.jpg)
មន្ត្រីជំនាញ កបប និងតំណាងអង្គការពាក់ព័ន្ធក្នុងសិក្ខាសាលា កាលពីថ្ងៃទី ២១ វិច្ឆិកា។ រូបថត កបប
ភ្នំពេញៈ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ «ក.ប.ប» សហការជាមួយអង្គការសង្គមស៊ីវិលចំនួន២ ធ្វើការផ្ទៀងផ្ទាត់របាយការណ៍ដែលប្រមូលបានពីតាមបណ្តាទីផ្សារលើផលិតផលទំនិញសម្រាប់ទារក និងកុមារ ទៅនឹងខ្លឹមសារអនុក្រឹត្យលេខ ១៣៣ ស្ដីពីការផ្សព្វផ្សាយលើផលិតផលសម្រាប់ចិញ្ចឹមទារកនិងកុមារនៅកម្ពុជា។
ការផ្តៀងផ្ទាត់នេះ បានធ្វើឡើងកាលពីថ្ងៃទី ២១ ខែវិច្ឆិកា ឆ្នាំ ២០២២ ក្នុងសិក្ខាសាលាស្ដីពីការតាមដានការអនុវត្តខ្លឹមសារអនុក្រឹត្យលេខ ១៣៣ ស្ដីពីការផ្សព្វផ្សាយលើផលិតផលសម្រាប់ចិញ្ចឹមទារក និងកុមារ នៅស្នាក់ការកណ្ដាលអគ្គនាយកដ្ឋាន ក.ប.ប ដែលមានថ្នាក់ដឹកនាំ និងតំណាងសាខា ក.ប.ប រាជធានី ខេត្ត ជាមួយនឹងអង្គការ Helen Keller International Cambodia និងអង្គការ Alive & Thrive International ចូលរួម។
លោក ផាន អូន ប្រតិភូរាជរដ្ឋាភិបាលទទួលបន្ទុកអគ្គនាយកនៃអគ្គនាយកដ្ឋាន ក.ប.ប បានប្រាប់ ភ្នំពេញ ប៉ុស្តិ៍ នៅថ្ងៃទី ២២ វិច្ឆិកាថា សិក្ខាសាលានេះ មានគោលបំណងធ្វើការវាយតម្លៃអំពីសកម្មភាពនៃការអនុវត្តខ្លឹមសារអនុក្រឹត្យលេខ ១៣៣ របស់សាខា ក.ប.ប រាជធានី-ខេត្ត ក៏ដូចជាបង្ហាញពីសកម្មភាពនិងលទ្ធផលនៃការចរាចរផ្សព្វផ្សាយលក់ផលិតផលសម្រាប់ចិញ្ចឹមទារក និងកុមារលើទីផ្សារផងដែរ។
តាមលោក ផាន អូន បានឱ្យដឹងទៀតថា ក្រុមការងារបានជួបពិភាក្សាគ្នា គឺបានធ្វើការបូកសរុបកម្មសិក្សានៅតាមបណ្តាខេត្តគោលដៅមួយចំនួន ដែលមានការចូលរួមសហការចុះអង្កេតលើទីផ្សារដោយផ្ទាល់ពីអង្គការទាំង២នេះ ដើម្បីធានាបានឱ្យនូវការផ្សព្វផ្សាយលើផលិតផលសម្រាប់ចិញ្ចឹមទារក និងកុមារនៅកម្ពុជា។
លោកបានបញ្ជាក់ថា៖ «ដោយសារយើងមានកម្មវិធីមួយក្នុងការចុះអង្កេតលើទីផ្សារដោយផ្ទាល់ ដើម្បីធ្វើការផ្ទៀងផ្ទាត់ជាមួយបញ្ជីឈ្មោះ ដែលបានអនុវត្តតាម ឬមិនបានអនុវត្តតាមនៅលើទីផ្សារ។ បើសិនជាមិនមានការអនុវត្តក្នុងចំណុចណាខ្លះនៃអនុក្រឹត្យ១៣៣នេះ យើងនឹងមានវិធានការ។ យើងធ្វើការបូកសរុបម្តង ដើម្បីដាក់ចេញផែនការគោលដៅបន្តកម្មវិធី ដើម្បីធ្វើការបណ្តុះបណ្តាលមន្ត្រី ក.ប.ប និងអនុវត្តគោលការណ៍នៅតាមបណ្តាទីផ្សាររាជធានីខេត្ត»។
តាមខ្លឹមសារអនុក្រឹត្យលេខ១៣៣ ស្ដីពីការផ្សព្វផ្សាយលើកផលិតផលសម្រាប់ចិញ្ចឹមទារកនិងកុមារ បានចែងថា អនុក្រឹត្យនេះមានគោលបំណងរួមចំណែកក្នុងការផ្តល់នូវអាហារូបត្ថម្ភឱ្យបានសព្វគ្រប់ និងមានសុវត្ថិភាពដល់ទារក និងកុមារតូចៗ តាមរយៈការគាំពារ និងការលើកកម្ពស់ការបំបៅកូនដោយទឹកដោះម្តាយ និងការជំរុញលើកទឹកចិត្តឱ្យមានការផ្ដល់អាហារបន្ថែមឱ្យបានត្រឹមត្រូវ និងស្របតាមអាយុកំណត់របស់ទារក និងកុមារ ដើម្បីធានាឱ្យមានការប្រើប្រាស់សមស្របនូវផលិតផលជំនួសទឹកដោះម្តាយតែនៅពេលណាដែលចាំបាច់ និងដោយមានមូលដ្ឋាន ព័ត៌មានគ្រប់គ្រាន់។
