.jpg)
អនុប្រធានគណបក្សភ្លើងទៀន លោក សុន ឆ័យ នៅមុខសាលាដំបូងរាជធានីភ្នំពេញ កាលពីថ្ងៃទី ១២ ខែកក្កដា ឆ្នាំ ២០២២។ ហេង ជីវ័ន
ភ្នំពេញៈ អនុប្រធានគណបក្សភ្លើងទៀន លោក សុន ឆ័យ អះអាងថា លោកគ្រោងជួបមេធាវីនៅសប្ដាហ៍ក្រោយ ដើម្បីពិភាក្សាជុំវិញការចេញដីការបស់ចៅក្រមសាលាដំបូងរាជធានីភ្នំពេញដែលបានសម្រេចរឹបអូសជាបណ្តោះអាសន្នលើអចលនវត្ថុរបស់លោកដើម្បីការពារប្រយោជន៍គូភាគីតំណាងឱ្យគណបក្សប្រជាជនកម្ពុជា។
ដីកាសម្រេចរបស់ចៅក្រមសាលាដំបូងរាជធានីភ្នំពេញលោក អួង វុទ្ធា ចុះថ្ងៃទី ១១ ខែវិច្ឆិកា ឆ្នាំ ២០២២ បានសម្រេចរឹបអូសជាបណ្តោះអាសន្ននូវអចលនទ្រព្យចំនួន ២ កន្លែង របស់លោក សុន ឆ័យ ដែល ១ កន្លែងនៅរាជធានីភ្នំពេញ និង ១ កន្លែងទៀតនៅខេត្តសៀមរាប។
លោក អួង វុទ្ធា បានបញ្ជាក់នៅក្នុងដីកាថា ការសម្រេចវិធានការបណ្តោះអាសន្ននេះ ធ្វើឡើងតាមសំណើរបស់មេធាវីដើមបណ្តឹងតំណាងឱ្យគណបក្សប្រជាជនកម្ពុជាដែលប្ដឹងសុំឱ្យតុលាការចេញដីកាសម្រេចរក្សាការពាររឹបអូសជាបណ្តោះអាសន្ន។
នៅក្នុងដីកាសម្រេចបន្តថា វិធានការនេះដោយផ្អែកលើសំអាងហេតុតាមពាក្យសុំដីកាសម្រេចរក្សាការពារ របស់លោក គី តិច និងលោក ផូ សុធាផល ជាមេធាវីតំណាងដោយអាណត្តិឱ្យម្ចាស់បំណុលគណបក្សប្រជាជនកម្ពុជា។
ដីកាដដែលសរសេរថា ភាគីដើមបណ្តឹងបានថ្លែងការណ៍ថា កូនបំណុលឈ្មោះសុន ឆ័យ ជាជនជាប់ចោទដែលត្រូវបានតុលាការសម្រេចផ្តន្ទាទោសពិន័យជាប្រាក់ និងទោសបន្ថែមព្រមទាំងបង្គាប់ឱ្យបង់សំណងជូនម្ចាស់បំណុលគណបក្សប្រជាជនកម្ពុជាជាដើមបណ្តឹងរដ្ឋប្បវេណីតាមរយៈសាលក្រមព្រហ្មទណ្ឌរបស់សាលាដំបូងរាជធានីភ្នំពេញ។
ដើមបណ្តឹងបន្តថា ក្រោយពីសាលាដំបូងរាជធានីភ្នំពេញបានចេញសាលក្រមផ្ដន្ទាទោស កូនបំណុលឈ្មោះ សុន ឆ័យ បានបង្ហាញជាក់ស្ដែងនូវភាពរឹងរូស ការបន្តព្រងើយកន្តើយ មិនគោរពច្បាប់ ដោយបានថ្លែងជាសាធារណៈនៅចំពោះមុខមហាជន និងផ្សព្វផ្សាយតាមរយៈវិទ្យុអាស៊ីសេរីកាលពីថ្ងៃទី ៣០ ខែតុលា ឆ្នាំ ២០២២ នៅនាទីទី ១៤:៤៩ ដោយនិយាយថា “...ខ្ញុំអត់មានរឿងអីត្រូវសងអ្នកណាទេ គេយកខ្ញុំទៅធ្វើអីធ្វើទៅ...”។
