​ក្រសួង​អប់រំ និង​អង្គការ វីវីអូប៊ី ផ្តល់​វគ្គ​បំប៉ន​ពី​វិធីសាស្រ្ត​បង្រៀន និង​ការ​ប្រើប្រាស់​កញ្ចប់​សម្ភារ​គណិតវិទ្យា​ថ្នាក់​ទី១ ដល់​គ្រូ​ក្នុង​ខេត្ត​កំពង់ធំជាង ១ពាន់នាក់​

វគ្គបំប៉នមួយ ស្ដីពី «វិធីសាស្រ្តបង្រៀននិងការប្រើប្រាស់កញ្ចប់សម្ភារគណិតវិទ្យាថ្នាក់ទី១ ឆមាសទី១» ដល់គ្រូបង្រៀនថ្នាក់បឋមសិក្សា (ថ្នាក់ទី១) គ្រូប្រឹក្សាគរុកោសល្យប្រចាំសាលារៀន និងទីប្រឹក្សាគរុកោសល្យជំនាញ ទូទាំងខេត្តកំពង់ធំ។ រូបថត សហការី

ក្រសួងអប់រំ យុវជន និងកីឡា សហការជាមួយនឹងអង្គការវីវីអូប៊ី (VVOB) បានរៀបចំនូវវគ្គបំប៉នមួយ ស្ដីពី «វិធីសាស្រ្តបង្រៀននិងការប្រើប្រាស់កញ្ចប់សម្ភារគណិតវិទ្យាថ្នាក់ទី១ ឆមាសទី១» ដល់គ្រូបង្រៀនថ្នាក់បឋមសិក្សា (ថ្នាក់ទី១) គ្រូប្រឹក្សាគរុកោសល្យប្រចាំសាលារៀន និងទីប្រឹក្សាគរុកោសល្យជំនាញ ទូទាំងខេត្តកំពង់ធំ សរុបចំនួន ១០៥០នាក់។

យោងតាមសេចក្ដីប្រកាសព័ត៌មានរួមគ្នារបស់ក្រសួងអប់រំ យុវជន និងកីឡា និងអង្គការវីវីអូប៊ី ស្តីពីការពង្រីកការអនុវត្ត «កញ្ចប់សម្ភារគណិតវិទ្យាថ្នាក់ដំបូង» ត្រូវបានរៀបចំនៅទូទាំងខេត្តកំពង់ធំ បានលើកឡើងថា វគ្គបំប៉ននេះ ចាប់ផ្តើមឡើង នាព្រឹកថ្ងៃទី២៦ ខែវិច្ឆិកាឆ្នាំ២០២២ ក្រោមជំនួយឧបត្ថម្ភពីរដ្ឋាភិបាលនៃប្រទេស ប៊ែលហ្ស៊ិក។

សេចក្តីប្រកាសព័ត៌មានបានបញ្ជាក់ថា វគ្គបំប៉នក្នុងរយៈពេល ៥ថ្ងៃ ដែលរៀបចំឡើងដើម្បីពង្រឹងសមត្ថភាពគ្រូបង្រៀនគណិតវិទ្យាកម្រិតថ្នាក់ដំបូងតាមរយៈវិធីសាស្រ្តបង្រៀនថ្មីៗ និងជាការអនុវត្តនូវយុទ្ធសាស្រ្តដែលក្រសួងបានរៀបចំក្នុងការពង្រឹងវិធីសាស្រ្តបង្រៀន និងការគ្រប់គ្រងថ្នាក់រៀនទៅដល់លោកគ្រូ អ្នកគ្រូ នៅទូទាំងប្រទេសសម្រាប់កម្រិតបឋមសិក្សា។

លោក ចាន់ សុភា ប្រធាននាយកដ្ឋានបឋមសិក្សា នៃក្រសួងអប់រំ យុវជន និងកីឡា បានឱ្យដឹងថា ក្រោមកិច្ចសហការរវាងក្រសួងជាមួយអង្គការ VVOB ការអនុវត្តសកម្មភាពបំប៉នដល់លោកគ្រូ អ្នកគ្រូ ដែលកំពុងបង្រៀននៅកម្រិតថ្នាក់បឋមនេះ គឺជាការអនុវត្តយុទ្ធសាស្រ្ត កំណែទម្រង់ស៊ីជម្រៅរបស់ក្រសួង ដែលផ្ដោតសំខាន់លើការពង្រឹង និងលើកកម្ពស់វិធីសាស្រ្តបង្រៀន។

លោកបានបន្តថា វគ្គបំប៉ននេះ ធ្វើយ៉ាងណាដើម្បីឱ្យលោកគ្រូ អ្នកគ្រូបង្រៀនទាំងអស់មានសមត្ថភាពបន្ថែមក្នុងការបង្រៀនដល់សិស្សានុសិស្សកម្រិតបឋមថ្នាក់ទី១ ទី២ និងទី៣ ឱ្យកាន់តែមានប្រសិទ្ធភាព។

លោក ចាន់ សុភា មានប្រសាសន៍ថា៖ «បន្ថែមពីវគ្គបំប៉នវិធីសាស្រ្តបង្រៀន ក្រសួងអប់រំ យុវជន និងកីឡា ក៏បានរៀបចំឯកសារជំនួយសិស្សជាវីដេអូខ្លីៗ ដើម្បីជូនទៅអាណាព្យាបាលសិស្សឱ្យជួយជំរុញកូនៗរបស់គាត់រៀននៅផ្ទះបន្ថែមទៀតផងដែរ»។