អនុក្រឹត្យនេះ ក៏បានកំណត់អំពីការផ្សព្វផ្សាយលក់ផលិតផលសម្រាប់ចិញ្ចឹមទារក និងកុមារ ក្នុងនោះមានផលិតផលដែលផលិតក្នុងប្រទេស និងផលិតផលនាំចូលពីបរទស សម្រាប់បម្រើតម្រូវការប្រើប្រាស់ក្នុងការចិញ្ចឹមទារក រហូតដល់អាយុគ្រប់ ១២ ខែ និងកុមារតូចៗរហូតដល់អាយុ ២៤ ខែ។
យោងតាមអនុក្រឹត្យដដែលនេះ បានចែងថា ប្រភេទផលិតផលសម្រាប់ចិញ្ចឹមទារក និងកុមារ គឺមានដូចជា ទឹកដោះគោម្សៅតាមរូបមន្ត រួមបញ្ចូលទាំងទឹកដោះគោម្សៅផ្សំតាមរូបមន្តពិសេស និងរាល់ផលិតផលទាំងអស់ដែលត្រូវបានផ្សព្វផ្សាយលក់ ឬបញ្ជាក់បង្ហាញថា សមស្របសម្រាប់ចិញ្ចឹមទារក និងកុមារតូច។
បន្ថែមពីនេះ ចំពោះដបបំបៅ ក្បាលដោះជ័រ និងគ្រឿងសម្រាប់ទារកជញ្ជក់លេង ទឹកដោះគោផ្សំតាមរូបមន្តសម្រាប់កុមារអាយុចាប់ពី៦ ខែឡើង និងផលិតផលផ្សេងទៀត ដែលត្រូវបានកំណត់ដោយប្រកាសរួមរវាងក្រសួងសុខាភិបាល និងក្រសួងពាក់ព័ន្ធ ក៏ត្រូវធ្វើការផ្សព្វផ្សាយដោយអនុលោមទៅតាមអនុក្រឹត្យលេខ១៣៣នេះ។
លោក ទុំ សំណាង ប្រធាននាយកដ្ឋាកិច្ចការបច្ចេកទេស ក.ប.ប បានប្រាប់ ភ្នំពេញ ប៉ុស្តិ៍ បន្ថែមថា ទីតាំងដែលបានត្រួតពិនិត្យតាមដាន មានដូចជា ហាងលក់ដូរ ផ្សារទំនើប និងឱសថស្ថានដែលមានសរុប ៤៥ ទីតាំង ក្នុងចំនួន ១០ រាជធានី-ខេត្ត។
លោកបានឱ្យដឹងបន្តថា ការអង្កេតបានចាប់ផ្តើមពីខែមីនា ដល់ខែតុលាឆ្នាំ ២០២២ ដោយរកឃើញថា ការដាក់សញ្ញានៅលើផលិតផលទាំងនេះ គឺមិនទាន់ឆ្លើយតបទៅនឹងខ្លឹមសារនៃអនុក្រឹត្យនោះទេ ខណៈការឃោសនា និងការដាក់តាំងបង្ហាញពិសេស ក៏នៅមានការបំពានផងដែរ។
លោក ទុំ សំណាង បានបញ្ជាក់ថា៖ «នឹងបន្តដាក់វិធានការអនុវត្តច្បាប់កាន់តែតឹងរ៉ឹងជាងមុន ចំពោះទំនិញទាំងអស់ ដោយមិនសំដៅតែទៅលើម្សៅទឹកដោះគោនោះទេ។ នៅឆ្នាំក្រោយនេះ យើងបន្តចាត់វិធានការ និងធ្វើការបណ្តុះបណ្តាលមន្ត្រីបង្គោលនៅតាមសាខា និងរំឭកពួកគេឱ្យមានការអង្កេតឱ្យបានមត់ចត់ និងសុក្រឹត»។
កាលពីឆ្នាំ ២០១៨ អង្គការ Helen Keller និងអង្គការទស្សនៈពិភពលោកកម្ពុជា បានធ្វើការសិក្សាស្រាវជ្រាវរួមគ្នាមួយ ដើម្បីប្រមូលព័ត៌មានស្តីពីការអនុវត្តអនុក្រឹត្យលេខ ១៣៣ ស្តីពីការផ្សព្វផ្សាយលក់ផលិតផលសម្រាប់ចិញ្ចឹមទារក និងកុមារនៅក្នុងខេត្តចំនួន ៦ ក្រៅពីទីក្រុងភ្នំពេញ។
ការសិក្សានោះ បានបង្ហាញថា ការមានលក់ផលិតផល ជំនួសទឹកដោះម្តាយ ការផ្សព្វផ្សាយលើកកម្ពស់ការប្រើប្រាស់ និងការរំលោភបំពានលើស្លាកសញ្ញាបន្តរីករាលដាលនៅក្រៅទីក្រុងភ្នំពេញ។ ក្នុងនោះការលក់ផលិតផលជំនួសទឹកដោះម្តាយបានកើនឡើងពី ១១០ ក្នុងឆ្នាំ ២០១៥ ដល់ ១៦៥ ក្នុងឆ្នាំ ២០១៨ ខណៈការផ្សព្វផ្សាយលើកកម្ពស់ការប្រើប្រាស់ផលិតផលជំនួសទឹកដោះម្តាយមានការកើនឡើងបើប្រៀបធៀបឆ្នាំ ២០១៥ ទៅនឹងឆ្នាំ ២០១៨៕
