សៀមរាបៈក្រុមគណ:គ្រូពេទ្យកម្ពុជានៅថ្ងៃទី ២០ ខែវិច្ឆិកា ឆ្នាំ ២០២២ បានរៀបចំទិវាអភិវឌ្ឍន៍វិជ្ជាជីវ:វេជ្ជសាស្ដ្រប្រចាំឆ្នាំលើកទី១៣ ដើម្បីផ្តល់ចំណេះដឹង និងបទពិសោធន៍ថ្មីៗដល់សមាជិកគណ:គ្រូពេទ្យ ក្នុងគោលបំណងអភិវឌ្ឍវិស័យសុខាភិបាលឱ្យកាន់តែមានប្រសិទ្ធភាពខ្ពស់។
ក្រុមវេជ្ជបណ្ឌិតជំនាញ សាស្ត្រាចារ្យផ្នែកវេជ្ជសាស្ត្រដែលមានបទពិសោធន៍ បានឡើងធ្វើបទបង្ហាញដើម្បីចែករំលែកទៅកាន់សមាជិកចូលរួមពិធី នូវបទពិសោធន៍និងចំណេះដឹងដែលខ្លួនមាន ព្រមទាំងក្រើនរំឭកឱ្យអ្នកផ្ដល់សេវាសុខាភិបាលត្រូវធ្វើការងារប្រកបដោយវិជ្ជាជីវៈនិងមានក្រមសីលធម៌ខ្ពស់។
ប្រធានមន្ទីរសុខាភិបាលខេត្ដសៀមរាប លោកវេជ្ជបណ្ឌិត ក្រុស សារ៉ាត់ មានប្រសាសន៍តាមរយ:ទិវាអភិវឌ្ឍន៍វិជ្ជាជីវ:វេជ្ជសាស្ត្រនេះថា ក្រុមគ្រូពេទ្យ នឹងទទួលបាននូវចំណេះដឹង ទ្រឹស្ដី បទពិសោធន៍ ដើម្បីជាគុណប្រយោជន៍ក្នុងការអនុវត្តការងារប្រចាំថ្ងៃ ដើម្បីព្យាបាលជំងឺជូនប្រជាជនទាំងសេវារដ្ឋ និងសេវាឯកជន។
លោកបញ្ជាក់ថា ក្រុមគ្រូពេទ្យបានយល់កាន់ប្រសើរឡើង នូវបញ្ហាសុពលភាព ក្រមសីលធម៌គ្រូពេទ្យ ច្បាប់ស្តីពីការគ្រប់គ្រងអ្នកប្រកបវិជ្ជាជីវ:វិស័យសុខាភិបាល ហើយចំនួនអ្នកចូលរួមក្នុងទិវាអភិវឌ្ឍន៍វិជ្ជាជីវ: វេជ្ជសាស្ត្រមានចំនួនកើនឡើងជាលំដាប់។
លោកវេជ្ជបណ្ឌិត ក្រុស សារ៉ាត់ ថ្លែង៖ «ទិវាវិជ្ជសាស្ដ្រវិជ្ជាជីវ:គណ:គ្រូពេទ្យ ប្រារព្ធធ្វើឡើងដើម្បីផ្ដល់ឱកាសឱ្យគ្រូពេទ្យទាំងអស់ ពង្រីកនូវចំណេះដឹងរបស់ខ្លួនជាប្រចាំ រៀនសូត្រជាប្រចាំ និងយកចំណេះដឹងនេះ ទៅអនុវត្តក្នុងការព្យាបាលជំងឺ ជូនប្រជាជនដោយគោរពទៅតាមក្រមសីលធម៌វិជ្ជាជីវ: និងច្បាប់ស្តីពីការគ្រប់គ្រងអ្នកប្រកបវិជ្ជាជីវ:វិស័យសុខាភិបាល»។
