.jpg)
(ពីឆ្វេង) លោក យ៉ង សាំងកុមារ លោកនាយករដ្ឋមន្ត្រី ហ៊ុន សែន លោករដ្ឋមន្ត្រីកសិកម្ម ឌិត ទីណា និងលោកឡឹក សុធារ នៅក្នុងជំនួបពិភាក្សាពីម្សិលមិញ។ រូប SPM
ភ្នំពេញៈ សំណើចំនួន ១២ ចំណុចរបស់លោកយ៉ង សាំងកុមារ ត្រូវបានពិភាក្សានិងទទួលឯកភាពជាផ្លូវការពីរដ្ឋាភិបាល ក្នុងការដោះស្រាយបញ្ហាផលិតកម្ម និងទីផ្សារស្រូវអង្ករក្នុងពេលដែលលោកនាយករដ្ឋមន្ត្រី ហ៊ុន សែន បានអនុញ្ញាតឱ្យលោក ឌិត ទីណា រដ្ឋមន្ត្រីកសិកម្មនិងលោក យ៉ង សាំងកុមារ ព្រមទាំងលោក ឡឹក សុធារ អតីតមន្ត្រីជាន់ខ្ពស់គណបក្សប្រជាធិបតេយ្យមូលដ្ឋាន (GDP) ចូលជួបដោយផ្ទាល់។
ជំនួបនេះ ធ្វើឡើងបន្ទាប់ពីអតីតមន្ត្រីជាន់ខ្ពស់គណបក្សប្រជាធិបតេយ្យមូលដ្ឋានទាំង ២ រូបនេះ កាលពីថ្ងៃទី ២៣ ខែវិច្ឆិកា ឆ្នាំ ២០២២ បានស្នើសុំចូលរួមជីវភាពនយោបាយជាមួយគណបក្សប្រជាជនកម្ពុជា។
លោក ហ៊ុន សែន នៅរសៀលថ្ងៃទី ២៨ វិច្ឆិកា បានបង្ហោះសារថា៖ «ទើបជួបពិភាក្សាជាមួយ រដ្ឋមន្ត្រីកសិកម្ម ឌិត ទីណា និងបណ្ឌិត យ៉ង សាំងកុមារ ព្រមទាំងលោក ឡឹក សុធារ លើការងារកសិកម្មដែលលោកទាំង ២ នាក់ទើបមករួមរស់ជាមួយគណបក្សប្រជាជនកម្ពុជា»។
ជាមួយគ្នានេះដែរ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក ឌិត ទីណា បានប្រកាសស្វាគមន៍លោក យ៉ង សាំងកុមារ និងលោក ឡឹក សុធារ ដែលបានសម្រេចចិត្តចូលរួមជីវភាពនយោបាយជាមួយគណបក្សប្រជាជនកម្ពុជា ដើម្បីរួមគ្នាអភិវឌ្ឍវិស័យកសិកម្មកម្ពុជាឈានទៅមុខ។
លោកបានគូសបញ្ជាក់ថា៖ «សម្រាប់រូបខ្ញុំផ្ទាល់ ការចូលរួមនេះឆ្លុះបញ្ចាំងឱ្យឃើញពីឆន្ទៈដ៏មុតស្រួចរបស់លោកទាំង ២ នៅក្នុងវិស័យកសិកម្ម»។
ក្រោយជំនួបលោក យ៉ង សាំងកុមារ ដែលជាអ្នកជំនាញកសិកម្មផងនោះបានបង្ហោះលើបណ្តាញសង្គមថា៖ «នៅព្រឹកថ្ងៃទី ២៨ វិច្ឆិកា ២០២២ រដ្ឋមន្ត្រីក្រសួងកសិកម្ម និងខ្ញុំបានជួបជាមួយសម្តេចនាយករដ្ឋមន្ត្រីពិភាក្សាអស់រយ:ពេលប្រមាណ ២ ម៉ោងក្នុងបរិយាកាសល្អអំពីស្ថានភាពកសិកម្ម