.jpg)
រថយន្តសង្គ្រោះបើកតាមបណ្ដោយផ្លូវព្រះសីហនុ នាពេលកន្លងទៅ។ ហេង ជីវ័ន
ភ្នំពេញៈ ក្រសួងសុខាភិបាល ណែនាំជាថ្មីដល់អភិបាលរាជធានី-ខេត្តទាំងអស់ឱ្យធ្វើការពង្រឹងសេវា សង្គ្រោះបន្ទាន់ក្នុងមន្ទីរពេទ្យ សេវារថយន្តសង្គ្រោះ និងមិនត្រូវយកលុយពីអ្នករងគ្រោះថ្នាក់ចរាចរណ៍ សម្រាប់សេវាដឹកជញ្ជូនឡើយ។
តាមរយៈលិខិតផ្ញើជូនគណៈអភិបាលរាជធានី-ខេត្ត កាលពីថ្ងៃទី ២៧ វិច្ឆិកា លោក ម៉ម ប៊ុនហេង រដ្ឋមន្ត្រីក្រសួងសុខាភិបាល បានប្រាប់បណ្តាខេត្ត ត្រូវធ្វើការពង្រឹងសេវាសង្គ្រោះបន្ទាន់ក្នុងមន្ទីរពេទ្យ សេវារថយន្តសង្គ្រោះ ដើម្បីជួយសង្គ្រោះបន្ទាន់ ឬដឹកអ្នករងរបួសធ្ងន់ធ្ងរ ជាពិសេសអ្នករងគ្រោះថ្នាក់ចរាចរណ៍ ដោយមិនតម្រូវឱ្យបង់ថ្លៃសេវាដឹកជញ្ជូន និងសេវារថយន្តដឹកសព (របស់មន្ទីរពេទ្យ) ទៅលំនៅឋាននៃសព។
លោកបានបញ្ជាក់ថា៖ «ខ្ញុំសូមជម្រាបជូន ឯកឧត្តម លោកជំទាវ មេត្តាជ្រាបថា ក្រសួងធ្លាប់បានធ្វើការណែនាំករណីរថយន្តសង្គ្រោះ បន្ទាន់ដឹកអ្នករងគ្រោះដោយគ្រោះថ្នាក់ចរាចរណ៍ដោយមិនតម្រូវឱ្យបង់ថ្លៃសេវា និងរួមទាំងរថយន្តដឹកសព (ស្លាប់ក្នុងមន្ទីរពេទ្យ ឬដោយគ្រោះថ្នាក់ចរាចរណ៍) ដឹកពីមន្ទីរពេទ្យ ឬកន្លែងគ្រោះថ្នាក់ចរាចរណ៍ទៅកាន់លំនៅឋានសព»។
លោករដ្ឋមន្ត្រីបន្តថា កន្លងមកមន្ទីរសុខាភិបាល នៃរដ្ឋបាលរាជធានី-ខេត្តទាំងអស់ ក៏បានណែនាំដល់មន្ទីរពេទ្យ មណ្ឌលសុខភាព ដើម្បីសហការគ្នា ពង្រឹងសេវារថយន្តសង្គ្រោះបន្ទាន់។ ជាពិសេស សម្រាប់អ្នករងគ្រោះថ្នាក់ចរាចរណ៍ បាក់បែកឆ្អឹង ហូរឈាម ឬសន្លប់ត្រូវការសង្គ្រោះ អាយុជីវិត ដើម្បីចូលរួមចំណែកកាត់បន្ថយអត្រាស្លាប់ដោយគ្រោះថ្នាក់ចរាចរណ៍។
លោក ម៉ម ប៊ុនហេង បន្តថា៖ «អភិបាលរាជធានី-ខេត្តទាំងអស់ត្រូវយកចិត្តទុកដាក់ណែនាំឱ្យប្រធានមន្ទីរសុខាភិបាលពង្រឹងសេវាសង្គ្រោះបន្ទាន់ក្នុងមន្ទីរពេទ្យ សេវារថយន្តគិលានសង្គ្រោះ ដើម្បីជួយសង្គ្រោះបន្ទាន់ ឬដឹកអ្នករងរបួសធ្ងន់ធ្ងរ»។
