ភ្នំពេញៈ តាមរយៈកិច្ចសំណេះសំណាលជាមួយមន្ត្រីគណបក្សប្រជាជនកម្ពុជា លោកនាយករដ្ឋមន្ត្រី ហ៊ុន សែន បានយកឱកាស ជំរុញឱ្យអាជ្ញាធរត្រូវយកចិត្តទុកដាក់ដោះស្រាយជម្លោះដីធ្លី និងដោះស្រាយបញ្ហារបស់កម្មករដែលមានជម្លោះជាមួយ ក្រុមហ៊ុនឱ្យមានប្រសិទ្ធភាព ចៀសវាងបង្កនូវបញ្ហានានា។
ក្នុងពិធីសំណេះសំណាលជាមួយ មន្ត្រីគណបក្សប្រជាជនកម្ពុជា នៅរាជធានីភ្នំពេញជាង ៣ ពាន់នាក់ កាលពីថ្ងៃទី ២៦ ខែវិច្ឆិកា លោកនាយករដ្ឋមន្ត្រី ហ៊ុន សែន និងជាប្រធានគណបក្សប្រជាជនកម្ពុជា មានប្រសាសន៍ថា សមាជិក សមាជិកា គណបក្សទាំងអស់ ដែលមានតួនាទីក្នុងរាជរដ្ឋាភិបាលត្រូវបន្តយកចិត្តទុកដាក់បំពេញតួនាទីភារកិច្ចបម្រើជាតិ និងប្រជាជន ជាពិសេសបន្តការយកចិត្តទុកដាក់រក្សាសន្តិសុខ សណ្ដាប់ធ្នាប់ សង្គម ដោយអនុវត្ត គោលនយោបាយភូមិ ឃុំ មានសុវត្ថិភាព រួមមាន ការបង្ក្រាបបទល្មើសផ្សេងៗ ដូចជា ចោរឆក់ ចោរប្លន់ និងការជួញដូរគ្រឿងញៀន ជាដើម ដើម្បីផ្តល់ភាពកក់ក្តៅ និងធានាដល់សុវត្ថិភាពនៃការរស់នៅរបស់ប្រជាពលរដ្ឋ។
ទន្ទឹមនឹងនេះដែរ លោកបានឆ្លៀតឱកាសជំរុញទៅអាជ្ញាធរ ត្រូវយកចិត្តទុកដាក់ក្នុងការដោះស្រាយបញ្ហាដីធ្លី ដែលជាជំងឺរ៉ាំរ៉ៃ ឱ្យបានលឿន និងមានប្រសិទ្ធភាព។ លោកបញ្ជាក់ថា៖ «អាជ្ញាធរត្រូវយកចិត្តទុកដាក់ដោះស្រាយជម្លោះដីធ្លីជូនប្រជាពលរដ្ឋឱ្យបានរហ័ស និងមានប្រសិទ្ធភាព ផ្តល់នូវសេវាចាំបាច់នានាជូនប្រជាពលរដ្ឋឱ្យបានឆាប់រហ័ស ចៀសវាងបង្កនូវបញ្ហានានា»។
លោក ហ៊ុន សែន ក៏បានជំរុញឱ្យ មានការខិតខំដោះស្រាយបញ្ហាជម្លោះរវាងកម្មករជាមួយរោងចក្រ ឬបុគ្គលិកក្រុមហ៊ុនជាមួយក្រុមហ៊ុន និងលើកទឹកចិត្តឱ្យអាជ្ញាធរព្យាយាមដោះស្រាយបញ្ហាជម្លោះរបស់ប្រជាពលរដ្ឋតាមបែបក្រៅប្រព័ន្ធតុលាការផងដែរ។
នាយកទទួលបន្ទុកកិច្ចការទូទៅ នៃអង្គការការពារសិទ្ធិមនុស្សលីកាដូ លោក អំ សំអាត ថ្លែងថា ការជំរុញតាមរយៈកិច្ចសំណេះសំណាលនេះក៏ជាឱកាសដ៏ល្អមួយ ដើម្បីក្រើនរំឭកអាជ្ញាធរ ក៏ដូចជាសមាជិក សមាជិកាគណបក្សកាន់អំណាចឱ្យយកចិត្តទុកដាក់ដោះស្រាយលើបញ្ហានេះ។
លោកថា៖ «ពីព្រោះយើងដឹងហើយថា ប្រជាពលរដ្ឋ ជាពិសេស កសិករពឹងផ្អែកទៅលើដីធ្លី សម្រាប់ បង្កបង្កើនផល ហើយពលរដ្ឋក៏ត្រូវការដី ដើម្បីលំនៅឋានរបស់ពួកគេ។ អ៊ីចឹង បើសិនជាមិនមានការដោះស្រាយសម្រាប់គាត់ឱ្យបានទាន់ពេលវេលាទេ វាផ្ទុយនឹងគោលនយោបាយរបស់រាជរដ្ឋាភិបាលដែលកាត់បន្ថយភាពក្រីក្រ»។
លោកបន្តថា ទំនាស់ដីធ្លី បើកាលណាឈានដល់ដំណាក់កាល រ៉ាំរ៉ៃ វានឹងជំរុញឱ្យជីវភាពរបស់ប្រជាពលរដ្ឋមានភាពក្រីក្រ ជំរុញឱ្យមានបាតុភាពផ្សេងៗ ដូចជាការតវ៉ា ការធ្វើបាតុកម្ម ហើយជំរុញឱ្យពលរដ្ឋមានការបែកបាក់គ្រួសារ អំពើហិង្សា និងប៉ះពាល់ដល់ស្ត្រីដោយសារបញ្ហាដីធ្លីនេះ។