ទុក្ខលំបាករបស់កសិករ ទស្សនវិស័យនិងវិធានការកែលម្អជាពិសេសផ្តោតលើវិស័យស្រូវអង្ករនិងវិស័យពាក់ព័ន្ធ ផ្សេងទៀត។ ជាទូទៅយើងមានទស្សនវិស័យដូចគ្នាទាក់ទងនឹងបញ្ហាប្រឈមនិងដំណោះស្រាយក្នុងវិស័យកសិកម្មនៅកម្ពុជា ហើយយើងអាចធ្វើការជាមួយគ្នាបាន»។
លោកយ៉ង សាំងកុមារ ដែលទើបលាលែងពីគណបក្សប្រជាធិបតេយ្យមូលដ្ឋាន ប្រាប់ភ្នំពេញប៉ុស្តិ៍បន្ថែមថា ដើម្បីចូលរួមជាមួយរដ្ឋាភិបាល លើកិច្ចការងារកសិកម្ម លោកបានលើកសំណើចំនួន ១២ ចំណុច ដែលរៀបចំដោយរូបលោក ត្រូវបាន ពិភាក្សានិងទទួលឯកភាពជា ផ្លូវការពីរដ្ឋាភិបាលក្នុងការដោះស្រាយបញ្ហាផលិតកម្មនិងទីផ្សារស្រូវអង្ករ។ លោកបង្ហាញការជឿជាក់ថា នៅពេលអនុវត្តសំណើទាំង ១២ ចំណុចនោះ ទទួលបានជោគជ័យគឺអាចជួយដោះស្រាយបញ្ហាជូនគ្រួសារកសិករខ្មែរជាង ១ លានគ្រួសារបានល្អប្រសើរ។
ជំនួបរវាងលោក ហ៊ុន សែន លោក ឌិត ទីណា លោក យ៉ង សាំងកុមារ និងលោក ឡឹក សុធារ ពីថ្ងៃទី ២៨ វិច្ឆិកា។ រូបថត ធ្វីធើរ ឌិត ទីណា
សំណើ ១២ ចំណុចនោះរួមមាន១ ពង្រឹង និងពង្រីកការស្រាវជ្រាវការផលិត និងផ្គត់ផ្គង់គ្រាប់ពូជស្រូវសុទ្ធល្អដល់កសិករ (ពូជដែលមានតម្រូវការខ្ពស់លើទីផ្សារ)។ ២ បណ្ដុះបណ្ដាលណែនាំ និងផ្ដល់យោបល់ដល់កសិករ ជាពិសេសលើការប្រើប្រាស់ពូជ ធាតុចូល និងការគ្រប់គ្រងក្រោយពេលប្រមូលផល។ ៣ រៀបចំឱ្យមានប្រព័ន្ធគ្រប់គ្រងទិន្នន័យកសិករអ្នកផលិតស្រូវ ដោយធ្វើបច្ចុប្បន្នភាពរាល់រដូវ។ ៤ រៀបចំឱ្យមាន និងពង្រឹងសហគមន៍កសិករអ្នកផលិតនៅតាមភូមិ ឃុំ ដោយមានកន្លែងប្រមូលផ្ដុំ កន្លែងសម្ងួត និងឃ្លាំងស្តុកស្រូវ។ ទី ៥ រៀបចំឱ្យមានប្រព័ន្ធទិន្នន័យរោងម៉ាស៊ីនកិនស្រូវ ដោយសហការជាមួយ CRF។