លោកបញ្ជាក់ថា៖ «ជាពិសេសអ្នករងគ្រោះថ្នាក់ចរាចរណ៍ដោយមិនតម្រូវឱ្យបង់ថ្លៃសេវាដឹកជញ្ជូន និងសេវារថយន្តដឹកសពទៅលំនៅឋាននៃសព ដោយការទទួលខុសត្រូវខ្ពស់»។
ទាក់ទងនឹងការណែនាំនេះ លោកវ៉ី សំណាង អភិបាលខេត្ត-កំពង់ស្ពឺ ប្រាប់នៅថ្ងៃទី ២៨ វិច្ឆិកាថា នេះជាការណែនាំបន្ថែមរបស់ក្រសួងសុខាភិបាល ប៉ុន្តែកន្លងមក ខេត្តកំពង់ស្ពឺបានខិតខំធ្វើការងារ នេះគ្រប់សព្វទាំងអស់ រួមទាំងក្នុងអំឡុងពេលនៃយុទ្ធនាការប្រយុទ្ធនឹងកូវីដ ១៩ ផងដែរ។
លោកថ្លែងថា៖ «វាមិនមានជាបញ្ហាចោទនោះទេ សម្រាប់ខេត្តយើង។ ការណែនាំរបស់រដ្ឋមន្ត្រីក្រសួងសុខាភិបាល គឺជារឿងត្រឹមត្រូវ ហើយក៏យើងបានខិតខំធ្វើតាមតាំងពីដើមរៀងមក ដោយគ្រាន់តែសេវាដឹកជញ្ជូនអ្នកជំងឺពីមុនគេយក គឺគេយកសម្រាប់ថ្លៃប្រេង។ តែមកដល់ឥឡូវ គាត់ណែនាំមិនឱ្យយកថ្លៃសេវា អ៊ីចឹងវាជាបន្ទុកបន្ថែមដោះស្រាយរបស់យើងទៀត ប៉ុន្តែវាមិនមែនជាបញ្ហាអីនោះទេ»។
លោក វ៉ី សំណាង ពន្យល់ថា រយៈពេលប្រមាណជាជិត ១០ ឆ្នាំកន្លងមកនេះ ការផ្តល់សេវាដឹកជញ្ជូនអ្នកជំងឺដែលគ្រោះថ្នាក់ចរាចរណ៍ និងការដឹកសពទៅដល់ផ្ទះជនរងគ្រោះ គឺខេត្តមិនដែលយកសេវានៃការដឹកជញ្ជូនទាំងអស់នេះឡើយ។
លោកអភិបាលខេត្ត បញ្ជាក់ថា សម្រាប់ខេត្តកំពង់ស្ពឺ លោកមិនដែលជួប ឬឮថា មានករណី ឬព្រឹត្តិការណ៍ ដែលរថយន្តសង្គ្រោះបន្ទាន់ដណ្តើមដឹកអ្នកជំងឺនោះទេ ហើយលោកក៏មិនចង់ឱ្យមានករណីបែបនេះកើតមានក្នុងខេត្តរបស់លោកឡើយ។
ទន្ទឹមនឹងនេះ អគ្គលេខាធិការនៃរាជបណ្ឌិត្យសភាកម្ពុជា លោក យង់ ពៅ បានថ្លែងថា បើនិយាយពីទិដ្ឋភាពនយោបាយទៅលើបញ្ហាកូវីដ ១៩ កម្ពុជាធ្វើបានជោគជ័យ។ ប៉ុន្តែបើមើលទៅលើទិដ្ឋភាពសង្គមជាទូទៅ បើមើលនៅតាមច្រកព្រំដែនវៀតណាម និងថៃ គឺមានប្រជាពលរដ្ឋខ្មែរទៅព្យាបាលនៅក្រៅប្រទេសច្រើន។
