.jpg)
កិច្ចប្រជុំនៃមន្ត្រី ប.ស.ស នាពេលកន្លងមក។ រូបថត ប.ស.ស
ភ្នំពេញៈ លោក អ៊ុក សមវិទ្យា ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. ណែនាំមន្ត្រីគ្រប់ជាន់ថ្នាក់របស់ខ្លួនឱ្យបន្តយកចិត្តទុកដាក់ពិនិត្យទៅលើសហគ្រាសខ្នាតតូច និងជំរុញឱ្យពួកគេមកចុះបញ្ជីក្នុង ប.ស.ស. ខណៈក្រុមហ៊ុនដែលជាប់កាតព្វកិច្ចបង់ភាគទានប្រាក់សោធនដែលជារបបមួយថ្មី មានភាពយឺតយ៉ាវក្នុងការបង់នៅខែដំបូង។
របបសន្តិសុខសង្គមផ្នែកប្រាក់សោធនសម្រាប់បុគ្គលទាំងឡាយដែលស្ថិតនៅក្រោមបទប្បញ្ញត្តិនៃច្បាប់ស្តីពីការងារ បានចាប់ផ្តើមអនុវត្តចាប់ពីខែតុលា ដែលគ្រប់ក្រុមហ៊ុន សហគ្រាស នឹងត្រូវបង់ភាគទានទាំងនេះកាត់ចេញពីប្រាក់ខែបុគ្គលិកចំនួន ២ ភាគរយ និងក្រុមហ៊ុនចំនួន ២ ភាគរយ ដើម្បីបង់ទៅបសស នៅដើមខែបន្ទាប់ ដែលការបង់ដំបូង អាចនឹងមានពេលបង់រហូតដល់ដើមខែវិច្ឆិកា។
ប៉ុន្តែយ៉ាងណារហូតមកដល់ថ្ងៃទី ២១ វិច្ឆិកានេះ នៅតែមានក្រុមហ៊ុនឯកជនមួយចំនួន មិនទាន់បំពេញកាតព្វកិច្ចចប់រួចរាល់ ដោយសារតែកត្តាបញ្ហាបច្ចេកទេសមួយចំនួន។ នេះបើតាមការអះអាងរបស់លោក ហេង សុផាន់ណារិទ្ធ អគ្គនាយករង ប.ស.ស.។
លោក សុផាន់ណារិទ្ធ បានប្រាប់ ភ្នំពេញ ប៉ុស្តិ៍ នៅថ្ងៃទី ២១ វិច្ឆិកាថា ការបង់ភាគទានប្រាក់សោធន គឺបានពន្យារពេលរហូតមកដល់ពេលនេះ ហើយវាអាចនឹងពន្យារពេលបន្តទៀតទៅដល់ក្រុមហ៊ុន សហគ្រាសដែលមិនទាន់បានបំពេញកាតព្វកិច្ច ដើម្បីឱ្យពួកគេមកបំពេញកាតព្វកិច្ចឱ្យបានរួចរាល់។
លោកបានបញ្ជាក់ថា៖ «សម្រាប់ប្រាក់ភាគទានផ្នែកសោធននេះ ដោយសារតែបញ្ហានេះ គឺជារឿងថ្មី ដែល ប.ស.ស. ទើបចាប់ផ្តើមប្រមូល ដែលធ្វើឱ្យសហគ្រាសមួយចំនួន មានការបង់យឺតយ៉ាវ។ កត្តានៃការបង់យឺតយ៉ាងនេះ ដោយសារតែក្រុមហ៊ុនសហគ្រាសទាំងនោះ រៀបចំឯកសារមិនទាន់ត្រូវដែលអាចនឹងលើកពេល ឬមិនធ្វើការពិន័យទៅគាត់ទេ ដោយសារតែយើងឱ្យគាត់ ពន្យារពេលបង់ ព្រោះដោយសារយើងទើបចាប់ផ្តើមដំណាក់កាលដំបូង គឺមានភាពយឺតយ៉ាវបន្តិច»។
ជាមួយនឹងភាពយឺតយ៉ាវនេះ លោក ហេង សុផាន់ណារិទ្ធ បានសង្កត់ធ្ងន់ថា ចំពោះក្រុមហ៊ុន សហគ្រាសដែលជាប់កាតព្វកិច្ចបង់ភាគទានប្រាក់សោធនទាំងអស់ គឺត្រូវតែធ្វើការបង់ភាគទាន ហើយត្រូវរួសរាន់បំពេញកាតព្វកិច្ចឱ្យទាន់ពេលវេលា ទាន់ ប.ស.ស. ផ្តល់ឱកាស និងមិនទាន់មានការផាកពិន័យ។