តាមរយៈសំអាងហេតុ សង្កត់ធ្ងន់ថា «ពាក្យពេចន៍ដែលឈ្មោះ សុន ឆ័យ លើកឡើងនេះ សបញ្ជាក់ថា បើទោះបីតុលាការ សម្រេចបង្គាប់ឱ្យខ្លួនបង់ប្រាក់ពិន័យចូលថវិកាជាតិ និងសងជំងឺចិត្តជូនម្ចាស់បំណុល ជាដើមបណ្តឹងរដ្ឋប្បវេណីសរុបមានចំនួនជាង ៣ ពាន់លានរៀល (៧៥ម៉ឺនដុល្លារ) ក៏ដោយ ក៏កូនបំណុលគ្មានឆន្ទៈបង់ប្រាក់នោះ តាមការសម្រេចរបស់តុលាការនោះឡើយ»។
ដោយយោងសំអាងហេតុនេះ លោក អួង វុទ្ធា បានសម្រេច រឹបអូសជាបណ្តោះអាសន្នលើអចលនវត្ថុ ២ កន្លែងជាទ្រព្យសម្បត្តិកូនបំណុលឈ្មោះ សុន ឆ័យ ដើម្បីចៀសវាងមានការប្រែប្រួលនូវស្ថានភាពបច្ចុប្បន្នលើវត្ថុនៃកម្មវត្ថុវិវាទ និងដើម្បីការពារផលប្រយោជន៍របស់គូភាគី។
លោកបន្ថែមថា៖ «ដើម្បីទទួលបាននូវការលុបចោលការអនុវត្តការរឹបអូសជាបណ្តោះអាសន្ន កូនបំណុលត្រូវដាក់ប្រាក់តម្កល់នៅតុលាការចំនួន ៧៥ ម៉ឺនដុល្លារ ជាប្រាក់រំដោះ»។
យ៉ាងណាក្ដី លោក សុន ឆ័យ ប្រាប់ ភ្នំពេញ ប៉ុស្តិ៍ នៅថ្ងៃទី ២៨ វិច្ឆិកាថា រូបលោកនៅមិនទាន់បានទទួលលិខិតរបស់តុលាការជាផ្លូវការដូចបានផ្សព្វផ្សាយលើបណ្តាញសង្គមនៅឡើយទេ។ លោកថា រឿងក្តីនេះមិនទាន់បញ្ចប់សព្វគ្រប់ទេ ព្រោះនៅមានការងារត្រូវប្តឹងទៅសាលាឧទ្ធរណ៍ និងតុលាការកំពូលបន្តទៀតទាល់តែមានការសម្រេចស្ថាពរពីតុលាការ។
លោកថា៖ «ភាគីដើមទាមទារឱ្យធ្វើបែបណានោះ រូបខ្ញុំនឹងពិនិត្យទៅលើការទាមទារនោះ ប៉ុន្តែខ្ញុំយល់ថារឿងនេះនៅមិនទាន់បញ្ចប់រឿងក្តីនៅឡើយដែលដើមចោទបារម្ភក្រែងខ្ញុំប្តូរទីលំនៅឬផ្ទេរកម្មសិទ្ធិ ខ្ញុំគិតថា ធ្វើមិនកើតខាងអាជ្ញាធរមូលដ្ឋាន ក្រសួងរៀបចំដែនដី នគរូបនីយកម្ម និងសំណង់ គេមិនឱ្យយើងធ្វើកើតទេ ដូច្នេះខ្ញុំយល់ថាវាមិនចាំបាច់ចេញដីការឹបអូសទេ»។
លោកថ្លែងថា វិធានការនេះ វានឹងប៉ះពាល់ដល់សកម្មភាពគណបក្សភ្លើងទៀន ខណៈការបោះឆ្នោតកាន់តែខិតជិតមកដល់។