លោកថ្លែងថា៖ «ការគ្រប់គ្រងសេវាសុខភាពសាធារណៈ ដូចជាជំងឺកូវីដ ១៩ គឺជោគជ័យហើយ ប៉ុន្តែ ការព្យាបាលជាក់ស្តែង ក្រមសីលធម៌ វិជ្ជាជីវៈនៅមានបញ្ហាដែលធ្វើឱ្យ ប្រជាពលរដ្ឋយើងមានរំហូរទៅព្យាបាលនៅក្រៅ។ចំណុច ១ ទៀត គឺទាក់ទងនឹងឡានសង្គ្រោះបន្ទាន់តែម្តង ជាពិសេសទិដ្ឋភាពនៅពេលមានគ្រោះថ្នាក់ចរាចរណ៍»។
លោក យង់ ពៅ បន្តថា រថយន្តសង្គ្រោះបន្ទាន់មួយចំនួន ហាក់បីដូចជាប្រជែងគ្នាយកអ្នកជំងឺនៅពេលមានគ្រោះថ្នាក់ចរាចរណ៍ ឬគ្រោះថ្នាក់អ្វីមួយទៅព្យាបាល ដោយមិនបានគិតថា តើមន្ទីរពេទ្យ ឬគ្លីនិករបស់ខ្លួន មានសម្ភារវេជ្ជសាស្ត្រគាំទ្រក្នុងការព្យាបាលបាន ឬមិនបាននោះឡើយ។
លោកថា៖ «ខ្ញុំក៏ធ្លាប់គ្រោះថ្នាក់ ហើយមានការដណ្តើមគ្នាយកទៅ ព្យាបាលដែរ ហើយខ្ញុំគិតថា នេះបញ្ហា ១ គ្រោះថ្នាក់ណាស់ ដែលមាន ការដណ្តើមអ្នកជំងឺយកទៅដាក់ក្នុងឡាន ដូចយើងប្រើពាក្យថា រកស៊ីចាប់ម៉ូយ ដោយធ្វើយ៉ាងណាយកម៉ូយឱ្យបានទៅសិន»។
ក្រសួងសុខាភិបាល គួរតែមានគោលការណ៍ច្បាស់លាស់ក្នុងការអនុញ្ញាតឱ្យមានឡានសង្គ្រោះបន្ទាន់ដែលមិនមានសម្ភារគ្រប់គ្រាន់សម្រាប់ព្យាបាលជំងឺ ឬសង្គ្រោះបន្ទាន់ណាមួយ មុននឹងឱ្យបំពេញកិច្ចការ។ នេះជាការបញ្ជាក់របស់លោកយង់ ពៅ។
សូមរំឭកថា កាលពីថ្ងៃទី ១៥ ខែសីហា ក្រសួងសុខាភិបាលបានចេញលិខិតព្រមានដល់ម្ចាស់ គ្លីនិកឯកជនទាំងអស់ដែលនៅបន្ត ប្រើប្រាស់រថយន្តគិលានសង្គ្រោះ ផ្ទាល់ខ្លួនទៅដឹកអ្នករបួសឬសាកសព ដោយគ្រោះថ្នាក់ចរាចរណ៍ នៅតាមដងផ្លូវយកទៅព្យាបាលនៅគ្លីនិករបស់ខ្លួន ដែលករណីនេះ ធ្វើឱ្យជះឥទ្ធិពលមិនល្អដល់វិស័យសុខាភិបាលទាំងមូល និងសេចក្ដីថ្លៃថ្នូររបស់គ្រូពេទ្យដទៃទៀត។
លោកនាយករដ្ឋមន្ត្រី ហ៊ុន សែន កាលពីឆ្នាំ ២០០៨ ធ្លាប់បានរិះគន់ យ៉ាងខ្លាំងចំពោះរថយន្តគិលានសង្គ្រោះឯកជន ដោយលោកបានលើកឡើងថា រថយន្តទាំងនោះមិន បានជួយប្រជាជនទេ តែធ្វើឱ្យមាន គ្រោះថ្នាក់ដល់ប្រជាជនទៅវិញ ពេលខ្លះបានដណ្ដើមគ្នាយកអ្នកជំងឺដូចជាដណ្តើមទំនិញ៕
