ភ្នំពេញៈ អគ្គស្នងការដ្ឋាននគរបាលជាតិ នឹងសហការជាមួយរដ្ឋបាលរាជធានី-ខេត្ត និងអ្នកពាក់ព័ន្ធនានា ក្នុងការរៀបចំយន្តការ ដើម្បីធានាឱ្យដំណើរការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុបដែលនឹងប្រព្រឹត្តទៅនៅថ្ងៃទី ៥ ខែធ្នូ ឱ្យប្រព្រឹត្តទៅដោយរលូន។
កាលពីថ្ងៃទី ២៥ ខែវិច្ឆិកា ក្រសួងអប់រំ យុវជន និងកីឡា បានរៀបចំកិច្ចប្រជុំសម្របសម្រួលការប្រឡងសញ្ញាបត្រមធ្យមសិក្សាទុតិយភូមិ ដែលមានការចូលរួមពីលោក ស សុខា រដ្ឋលេខាធិការ ក្រសួងអប់រំ, លោកស្រី គឹម សេដ្ឋានី រដ្ឋលេខាធិការ ក្រសួងអប់រំ, លោក ឆាយ គឹមខឿន អគ្គស្នងការរងនគរបាលជាតិ ព្រមទាំងថ្នាក់ដឹកនាំ និងមន្រ្តីអប់រំ រួមទាំងតំណាងក្រសួងសុខាភិបាលជាច្រើនរូបទៀតផងដែរ។
នាកិច្ចប្រជុំនោះ លោក ឆាយ គឹមខឿន បានលើកឡើងថា អគ្គស្នងការដ្ឋាននគរបាលជាតិ នឹងសហការជាមួយរដ្ឋបាលរាជធានី-ខេត្ត និងអ្នកពាក់ព័ន្ធនានាក្នុងការរៀបចំយន្តការនានា ដើម្បីធានាឱ្យដំណើរការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង នៅ ៥ ធ្នូ ២០២២ ខាងមុខនេះប្រព្រឹត្តទៅបានដោយរលូន។
តាមរយៈលទ្ធផលនេះបានបញ្ជាក់ថា ៖ «អគ្គស្នងការដ្ឋាននគរបាលជាតិ នឹងការពារសុវត្ថិភាពនៃការដឹកជញ្ជូន និងការរក្សាទុកដាក់វិញ្ញាសា និងសន្លឹកកិច្ចការបេក្ខជន ការចាត់ចែងកម្លាំងប្រចាំការ និងចល័តនៅតាមមណ្ឌលប្រឡងនានា ការរក្សាសុវត្ថិភាពបេក្ខជន គណៈមេប្រយោគ និងគណៈកម្មការនានា ការសហការដកហូតសំណៅឯកសារ និងការក្សាទុកដាក់សម្ភារនានា ពិសេសការសម្រួលចរាចរណ៍ក្នុងការធ្វើដំណើរទៅមកប្រឡង និងការរក្សាសុវត្ថិភាពកន្លែងស្នាក់នៅរបស់បេក្ខជន និងគណៈមេប្រយោគ»។
ជាមួយគ្នានោះដែរ មន្រ្តីនៃក្រសួងសុខាភិបាល ក៏ដូចជារដ្ឋបាលរាជធានី-ខេត្ត ក៏បានលើកឡើងផងដែរថា នឹងរៀបចំចាត់ចែងយន្តការរក្សាសុខភាព និងសុវត្ថិភាពបេក្ខជនទាំងមុនពេលប្រឡង និងក្នុងដំណើរការសំណេរ និងកំណែ។
លោក ស សុខា ក៏បានស្នើដល់គ្រប់ភាគីពាក់ព័ន្ធទាំងអស់ ត្រូវចូលរួមសហការឱ្យបានជិតស្និទ្ធក្នុងស្មារតីរួម ដោយធានាបាននូវការប្រឡងប្រកបដោយគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន ស្របតាមការយកចិត្តទុកដាក់របស់ប្រមុខរាជរដ្ឋាភិបាល ដែលបានដាក់ចេញនូវទិសដៅកំណែទម្រង់វិស័យអប់រំ។
ទាក់ទងនឹងការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុបនេះ លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានលើកឡើងថា ការប្រឡងនេះ មិនមែនជាការដាក់ទោសទណ្ឌដល់សិស្សនោះទេ ប៉ុន្តែជាការគិតគូរដល់សិស្សក្នុងការរៀនសូត្រ ១២ ឆ្នាំមកនេះ ដើម្បីឱ្យពួកគេទទួលបាននូវផលប្រយោជន៍នៃចំណេះដឹង។
លោកបានលើកឡើងក្នុងសន្និសីទសារព័ត៌មានស្ដីពីដំណើរការរៀបចំការប្រឡងសញ្ញាបត្រមធ្យមសិក្សាទុតិយភូមិកាលពីថ្ងៃទី ២១ ខែវិច្ឆិកា ថា អ្វីដែលក្រសួងគិតគូរក្នុងការរៀបចំការប្រឡង គឺដើម្បីលើកទឹកចិត្តឱ្យសិស្សខិតខំរៀនសូត្រផង និងសំខាន់ឱ្យសិស្សទទួលបានចំណេះដឹង ចំណេះធ្វើមានចរិយាសម្បទាល្អប្រសើរ។
លោកថា ៖ «ការប្រឡងឆ្នាំនេះ មិនតឹងពេកដែលធ្វើឱ្យសិស្សច្រើនធ្លាក់ ប៉ុន្តែក៏មិនធូរពេកដែរ ដើម្បីឱ្យសិស្សអាចទៅរៀនឧត្តមសិក្សា និងសិក្សានៅក្រៅប្រទេសបាន»។
សូមបញ្ជាក់ថា ការប្រឡងមធ្យមសិក្សាទុតិយភូមិឆ្នាំ ២០២២ នេះមានបេក្ខជនសរុបចំនួន ១២៨ ១៣៤ នាក់ដែលមានបេក្ខជនជានារីចំនួន ៦៨ ៧៧១ នាក់ មានមណ្ឌលប្រឡងសរុបទាំងអស់ ២២១ មណ្ឌល ត្រូវជា ៥ ១៧៤ បន្ទប់។
ក្រសួងអប់រំសង្ឃឹមថា លទ្ធផលនៃការប្រឡងសញ្ញាបត្រមធ្យមសិក្សាទុតិយភូមិអាចនឹងប្រកាសបាននៅថ្ងៃទី ២៧ ខែធ្នូ សម្រាប់រាជធានីភ្នំពេញ និងខេត្តកណ្តាល និងថ្ងៃទី ២៨ ខែធ្នូ សម្រាប់ខេត្តផ្សេងៗទៀត៕