លោកស្នើឱ្យទាំងគ្រូពេទ្យខ្មែរ គ្រូពេទ្យបរទេសបន្ដចុះបញ្ជីគណ:គ្រូពេទ្យឱ្យបានត្រឹមត្រូវ ដើម្បីចៀសវាងខុសទៅនឹងច្បាប់ ស្តីពីការគ្រប់គ្រងអ្នកប្រកបវិជា្ជជីវ:វិស័យសុខាភិបាល។
ប្រធានគណ:គ្រូពេទ្យខេត្ដសៀមរាប លោកវេជ្ជបណ្ឌិត អ៊ុយ ចាន់ថុល មានប្រសាន៍ថា ទិវាអភិវឌ្ឍន៍វិជ្ជសាស្ដ្រ មានសារ:សំខាន់ ក្នុងការពិភាក្សារកចំណុចវិជ្ជមាន និងអវិជ្ជមានរបស់គណ:គ្រូពេទ្យ ។
លោកបញ្ជាក់ថា ៖«ពេទ្យខុសច្បាប់ ក៏នៅតែជាបញ្ហាមួយដែលត្រូវដោះស្រាយ ដែលទាមទារឱ្យមានការចូលរួមពីគ្រប់ផ្នែកទាំងអាជ្ញាធរដែនដី ផ្នែកសមត្ថកិច្ច ផ្នែកសុខាភិបាល ផ្នែកតុលាការ ដើម្បីមានវិធានការលុបបំបាត់»។
លោកជំរុញដល់គ្រូពេទ្យទាំងអស់គោរពដែនវិជ្ជាជីវ: ឱ្យបានត្រឹមត្រូវ ដើម្បីចៀសវាងការបង្កគ្រោះថ្នាក់ជាយថាហេតុដល់អ្នកជំងឺ។
លោកបន្ថែមថា៖ «ពេទ្យទាំងអស់ពិនិត្យមើលនៅសមត្ថភាពខ្លួនឯង បើជំងឺធ្ងន់ៗត្រូវឆាប់បញ្ជូនអ្នកជំងឺទៅកាន់កន្លែងមានសុវត្តិភាព ដើម្បីបន្ថយអត្រាគ្រោះថ្នាក់»។
វេជ្ជបណ្ឌិត អ៊ុយ ចាន់ថុល ឱ្យដឹងថា កន្លងទៅក្នុងករណីដែលនៅតាមបន្ទប់ពិគ្រោះឬ គ្លីនិកណាមួយ ដែលព្យាបាលអ្នកជំងឺបណ្តាលឱ្យស្លាប់ ក្រុមប្រឹក្សាគណ:គ្រូពេទ្យរបស់លោក បានចុះទៅដល់ទីតាំង ដើម្បីពិនិត្យភាពស្របច្បាប់ គុណវុឌ្ឍិដើម្បីឱ្យដឹងថា អ្នកជំងឺស្លាប់ដោយសារស្ថានភាពជំងឺធ្ងន់ធ្ងរពេក ឬស្លាប់ដោយសារកំហុសបច្ចេកទេសរបស់គ្រូពេទ្យ។
តាមរបាយការណ៍របស់គណៈគ្រូពេទ្យកម្ពុជាបង្ហាញថា គិតមកដល់ខែវិច្ឆកាឆ្នាំ ២០២២ នេះ មានគ្រូពេទ្យខ្មែរ និងបរទេសចំនួន ៨៤៨ នាក់ បានចុះឈ្មោះជាសមាជិកគណៈគ្រូពេទ្យខេត្តសៀមរាប។ នៅរយៈពេល ១ ខែចុងក្រោយនេះ គណៈគ្រូពេទ្យកម្ពុជា បានរៀបចំប្រារព្ធទិវា អភិវឌ្ឍន៍វិជ្ជាជីវ:វេជ្ជសាស្ត្រនៅតាមបណ្ដាខេត្តមួយចំនួនទៀតក្រៅពីសៀមរាប រួមមានខេត្តបន្ទាយមានជ័យ ពោធិ៍សាត់ និងខេត្តស្វាយរៀងជាដើម៕