.jpg)
ទិដ្ឋភាពសាឡង់រៀបក្រឡាប់ ក្រោយបុកស្ពានបាឡេ កាលពីយប់ថ្ងៃទី២០ វិច្ឆិកា។ រូបថត ហ្វេសប៊ុក
ភ្នំពេញៈ មន្ទីរសាធារណការនិងដឹកជញ្ជូនរាជធានីភ្នំពេញបានសម្រេចផ្អាកការធ្វើចរាចរណ៍លើ និងក្រោមស្ពានបាឡេឆ្លងកាត់ទន្លេសាបដែលតភ្ជាប់តំបន់ទីក្រុងរណបជ្រោយចង្វារក្នុងខណ្ឌជ្រោយចង្វារមកខណ្ឌឫស្សីកែវជាបណ្ដោះអាសន្ន បន្ទាប់ពីមានករណីសាឡង់ដឹកខ្សាច់ធំមួយបានបើកមកបុកហើយលិចក្រឡាប់មកគាបជាប់ក្រោមស្ពាននេះកាលពីយប់ថ្ងៃទី២០ខែវិច្ឆិកា ឆ្នាំ២០២២។
លោក សាំ ពិសិដ្ឋ នាយកមន្ទីរសាធារណការ និងដឹកជញ្ជូនរាជធានីភ្នំពេញ បានថ្លែងថា រហូតមកទល់រសៀលថ្ងៃទី២១ ខែវិច្ឆិកា ឆ្នាំ២០២២នេះ សាឡង់ដឹកខ្សាច់នោះ នៅមិនទាន់អូសចេញពីគល់ស្ពាននៃទីតាំងកើតហេតុនៅឡើយទេ។
លោកថ្លែងថា៖«ដើម្បីសុវត្ថិភាពសាធារណៈ យើងចាំបាច់ត្រូវផ្អាកការធ្វើចរាចរណ៍ឆ្លងកាត់ ទាំងលើស្ពាន និងក្រោមស្ពានសម្រាប់រថយន្ត និងនាវាគ្រប់ប្រភេទជាបណ្ដោះអាសន្ន រហូតដល់មានការសិក្សាវាយតម្លៃពីក្រុមជំនាញការស្ពានថ្នល់សាជាថ្មី»។
លោកបានបន្តថា ៖«តាមការប៉ាន់ស្មានលើករណីនេះ វាមិនមានសភាពធ្ងន់ធ្ងរទេ»។
ទោះយ៉ាងណា លោក ពិសិដ្ឋ មិនបានប្រាប់ឱ្យដឹងអំពីអត្តសញ្ញាណនៃក្រុមហ៊ុនសាឡង់ដឹកខ្សាច់ដែលបានបើកបុកស្ពានបាឡេនោះដើម្បីឱ្យសាធារណជនបានដឹងឡើយ ដោយលោកជំរុញឱ្យសួរទៅកាន់អ្នកនាំពាក្យសាលារាជធានីភ្នំពេញ។ចំណែកអ្នកនាំពាក្យសាលារាជធានីភ្នំពេញ លោក ម៉េត មាសភក្ដី បានប្រាប់ភ្នំពេញប៉ុស្តិ៍ថា លោកនៅមិនទាន់ទទួលបានរបាយការណ៍អំពីឧបទ្ទវហេតុខាងលើនេះពីអង្គភាពជំនាញនៅឡើយទេ។
ប៉ុន្តែបើតាមរយៈកំណត់ហេតុរបស់សមត្ថកិច្ចជំនាញខាងនាវាចរណ៍ដែលភ្នំពេញប៉ុស្តិ៍ទទួលបាននៅល្ងាចថ្ងៃទី២១ ខែវិច្ឆិកា ឆ្នាំ២០២២ សាឡង់ដឹកខ្សាច់បង្កហេតុខាងលើនេះ ជាកម្មសិទ្ធិរបស់លោក លី ឃី អាយុ៦៧ឆ្នាំ មានលំនៅក្នុងសង្កាត់ផ្សារដេប៉ូ១ ខណ្ឌទួលគោក រាជធានីភ្នំពេញ។សាឡង់ដឹកខ្សាច់នេះ មានផ្ទុកខ្សាច់ពេញ និងបើកបរដោយឈ្មោះ ញ៉ុក ម៉ក់ អាយុ៤១ឆ្នាំ ធ្វើដំណើរក្នុងទិសដៅពីត្បូងទៅជើង ដើម្បីនាំខ្សាច់យកទៅដាក់នៅដេប៉ូខ្សាច់គីឡូម៉ែត្រលេខ១០ ស្ថិតក្នុងខណ្ឌឫស្សីកែវ។
