.jpg)
ទិវាទឹកនោមផ្អែមពិភពលោក ១៤វិច្ឆិកា ក្រោមប្រធានបទ "យើងរួមគ្នាទប់ស្កាត់ភាពធាត់ និងជំងឺទឹកនោមផ្អែម តាមរយៈការផ្លាស់ប្តូរការរស់នៅ " នៅវេទិកាបុណ្យជាតិ ៧មករា ស្ថិតនៅសង្កាត់លេខ៣ ក្រុងព្រះសីហនុ។
ព្រះសីហនុៈ លោក សែជោ សិទ្ធិជោត អនុប្រធានមន្ទីរសុខាភិបាលខេត្តព្រះសីហនុថ្លែងថា កុំពិសាប្រៃ ផ្អែមពេក កុំពិសាខ្លាញ់ពេក ធ្វើលំហាត់ប្រាណជាប្រចាំ គឺជាមធ្យោបាយល្អសម្រាប់ការចូលរួមការពារជំងឺទឹកនោមផ្អែម ជំងឺលើសសម្ពាធឈាម និងជំងឺផ្សេងៗទៀតជាដើម។
លោកថ្លែងបែបនេះនៅព្រឹកថ្ងៃទី២៥ ខែវិច្ឆិកា ពេលដែលមន្ទីរសុខាភិបាលខេត្តព្រះសីហនុ រៀបចំអបអរសាទរទិវាទឹកនោមផ្អែមពិភពលោក ១៤វិច្ឆិកា ក្រោមប្រធានបទ "យើងរួមគ្នាទប់ស្កាត់ភាពធាត់ និងជំងឺទឹកនោមផ្អែម តាមរយៈការផ្លាស់ប្តូរការរស់នៅ " នៅវេទិកាបុណ្យជាតិ ៧មករា ស្ថិតនៅសង្កាត់លេខ៣ ក្រុងព្រះសីហនុ។
លោកថ្លែងថា៖«ប្រធានបទទិវាជំងឺទឹកនោមផ្អែមពិភពលោកឆ្នាំ២០២២ គឺរួមគ្នាទប់ស្កាត់ភាពធាត់ និងជំងឺទឹកនោមផ្អែម តាមរយៈការផ្លាស់ប្ដូររបៀបរស់នៅដោយជំរុញឱ្យមានការកែប្រែឥរិយាបថ និងទម្លាប់ការរស់នៅ ពិសេសបរិភោគអាហារប្រកបដោយផាសុខភាព ព្រមទាំងបង្កើនការយកចិត្តទុកដាក់ថែទាំសុខភាពការពារជំងឺទឹកនោមផ្អែមដោយខ្លួនឯងផ្ទាល់»។
លោកអនុប្រធានមន្ទីរសុខាភិបាលខេត្តព្រះសីហនុ បានស្វាគមន៍ទិវាជំងឺទឹកនោមផ្អែមពិភពលោក (World Dabetisday) បានបង្កើតក្នុងឆ្នាំ១៩៩១ ដោយសម្ព័ន្ធជំងឺទឹកនោមផ្អែមអន្តរជាតិ ដោយមានការគាំទ្រពីអង្គការសុខភាពពិភពលោកក្នុងការឆ្លើយតបទៅនឹងការព្រួយបារម្ភកាន់តែខ្លាំងឡើងអំពីសុខភាព និងការគំរាមកំហែងសេដ្ឋកិច្ច បង្កឡើងដោយជំងឺទឹកនោមផ្អែម។
លោកបញ្ជាក់ថា ទិវានេះក្លាយជាថ្ងៃផ្លូវការរបស់អង្គការសហប្រជាជាតិក្នុងឆ្នាំ ២០០៦ ដើម្បីបាញ់ឆ្ពោះទៅរកអត្រាប្រេវាឡង់ នៃជំងឺទឹកនោមផ្អែម និងផលប៉ះពាល់ព្រមទាំងអប់រំមនុស្សឱ្យបង្កើនការយកចិត្តទុកដាក់ការពារ និងព្យាបាលជំងឺទឹកនោមផ្អែម។
លោក ទិត ប៊ុនធឿន នាយករងរដ្ឋបាលសាលាខេត្តព្រះសីហនុ ថ្លែងថា ការលើកកម្ពស់ការអប់រំការការពារ និងការគ្រប់គ្រងជំងឺទឹកនោមផ្អែម និងជំរុញពិភពលោករួមគ្នា ដើម្បីប្រយុទ្ធប្រឆាំង និងជំងឺទឹកនោមផ្អែមដែលជាបញ្ហាសុខភាពសកលដ៏សំខាន់ដល់កម្ពុជា និងពិភពលោកទាំងមូល។
លោកថ្លែងថា៖ «មានអត្រាមរណភាព ២ភាគរយ នៃការស្លាប់ជំងឺមិនឆ្លង ហើយប្រេវាឡង់មានរហូតដល់ ៩.៦ភាគរយក្នុងឆ្នាំ ២០១៦។ ផលវិបាកនៃជំងឺទឹកនោមផ្អែម គឺធ្វើឱ្យខូចបេះដូង ភ្នែក តម្រងនោម ដំបៅជើង ដៃ និងអាចកាត់ជើង ដៃជាដើម»។
លោកបន្ថែមថា ការព្យាបាលជំងឺទឹកនោមផ្អែមត្រូវព្យាបាលអស់មួយជីវិត តែជំងឺទឹកនោមផ្អែមអាចការពារបានតាមរយៈការបរិភោគអាហារប្រកបដោយសុខភាព និងហាត់ប្រាណឱ្យបានត្រឹមត្រូវ និងទៀងទាត់៕
