ព្រះសីហនុៈ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក ឌិត ទីណា បញ្ជាក់ថាក្រសួងកសិកម្មគាំទ្រភាពជាដៃគូរវាងរដ្ឋ និងអង្គការនានា ដើម្បីបង្កើនប្រាក់ចំណូល និងជួយឱ្យផលិតផលកែច្នៃក្នុងស្រុកអាចផលិតបានតាមស្តង់ដាសុវត្ថិភាពម្ហូបអាហារ ដើម្បីអាចឈានចូលទីផ្សារទំនើប។
លោករដ្ឋមន្ត្រីថ្លែងបែបនេះ នៅរសៀលថ្ងៃទី ២៤ ខែវិច្ឆិកា ឆ្នាំ ២០២២ ពេលដែលលោកបានចុះពិនិត្យសិប្បកម្មកែច្នៃត្រីចំហុយ ជា ធូ នៅឃុំទំនប់រលក ខេត្តព្រះសីហនុ ដើម្បីស្វែងយល់ពីការកែច្នៃត្រីចំហុយរបស់សហគ្រាសកែច្នៃផលិតផលជលផលក្នុងស្រុក។ សិប្បកម្មកែច្នៃត្រីចំហុយ ជា ធូ បានទទួលការគាំទ្រផ្នែកសម្ភារ និងបច្ចេកទេសពីគម្រោង CAPFish CAPTURE ដែលអនុវត្តដោយរដ្ឋបាលជលផល និងអង្គការយូនីដូ ក្រោមសហហិរញ្ញប្បទានរបស់សហភាពអឺរុប។
លោករដ្ឋមន្ត្រីក៏បានជួបជាមួយកសិករកែច្នៃបង្គាក្រៀម នៅឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ ផងដែរ។
លោកថ្លែងថា៖ «ខ្ញុំសូមគាំទ្រ និងលើកទឹកចិត្តដល់កសិករដែលធ្វើការនៅក្នុងសហគមនេសាទឱ្យមាននិរន្តរភាព និងចូលរួមថែរក្សាបរិស្ថាន ហើយជំនាញនឹងជួយមើលក្នុងការថែរក្សាជម្រកបង្គា ក្តាម ជាពិសេសប្រសិនបើការប្រមូលទិញឃើញមានក្តាមញីពង គឺត្រូវលែងត្រឡប់ទៅវិញ»។
នៅថ្ងៃដដែលនោះ លោករដ្ឋមន្ត្រីកសិកម្ម ឌិត ទីណា ក៏បានចុះពិនិត្យបណ្តុំអាជីវកម្មបន្លែ របស់កម្មវិធី (ASPIRE) នៅភូមិសំរុងក្រោម ឃុំសំរុង ស្រុកព្រៃនប់ ខេត្តព្រះសីហនុ ស្វែងយល់ពីបញ្ហាប្រឈម និងរកដំណោះស្រាយឆ្លាតវៃ ដើម្បីឆ្លើយតបនឹងតម្រូវការទីផ្សារ ផងដែរ។
បន្ទាប់ពីបានជជែកពិភាក្សាជាមួយក្រុមកសិករ និងអ្នកប្រមូលទិញរួចមក លោកបានផ្តល់ជាគំនិតដល់កសិករត្រូវស្វែងយល់ ពីផែនការអាជីវកម្ម ដើម្បីចៀសវាងផលិតលើសពីតម្រូវការ។
លោកថ្លែងថា៖ «ការចងក្រងជាក្រុម ឬជាសហគមន៍កសិកម្មមានសារៈសំខាន់ ដែលជួយឱ្យយើងអាចរៀបចំប្រតិទិនដាំដុះដំណាំបន្លែ និងការចរចាតម្លៃទីផ្សារ»។
លោករដ្ឋមន្ត្រីបានប្រាប់ទៅមន្ទីរកសិកម្ម រុក្ខាប្រមាញ់ និងនេសាទ ត្រូវជួយសម្របសម្រួលជាមួយក្រុមហ៊ុនផ្គត់ផ្គង់ផ្ទះសំណាញ់ និងក្រុមហ៊ុនប្រមូលទិញបន្លែ ដើម្បីផ្តល់ផ្ទះសំណាញ់ឱ្យប្រជាកសិករអាចធ្វើចម្ការពេញមួយឆ្នាំ ហើយរំលស់ជាមួយថ្លៃបន្លែដែលប្រមូលទិញទាំងនោះដោយមិនឱ្យកសិករជាអ្នកជាប់ជំពាក់បំណុលជាមួយស្ថាប័នមីក្រូហិរញ្ញវត្ថុឡើយ៕