នាឱកាសនោះដែរ កញ្ញា ម៉េរ៉ល លូវហ្ចីស (Merel Luichies) ប្រធានគម្រោងនៃអង្គការ VVOB ប្រចាំប្រទេសកម្ពុជា បានលើកឡើងដោយកញ្ញាបានសម្ដែងក្ដីរំពឹងទុកថា សិក្ខាកាមនឹងទទួលបានចំណេះដឹង និងជំនាញបន្ថែម ដើម្បីបំប៉នសមត្ថភាពពួកគេ ក្នុងការអនុវត្តវិធីសាស្រ្តរៀន និងបង្រៀនកញ្ចប់សម្ភារគណិតវិទ្យាថ្នាក់ដំបូងនេះ ទៅដល់សិស្សានុសិស្ស ដែលជាមូលដ្ឋានគ្រឹះដ៏សំខាន់សម្រាប់អនាគតនៃការសិក្សា និងការងាររបស់ពួកគេ។

កញ្ញាបានបញ្ជាក់ថា៖ «វគ្គបំប៉នដែលធ្វើឡើងដោយផ្ទាល់នេះ គឺជាសកម្មភាពស្នូលមួយក្នុងការអភិវឌ្ឍសមត្ថភាពគ្រូបង្រៀន។ លើសពីនេះទៅទៀតនោះក្រសួងនឹងបំប៉នដល់គ្រូប្រឹក្សាគរុកោសល្យប្រចាំសាលារៀនបន្តទៀត»។

ប្រធានគម្រោងនៃអង្គការ VVOB រូបនេះ បានបន្ថែមទៀតថា គ្រូប្រឹក្សាគរុកោសល្យនេះនឹងផ្ដល់ការប្រឹក្សាគរុកោសល្យដល់គ្រូបង្រៀនដែលបានមកទទួលវគ្គបំប៉ននេះ ក្នុងការអនុវត្តសកម្មភាពបង្រៀននៅក្នុងថ្នាក់រៀនផ្ទាល់របស់ពួកគេ។

កញ្ញា ម៉េរ៉ល លូវហ្ចីស បានថ្លែងថា៖ «នាងខ្ញុំសូមបញ្ជាក់ផងដែរថា វគ្គបំប៉នដែលកំពុងតែធ្វើឡើងនេះ គឺត្រូវបានបង្ហាញដោយក្រុមគ្រូឧទ្ទេសថ្នាក់ជាតិ ដែលទទួលបានការបណ្ដុះបណ្ដាលពីសំណាក់គ្រូគណិតថ្នាក់ជាតិ ដែលទទួលបានការគាំទ្រផ្នែកបច្ចេកទេសដោយអង្គការ VVOB ក្រោមជំនួយឧបត្ថម្ភដោយមូលនិធិភាពជាដៃគូសម្រាប់អភិវឌ្ឍសមត្ថភាពវិស័យអប់រំ (CDPF)»។

ឆ្លៀតឱកាសនោះដែរ កញ្ញាក៏បានថ្លែងអំណរគុណដល់លោក ហង់ ជួនណារ៉ុន រដ្ឋមន្រ្តីនៃក្រសួងអប់រំ សម្រាប់ជំនឿជឿជាក់មកលើអង្គការVVOB ក្នុងនាមជាដៃគូអភិវឌ្ឍវិស័យអប់រំ និងអរគុណដល់នាយកដ្ឋានបឋមសិក្សា, នាយកដ្ឋានបណ្ដុះបណ្ដាលគ្រូបង្រៀន និងនាយកដ្ឋានធានាគុណភាពអប់រំ សម្រាប់កិច្ចខិតខំប្រឹងប្រែងរួមគ្នាកន្លងមក ដើម្បីរៀបចំអនុវត្តផែនការយុទ្ធសាស្រ្តរបស់ក្រសួងក្នុងការពង្រឹងវិស័យអប់រំកម្រិតបឋមសិក្សា។

សូមបញ្ជាក់ផងដែរថា បន្ទាប់ពីការដាក់ឱ្យអនុវត្តវិធីសាស្រ្តបង្រៀន និងការប្រើប្រាស់កញ្ចប់សម្ភារគណិតវិទ្យាថ្នាក់ដំបូងសម្រាប់ថ្នាក់ទី១ និងទី២ នេះរួច ក្រសួងអប់រំ យុវជន និងកីឡា ក៏កំពុងរៀបចំមាតិកាថ្នាក់ទី៣ បន្តទៀត។

ដាក់ឱ្យអនុវត្តវិធីសាស្រ្តបង្រៀននេះ គឺបន្ថែមពីការបំប៉នសមត្ថភាពនេះ ក្រសួងក៏នឹងត្រៀមរៀបចំស្តង់ដាគណិតវិទ្យាថ្នាក់ដំបូង ដើម្បីជួយឱ្យលោកគ្រូ អ្នកគ្រូ មានលទ្ធភាពក្នុងការវាយតម្លៃការសិក្សារបស់សិស្សជាប្រចាំនៅក្នុងកម្រិតថ្នាក់ដំបូងផងដែរ៕

ព័ត៌មានជាតិ

ព័ត៌មានថ្មីៗ

វីដេអូ