.jpg)
សមត្ថកិច្ចឃាត់ខ្លួនបុរស ២ នាក់ ក្នុងបទល្មើសចាប់សត្វស្លាបព្រៃនៅតំបន់ដែនជម្រកសត្វព្រៃកែវសីមា ខេត្តមណ្ឌលគិរី នាថ្ងៃទី ២១ វិច្ឆិកា។ រូបថត ក្រសួងបរិស្ថាន
មណ្ឌលគិរីៈ បុរស ២ នាក់ ដែលត្រូវបានចាប់ខ្លួនក្នុងបទល្មើសចាប់សត្វស្លាបព្រៃក្នុងតំបន់ដែនជម្រកសត្វព្រៃកែវសីមា ត្រូវបានមន្ត្រីការិយាល័យជំនាញនៃមន្ទីរបរិស្ថានខេត្តមណ្ឌលគិរី កសាងសំណុំរឿង និងបញ្ជូនទៅតុលាការខេត្តមណ្ឌលគិរី ដើម្បីចាត់វិធានការបន្តតាមនីតិវិធី។
លោក ម៉ៅ រឿម មន្ត្រីឧទ្យានុរក្សនៃដែនជម្រកសត្វព្រៃកែវសីមាប្រាប់ ភ្នំពេញ ប៉ុស្តិ៍ នៅថ្ងៃទី ២៣ វិច្ឆិកាថា ជនសង្ស័យទាំង ២ ត្រូវបានក្រុមការងាររបស់លោក ចាប់ឃាត់ខ្លួននៅរសៀលថ្ងៃទី ២១ ខែវិច្ឆិកា ខណៈកំពុងធ្វើដំណើរតាមម៉ូតូម្នាក់ ១ គ្រឿងចេញពីក្នុងព្រៃនៃតំបន់ការពារ ដែនជម្រកសត្វព្រៃកែវសីមា ស្ថិតក្នុងភូមិសាស្ត្រ ភូមិអូរអាម ឃុំស្រែខ្ទុម ស្រុកកែវសីមា ខេត្តមណ្ឌលគិរី ដោយមានលាក់សត្វស្លាបព្រៃរស់ជិត ៤០ ក្បាល ក្នុងអាវធំ និងទ្រុងសំណាញ់របស់ពួកគេ។
លោកបន្តថា ក្នុងការសាកសួរជំហានបឋម ជនសង្ស័យបាននិយាយថា សត្វស្លាបព្រៃទាំងនោះ គឺពួកគេចាប់ពីក្នុងចម្ការរបស់អ្នកភូមិ ដែលនៅជាប់តំបន់ដែនជម្រកសត្វព្រៃកែវសីមា ហើយមានបំណងដឹកយកទៅលក់ឱ្យឈ្មួញជនជាតិវៀតណាមម្នាក់ ដែលរស់នៅជាប់ព្រំប្រទល់ខេត្តមណ្ឌលគិរី។
លោកបញ្ជាក់ថា៖ «ជានីតិវីធី ក្រុមការងារយើង បានបញ្ជូនជនសង្ស័យ និងវត្ថុតាងសត្វស្លាបព្រៃ ប្រភេទសត្វល្វាចេកចំនួន ៣៩ ក្បាល រួមទាំងម៉ូតូ ២ គ្រឿង ទៅកាន់ការិយាល័យដែនជម្រកសត្វព្រៃកែវសីមា នៃមន្ទីរបរិស្ថានខេត្តមណ្ឌលគិរី ដើម្បីចំណាត់ការបន្តតាមនីតិវិធីច្បាប់»។
លោក ស៊ិន សុថា នាយរងការិយាល័យដែនជម្រកសត្វព្រៃកែវសីមាប្រាប់ ភ្នំពេញ ប៉ុស្តិ៍ថា ជនសង្ស័យទាំង ២ ត្រូវបានក្រុមមន្ត្រីជំនាញកសាងសំណុំរឿង បញ្ជូនទៅកាន់តុលាការខេត្តមណ្ឌលគិរី ដើម្បីមានចំណាត់ការបន្តតាមនីតិវិធី ដោយចោទប្រកាន់ពីបទចាប់ និងដឹកជញ្ជូនសត្វស្លាបព្រៃខុសច្បាប់។
ទោះយ៉ាងណា លោកមិនបានប្រាប់អំពីអត្តសញ្ញាណនៃជនសង្ស័យទាំង២នាក់នោះទេ។ លោកថា៖ «ករណីនេះកំពុងស្ថិតក្នុងនីតិវិធីនៃការស៊ើបអង្កេតនៅឡើយ។ បច្ចុប្បន្នពួកគេកំពុងស្ថិតក្រោមនីតិវិធីសួរចម្លើយរបស់តំណាងអយ្យការអមសាលាដំបូងខេត្តមណ្ឌលគិរី»។