លោកថា៖ «បើគេរឹបអូស ខ្ញុំអត់កន្លែងនៅ ព្រោះខ្ញុំកំពុងរស់នៅសព្វថ្ងៃផ្ទះនៅភ្នំពេញ ចំណែកផ្ទះនៅខេត្តមានផ្ទះល្វែង ១។ខ្ញុំអត់មានលុយដាក់តម្កល់ទេ សូម្បីតែ ១ ភាគរយនៃប្រាក់ដែលតុលាការតម្រូវឱ្យបង់ក៏ខ្ញុំអត់មានផង ដូច្នេះខ្ញុំមិនដឹងធ្វើយ៉ាងម៉េចទេ ហើយខ្ញុំនឹងជួបមេធាវីខ្ញុំនៅសប្តាហ៍ក្រោយ ដើម្បីពិភាក្សាលើរឿងនេះ»។
អ្នកវិភាគនយោបាយលោក គិន ភា ថ្លែងថា ជាធម្មតា ភាគីចុងចោទអត់មានប្រាក់តម្កល់ គេត្រូវរឹបអូសទ្រព្យជារឿងដែលត្រូវបានអនុញ្ញាតដោយច្បាប់ អត់ខុសទេ។ ប៉ុន្តែករណីលោក សុន ឆ័យ នេះ លោកថ្លែងថា ថ្វីបើត្រូវបានផ្តន្ទាទោសពីបទព្រហ្មទណ្ឌ ឬបទអ្វីផ្សេង ប៉ុន្តែទស្សនៈមួយចំនួននៅតែយល់ថា មានលក្ខណៈនយោបាយ។
លោកថា៖ «អ៊ីចឹងហើយបានជាការអនុវត្តសាលក្រម ឬក៏ធ្វើអីមួយឱ្យវាមានទិដ្ឋភាពរលូន គឺមិនរលូន នៅក្នុងទស្សនៈមហាជនមួយចំនួនទេ គេគិតថា រឿងនេះជារឿងនយោបាយគួរដោះស្រាយតាមស្ថានភាពនយោបាយឬគេនិយាយថាព្រោះជាលក្ខណៈបញ្ចេញយោបល់ ការវិភាគទៅលើការបោះឆ្នោត»។
លោកបន្តថា ករណីនេះមិនមែនជារឿងរួមទេ គឺរឿងបុគ្គលរបស់លោក សុន ឆ័យ រវាងគណបក្សប្រជាជនកម្ពុជា និង (គជប) ប៉ុន្តែតិច ឬច្រើនវាជះឥទ្ធិពលទៅដល់អ្នកផ្សេងដែលអាចមានអារម្មណ៍ខ្លាចរអាក្នុងការនិយាយស្តី ប៉ុន្តែក៏ធ្វើឱ្យការនិយាយស្តីរបស់អ្នកនយោបាយកាន់តែមានការទទួលខុសត្រូវជាងមុន ប្រយ័ត្នប្រយែងជាងមុន។
សូមជម្រាបថា ចៅក្រមសាលាដំបូងរាជធានីភ្នំពេញបានសម្រេចឱ្យលោក សុន ឆ័យ ចាញ់ក្តីក្នុងសំណុំរឿងបរិហារកេរ្តិ៍ចំនួន ២ ដែលប្ដឹងដោយគណបក្សប្រជាជនកម្ពុជា និងគណៈកម្មាធិការជាតិរៀបចំការបោះឆ្នោត បន្ទាប់ពីរូបលោករិះគន់ថា ការបោះឆ្នោតប្រព្រឹត្តទៅដោយមិនយុត្តិធម៌ដោយមានការទិញ និងលួចបន្លំសន្លឹកឆ្នោត។
ក្នុងនោះតុលាការបង្គាប់ឱ្យលោក សុន ឆ័យ សងជំងឺចិត្តទៅគណបក្សកាន់អំណាចចំនួន ៣ ពាន់លានរៀលនិងប្រាក់ពិន័យចូលរដ្ឋ ៨ លានរៀល។ចំណែកបណ្តឹង (គជប) ចៅក្រមបានបង្គាប់ឱ្យបង់ប្រាក់ចំនួន ៩ លានរៀលចូលរដ្ឋផងដែរ៕