កំណត់ហេតុដដែលនោះបានបញ្ជាក់ថា«លុះមកដល់ចំណុចកើតហេតុក៏មានបញ្ហាម៉ាស៊ីនខាងឆ្វេង បណ្ដាលឱ្យឡើងចរន្តទឹកមិនរួច ហើយរសាត់មកបោកផ្ទប់សសរស្ពានបាឡេត្រង់ចំណុច P4 និង P5 ស្ថិតក្នុងភូមិឃ្លាំងសាំង សង្កាត់-ខណ្ឌឫស្សីកែវ រាជធានីភ្នំពេញ បណ្ដាលឱ្យផ្អៀង ជាប់គាំងលើកំណល់គ្រឹះស្ពាននោះតែម្ដង។ ហេតុការណ៍នេះមិនបណ្ដាលឱ្យមានគ្រោះថ្នាក់ដល់អាយុជីវិតនាវិក ណាម្នាក់ឡើយ។ ចំណែកសម្ភារត្រូវខូចខាតទាំងស្រុង»។
ជុំវិញករណីសាឡង់ដឹកខ្សាច់បើកបុកស្ពានបាឡេនេះ លោក សុខ ទូច ប្រធានរាជបណ្ឌិត្យសភាកម្ពុជា បានមានប្រសាសន៍ថាតាមផ្លូវច្បាប់ ម្ចាស់អាជីវកម្មសាឡង់ដឹកខ្សាច់ត្រូវទទួលខុសត្រូវចំពោះសកម្មភាពបង្កហេតុរបស់ខ្លួនដែលនាំឱ្យខូចខាតឬប៉ះពាល់ដល់ផលប្រយោជន៍សាធារណៈ ហើយក្រសួងស្ថាប័ន និងអង្គភាពជំនាញដែលធ្វើការងារពាក់ព័ន្ធលើវិស័យនេះគួរតែធ្វើការប្រកាសឱ្យដឹងអំពីអត្តសញ្ញាណនៃក្រុមហ៊ុនអាជីវកម្មដែលមានកំហុសឆ្គងទាំងនោះឱ្យសាធារណជនបានដឹងដើម្បីជាការព្រមានដល់ក្រុមហ៊ុនដទៃទៀតឱ្យមានការប្រុងប្រយ័ត្ននិងយកចិត្តទុកដាក់អំពីសុវត្ថិភាពជាសាធារណៈ។
លោកបានបញ្ជាក់ថា៖«បើទោះជាករណីនេះមិនបង្កគ្រោះថ្នាក់ដល់អាយុជីវិតមនុស្សក៏ដោយ ប៉ុន្តែវាបានបង្កផលប៉ះពាល់ និងខូចខាតដល់ទ្រព្យសម្បត្តិសាធារណៈរបស់រដ្ឋ ដូច្នេះម្ចាស់អាជីវកម្មសាឡង់ដឹកខ្សាច់ចាំបាច់ត្រូវតែចេញមុខទទួលខុសត្រូវក្នុងការបង់ផាកពិន័យតាមផ្លូវច្បាប់។ចំណែកសមត្ថកិច្ចជំនាញត្រូវធ្វើការស្រាវជ្រាវពីសាវតារនៃក្រុមហ៊ុនសាឡង់ដឹកខ្សាច់នេះដើម្បីប្រកាសឱ្យសាធារណជនបានដឹងដើម្បីជាការព្រមានកុំឱ្យក្រុមហ៊ុនដទៃទៀតយកតម្រាប់តាម»។
គួររំឭកថា កាលពីថ្ងៃទី១០ ខែកញ្ញា ឆ្នាំ២០១៩ ស្ពានដែកបាឡេឫស្សីកែវក៏ត្រូវបានសាឡង់ដឹកប្រេងរបស់ក្រុមហ៊ុន«សាវីមិច»បើកបុកដែរ។ភ្លាមៗនោះនៅថ្ងៃទី១១ ខែកញ្ញា ឆ្នាំ២០១៩ អាជ្ញាធរក៏បានផ្អាកចរាចរណ៍នៅស្ពានដែកបាឡេឫស្សីកែវជាបណ្តោះអាសន្នមួយរយៈដែរ៕