បទល្មើសសត្វព្រៃ នៅតែបន្តកើតមានស្ទើរគ្រប់ទីកន្លែង នៃតំបន់ការពារធម្មជាតិ និងតំបន់ដែនជម្រកសត្វព្រៃ នៃប្រទេសកម្ពុជា គួរឱ្យព្រួយបារម្ភ បើទោះជាក្រុមមន្ត្រីឧទ្យានុរក្ស និងសមត្ថកិច្ចពាក់ព័ន្ធ រួមទាំងប្រជាសហគមន៍ក្នុងមូលដ្ឋានបានរួមសហការគ្នាចុះល្បាតព្រៃ ដើម្បីស្រាវជ្រាវ បង្ការទប់ស្កាត់ និងបង្ក្រាបបទល្មើសនេះយ៉ាងសស្រោកសស្រាំយ៉ាងណាក៏ដោយ។
កាលថ្ងៃទី ២១ វិច្ឆិកា ឆ្នាំ ២០២២ ក្រុមមន្ត្រីឧទ្យានុរក្សនៃតំបន់ដែនជម្រកសត្វព្រៃភ្នំសំកុស ខេត្តបាត់ដំបង រួមទាំងប្រជាសហគមន៍មូលដ្ឋានក្នុងតំបន់នោះ បានជួយសង្គ្រោះសត្វកែះញី ១ ក្បាល ដែលមានកូនក្នុងផ្ទៃរៀបនឹងកើត ពីអន្ទាក់របស់ក្រុមជនប្រព្រឹត្តបទល្មើសសត្វព្រៃ។ ដោយសារការប្រឹងរើបម្រះពីអន្ទាក់ខ្លាំងពេក បានធ្វើឱ្យកូនក្នុងផ្ទៃរបស់វាងាប់ក្នុងពោះ។ ប៉ុន្តែសំណាងល្អ សត្វកែះញី ១ ក្បាលនោះ ត្រូវបានសង្គ្រោះជីវិត ដោយក្រុមគ្រូពេទ្យជំនាញនៃអង្គការសម្ព័ន្ធភាពសត្វព្រៃ Wildlife Alliance។ បច្ចុប្បន្ន សត្វកែះញី ១ ក្បាលនោះ កំពុងស្ថិតក្រោមការព្យាបាលនិងមើលថែដោយក្រុមមន្ត្រីជំនាញនៃអង្គការសម្ព័ន្ធភាពសត្វព្រៃ។
សត្វកែះ គឺជាប្រភេទសត្វកម្រលើពិភពលោក និងត្រូវបានកត់សម្គាល់ថា មានវត្តមានក្នុងតំបន់ការពារធម្មជាតិនៅកម្ពុជា។ នេះបើតាមប្រសាសន៍របស់លោក នេត្រ ភក្ត្រា អ្នកនាំពាក្យក្រសួងបរិស្ថាន។
លោកថ្លែងថា៖ «បច្ចុប្បន្ននេះ សត្វកែះកំពុងប្រឈមមុខនឹងការបាត់បង់ពូជ ដោយសារតែការបរបាញ់ ការដាក់អន្ទាក់ និងការបាត់បង់ទីជម្រក»។
បើតាមលោក នេត្រ ភក្ត្រា អ្វីដែលធ្វើឱ្យសត្វកែះរងគ្រោះខ្លាំង និងឈានទៅរកការបាត់បង់ពូជនោះ គឺដោយសារតែជំនឿអរូបីថា សំណាករបស់វា អាចជួយបំប៉នសុខភាព ឬព្យាបាលជំងឺ។ ជំនឿនេះបានធ្វើឱ្យមានការប្រមាញ់ យកសាច់ ស្នែង ឆ្អឹង និងឈាមរបស់សត្វព្រៃប្រភេទនេះ ដើម្បីការជួញដូរខុសច្បាប់។ ជាមួយគ្នានេះលោកបានអំពាវនាវដល់សាធារណជន បញ្ឈប់ការហូបសាច់សត្វព្រៃ និងបញ្ឈប់ការដាក់អន្ទាក់ បញ្ឈប់ការបរបាញ់ និងលក់ដូរសាច់សត្វព្រៃ៕