បើទោះបីជាមានការជំរុញបែបនេះក្តី ប៉ុន្តែលោក អំ សំអាត ដែលជាមន្ត្រីឃ្លាំមើលបញ្ហានេះ ចង់ឃើញអាជ្ញាធរគ្រប់ជាន់ថ្នាក់មានការតាំងចិត្ត និងប្តេជ្ញាចិត្តខ្ពស់ក្នុងការដោះស្រាយដីធ្លីប្រជាពលរដ្ឋ។ នៅពេលរដ្ឋាភិបាល ចាប់ផ្តើម ជំរុញឱ្យមានការដោះស្រាយបញ្ហា ដីធ្លី ដោយឈរលើយន្តការដោះស្រាយប្រកបដោយយុត្តិធម៌ និងត្រឹមត្រូវ បញ្ហាដីធ្លីមួយចំនួន នឹងដោះស្រាយបានចេញច្រើន។
មន្ត្រីសិទ្ធិមនុស្សរូបនេះបញ្ជាក់ថា៖ «ប៉ុន្តែរឿងមួយចំនួន នៅតែបន្តភាពរ៉ាំរ៉ៃ សម្រាប់ប្រជាពលរដ្ឋ។ អ៊ីចឹងខ្ញុំគិតថាបញ្ហាដីធ្លីនេះអាជ្ញាធរ ដែលពាក់ព័ន្ធ ទាល់តែប្តេជ្ញា និងតាំងចិត្តខ្ពស់ក្នុងការដោះស្រាយ។ បើសិនជាសាច់ស្អុយត្រូវតែកាត់ចេញ ដើម្បីដោះស្រាយជូនពលរដ្ឋ ឱ្យទទួលបាននូវយុត្តិធម៌ និងសំណងសមរម្យ»។
លោកបន្ថែមថា ចំណែកបញ្ហាការងាររបស់កម្មករ ក៏មិនខុសពីដីធ្លីដែរ នៅពេលមានវិវាទការងារកើតឡើង ដូចជារឿងក្រុមហ៊ុនណាហ្គាវើលដ៍ ជាមួយបុគ្គលិក និងអតីតបុគ្គលិកដែលកំពុងធ្វើកូដកម្ម បានបង្ហាញផលវិបាកកើតឡើងជាច្រើន។ ការណ៍នេះ វាមិនចំណេញ សម្រាប់រាជរដ្ឋាភិបាលនោះទេ មានតែធ្វើឱ្យរដ្ឋាភិបាលរងការរិះគន់ និងត្រូវបានចោទប្រកាន់ផ្សេងៗដែលប៉ះពាល់ ដល់មុខមាត់រដ្ឋាភិបាល។
ភ្នំពេញ ប៉ុស្តិ៍ មិនអាចសុំអត្ថាធិប្បាយពីលោក សេង ឡូត អ្នកនាំពាក្យក្រសួងរៀបចំដែនដី បាននៅឡើយទេជុំវិញបញ្ហាដីធ្លីនេះនៅថ្ងៃទី ២៧ ខែវិច្ឆិកា។
ទោះយ៉ាងណា ប្រធានគណៈកម្មការដោះស្រាយវិវាទដីធ្លីខេត្តកំពង់ស្ពឺ ធ្លាប់បានបញ្ជាក់ថា អាជ្ញាធរខេត្តតែងជំរុញឱ្យមន្ទីរជំនាញយកចិត្តទុកដាក់ដោះស្រាយ វិវាទដីធ្លី និងពិនិត្យមើលឱ្យបានត្រឹមត្រូវចំពោះអ្នកដែលបានរស់នៅលើដីរដ្ឋក្នុងរយៈពេលយូរស្របតាមការណែនាំរបស់លោកនាយករដ្ឋមន្ត្រី។ ដោយឡែកសម្រាប់ទីតាំងដែលមានភាពអនាធិបតេយ្យខុសនីតិវិធី គឺត្រូវតែធ្វើការដកហូតទុកជាសម្បត្តិរដ្ឋវិញ។
បើតាមក្រសួងរៀបចំដែនដី នគរូបនីយកម្ម និងសំណង់ ការចាប់ផ្តើមអនុវត្តឆ្នាំ ២០០៣ ដល់ដំណាច់ឆ្នាំ ២០២១ គណៈកម្មការសុរិយោដីក្រុង ស្រុក ខណ្ឌ បានទទួលពាក្យបណ្តឹង ៩ ១២៦ ករណី ដោះស្រាយបញ្ចប់នីតិវិធីចំនួន ៨ ៣៤៨ ករណី (ក្នុងនោះ បញ្ចប់ជាស្ថាពរចំនួន ៤ ៣៤៦ ករណី)។
សូមជម្រាបថា នៅឆ្នាំ ២០០១ រាជរដ្ឋាភិបាលកម្ពុជា បានចេញសេចក្តីថ្លែងការណ៍ស្តីពីគោលនយោបាយដីធ្លី។ បន្ថែមពីនេះ នៅឆ្នាំ ២០១២ រដ្ឋាភិបាល ក៏បានចេញសៀវភៅស ស្តីពីគោលនយោបាយដីធ្លីជាមួយនឹងវត្ថុបំណងជាសំខាន់ ក្នុងគោលដៅពង្រឹងសន្តិសុខកម្មសិទ្ធិដីធ្លី និងទីផ្សារដីធ្លី និងទប់ស្កាត់ ឬដោះស្រាយជម្លោះដីធ្លី គ្រប់គ្រងដីធ្លី និងធនធានធម្មជាតិប្រកបដោយសមធម៌ និរន្តរភាព និងមានប្រសិទ្ធភាព ព្រមទាំងជំរុញការបែងចែកដីធ្លីប្រកបដោយសមធម៌៕