ចំណែកសំណើទី ៦ សម្របសម្រួលឱ្យមានការសហការ និងកិច្ចសន្យារវាងសហគមន៍កសិករនិងរោងម៉ាស៊ីនកិនស្រូវ និងក្រុមហ៊ុនជំនួញស្រូវអង្ករ។ ៧ កំណត់ស្តង់ដា និងយន្តការត្រួតពិនិត្យ និងបញ្ជាក់គុណភាពស្រូវ និងការកំណត់តម្លៃអប្បបរមាស្រូវតាមប្រភេទពូជ (ពូជក្រអូបប្រណីត ពូជក្រអូបធម្មតា និងពូជស្រូវប្រាំងធម្មតា)។ ៨ ធ្វើការជាមួយធនាគារកសិកម្ម និងអភិវឌ្ឍន៍ជនបទ និងស្ថាប័នហិរញ្ញវត្ថុនានា ដើម្បីបង្កើនទុនដល់រោងម៉ាស៊ីនក្រុមហ៊ុនជំនួញស្រូវអង្ករ និងសហគមន៍កសិករ។ ៩ រៀបចំឱ្យមានគណៈកម្មាធិការដឹកនាំគម្រោងនៅក្រោមក្រសួងកសិកម្ម រុក្ខាប្រមាញ់ និងនេសាទ ដោយមានការចូលរួមពីតំណាងស្ថាប័នពាក់ព័ន្ធ និងទី១០ នាយកដ្ឋានដំណាំស្រូវនៃអគ្គនាយកដ្ឋានកសិកម្ម និងមន្ទីរកសិកម្មខេត្ត ទទួលខុសត្រូវលើការអនុវត្តគម្រោង ដោយមានមន្ត្រីកសិកម្ម ធ្វើការផ្ទាល់ជាមួយកសិករ និងអាជ្ញាធរមូលដ្ឋាន។ ចំណែកសំណើ ២ ទៀតរួមមានរៀបចំឱ្យមានប្រព័ន្ធត្រួតពិនិត្យ និងវាយតម្លៃគម្រោងដោយមានការចូលរួមពីភាគីពាក់ព័ន្ធ និងប្រើប្រាស់ថវិកាជាតិ និងថវិកាមកពីដៃគូអភិវឌ្ឍន៍នានា ដើម្បីអនុវត្តគម្រោងនេះ។
លោកបានបន្ថែមថា ក្រៅពីចំណុចទាំងនេះក៏មានចំណុចពាក់ព័ន្ធសំខាន់ៗផ្សេងទៀតដូចជាធារាសាស្ត្រ គ្រឿងយន្តកសិកម្មជាដើម។ ប៉ុន្តែលោកបញ្ជាក់ថា៖ «កិច្ចការទាំងអស់នេះយើងត្រូវការពេលយ៉ាងតិចបំផុត ៥ ឆ្នាំដើម្បី អនុវត្តផែនការនេះបានទូទាំងប្រទេស»។
លោកបានបន្ថែមថា គម្រោងដែលត្រូវបានស្នើឡើងនេះមានគោលបំណងធ្វើឱ្យកសិករមានសមត្ថភាពផលិតស្រូវដែលមានគុណភាពល្អ សម្រាប់ផ្គត់ផ្គង់ទីផ្សារជាមួយថ្លៃដើមទាប និងទទួលបានតម្លៃសមរម្យ។ ចំណែករោងម៉ាស៊ីនកិនស្រូវ ទទួលបានស្រូវល្អក្នុងតម្លៃសមរម្យ សម្រាប់កែច្នៃលក់ទៅកាន់ទីផ្សារក្នុងស្រុក និងក្រៅប្រទេស។
លោកយ៉ង សាំងកុមារ លើកឡើងថា គ្រួសារប្រជាពលរដ្ឋខ្មែរ ដែលភាគច្រើនបំផុតជាកសិករអ្នកធ្វើស្រែកំពុងជួបការលំបាកជាច្រើនដែលបញ្ហានេះនាំមកនូវផលប៉ះពាល់អវិជ្ជមានដល់សង្គមជាតិទាំងមូល។ លោកថា៖ «ក្នុងកិច្ចការងារនេះ យើងត្រូវការសហការគ្នាដើម្បីចូលរួមដោះស្រាយបញ្ហារបស់កសិករតាមគោលការណ៍ទុក្ខវេទនារបស់កសិករ ជាទុក្ខវេទនារបស់ជាតិទាំងមូល»៕
វីដេអូ៖
