវិច្ឆិកា ដោយសារតែកម្ពុជាត្រូវធ្វើជាម្ចាស់ផ្ទះរៀបចំកិច្ចប្រជុំកំពូលអាស៊ាន លើកទី៤០ និង៤១ និងកិច្ចប្រជុំពាក់ព័ន្ធ នៅថ្ងៃទី១០ ដល់ថ្ងៃទី១៣ ខែវិច្ឆិកា។ លុះក្រោយមក គម្រោងរៀបចំការប្រឡងនៅថ្ងៃទី២១ និង២២ ខែវិច្ឆិកា ត្រូវលើកម្ដងទៀត ទៅធ្វើនៅថ្ងៃទី៥ និង៦ ខែធ្នូ ឆ្នាំ២០២២វិញ ដោយសារតែកម្ពុជាត្រូវរៀបចំព្រឹត្តិការណ៍ជាតិ និងព្រឹត្តិការណ៍តំបន់មួយចំនួន ដូចជា ព្រះរាជពិធីបុណ្យអុំទូក អកអំបុក និងសំពះព្រះខែ និងព្រឹត្តិការណ៍កីឡាជាតិលើកទី៣ នៅថ្ងៃទី២១ ដល់ថ្ងៃទី៣០ ខែវិច្ឆិកា។
ជុំវិញការលើកពេលប្រឡងម្ដងជាពីរដងនេះ លោក ហង់ជួន ណារ៉ុន រដ្ឋមន្ដ្រីក្រសួងអប់រំ យុវជន និងកីឡា បានពន្យល់ថា គឺជាការទុកពេលឱ្យសិស្សានុសិស្សមានពេលវេលាគ្រប់គ្រាន់ដើម្បីរៀនសូត្រ ព្រោះមិនមានការអនុញ្ញាតឱ្យសិស្សថ្នាក់ទី១២ ជាប់បាក់ឌុបដោយស្វ័យប្រវត្តិដូចឆ្នាំមុនឡើយ។
លោក ហង់ជួន ណារ៉ុន៖ «ការពន្យារពេលប្រឡង គឺដើម្បីឱ្យសិស្សមានពេលគ្រប់គ្រាន់ដើម្បីរៀន។ អ៊ីចឹងសំខាន់គាត់ត្រូវខំរៀន ហើយក្រសួងត្រូវរៀបចំឱ្យបានល្អ និងលើកទឹកចិត្តឱ្យសិស្សខំរៀន ដើម្បីកុំឱ្យគាត់បោះបង់ចោលការសិក្សា»។
ទន្ទឹមគ្នានេះ ក្រសួងអប់រំ យុវជន និងកីឡា ក៏បានកំណត់វិញ្ញាសាជម្រើស សម្រាប់ការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ៥ ធ្នូ ២០២២ ដោយរួមមាន ១.សម្រាប់ថ្នាក់វិទ្យាសាស្រ្ត មានប្រវត្តិវិទ្យា និង ២.សម្រាប់ថ្នាក់វិទ្យាសាស្រ្តសង្គម មាន ផែនដី និងបរិស្ថានវិទ្យា៕