លោកបានបញ្ជាក់ថា៖ «តាមពិតទៅដំណើរនៃការបង់ភាគទាននេះ គឺមានលក្ខណៈល្អប្រសើរ ដោយគ្រាន់តែយើង ទើបចាប់ផ្តើមដំណើរការដំបូង អាចថា ក្រុមហ៊ុន ឬសហគ្រាសមួយចំនួន គាត់រៀបចំឯកសារមិនត្រូវ ដែលតែងតែត្រឡប់ឯកសារទៅមកៗ រុញចុះរុញឡើងដោយសារការគណនារបស់ពួកគាត់ មិនត្រូវអីជាដើម។ យ៉ាងណា សហគ្រាសគ្រឹះស្ថានទាំងនេះ គឺត្រូវតែបង់ភាគទានមក បសស បើទោះជាយឺតបន្តិចសម្រាប់ខែដំបូង»។
កាលពីថ្ងៃទី ២១ វិច្ឆិកា ប.ស.ស. បានបើកកិច្ចប្រជុំប្រចាំខែរបស់ខ្លួន ដើម្បីពិនិត្យលើវឌ្ឍនភាពការងារសម្រេចបាន និងបញ្ហាប្រឈមផ្សេងៗ ដោយមានវត្តមានចូលរួមពីថ្នាក់ដឹកនាំមកពីនាយកដ្ឋានសាខា ប.ស.ស. ខេត្ត ក្រុង ស្រុក ខណ្ឌ និងតំណាងការិយាល័យសរុបប្រមាណជាង ១០០នាក់ នៅសាលប្រជុំធំស្នាក់ការកណ្តាល ប.ស.ស. រាជធានីភ្នំពេញ និងតាមរយៈប្រព័ន្ធ Hybrid។
ក្នុងឱកាសនោះលោក អ៊ុក សមវិទ្យា ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. បានណែនាំឱ្យមន្ត្រីរបស់ខ្លួន ធ្វើយ៉ាងណាជំរុញឱ្យសហគ្រាសខ្នាតតូចមកចុះបញ្ជីក្នុង ប.ស.ស. ឱ្យបានគ្រប់គ្នា ដើម្បីការពារអត្ថប្រយោជន៍ និងសិទ្ធិទទួលបានការប្រើប្រាស់សេវានៅតាមមូលដ្ឋានសុខាភិបាលប្រកបដោយភាពច្បាស់លាស់។
បន្ថែមពីនេះ លោក ក៏បានណែនាំឱ្យប្រធានអង្គភាពចំណុះ ប.ស.ស. មន្ត្រី បុគ្គលិកគ្រប់លំដាប់ថ្នាក់ ត្រូវបន្ដយកចិត្តទុកដាក់ពិនិត្យ តាមដាន អនុវត្តនូវរាល់កិច្ចការរបស់ខ្លួន ពិសេសត្រូវផ្ដោតលើកត្ដា២ ដែលត្រូវប្រកាន់ខ្ជាប់ជាសំខាន់ នោះគឺភាពទន់ភ្លន់ និងម៉ឺងម៉ាត់បំពេញការងារ។
លោកបានបញ្ជាក់ថា៖ «ព្រោះថាកត្ដាសមត្ថភាព២នេះសំខាន់ណាស់ ដែលថ្នាក់ដឹកនាំទទួលភារកិច្ចជួរមុខទាំងអស់មិនអាចខ្វះបាននោះឡើយ ព្រោះខ្លួនអ្នកផ្ដល់សេវាសាធារណៈ ជាពិសេសត្រូវធ្វើយ៉ាងណារក្សានូវក្រមសីលធម៌ វិជ្ជាជីវៈ ដើម្បីពង្រឹងសេវាឱ្យឈានទៅដល់កម្រិត១ដែលទទួលបាននូវការផ្ដល់ទំនុកចិត្ដខ្ពស់ពីប្រជាពលរដ្ឋ»។
គិតត្រឹមខែតុលា មានកម្មករនិយោជិតចំនួន ១ ៤៦៦ ៧២៥ នាក់ នៅក្នុងសហគ្រាសជាង ១៣ ៣០០ សហគ្រាស ដែលមាននៅក្នុងប្រព័ន្ធ ប.ស.ស. ស្រាប់ នឹងត្រូវមានកាតព្វកិច្ចបង់ភាគទាននេះដោយស្វ័យប្រវត្តិ។ នេះបើតាមលោក ហេង សុផាន់ណារិទ្ធ៕
