សៀមរាបៈ មន្ទីរពេទ្យខេត្តសៀមរាបប្រកាសទទួលពិនិត្យសុខភាពមាត់ស្បូន ដើម្បីរកមើលជំងឺមហារីកជូនប្រជាពលរដ្ឋជាស្ត្រីអាយុចាប់ពី ២៥ ឆ្នាំ ដល់ ៤៩ ឆ្នាំ ដោយឥតគិតថ្លៃ រយៈពេល ១០ ថ្ងៃ ខណៈការសាងសង់អគារមន្ទីរពេទ្យថ្មីជាជំនួយរបស់អង្គការ JICA គ្រោងនឹងបញ្ចប់នៅខែកញ្ញា ឆ្នាំ ២០២៣ ខាងមុខ។
កាលពីរសៀលថ្ងៃទី ២៨ ខែវិច្ឆិកា ឆ្នាំ ២០២២ លោក ម៉ម ប៊ុនហេង រដ្ឋមន្ត្រីក្រសួងសុខាភិបាលបានចុះពិនិត្យមើលដោយផ្ទាល់នៅមន្ទីរពេទ្យបង្អែកខេត្តសៀមរាប ជុំវិញដំណើរការសាងសង់អគារពេទ្យមន្ទីរពេទ្យថ្មី ដែលជាជំនួយរបស់ជប៉ុន ដោយគ្រោងនឹងបញ្ចប់នៅចុងឆ្នាំ ២០២៣ ខណៈបច្ចុប្បន្នទើបសាងសង់បាន២៨ភាគរយ។
ក្នុងឱកាសនោះ លោក ម៉ម ប៊ុនហេង បានលើកឡើងថា ការពង្រីកអគារនេះ គឺដើម្បីឆ្លើយតបទៅនឹងតម្រូវការប្រជាពលរដ្ឋ និងភ្ញៀវទេសចរជាតិ និងអន្តរជាតិ ខណៈមានអ្នកជំងឺចូលមកសម្រាកព្យាបាលនៅតែមានចំនួនច្រើន។ លោកបានបន្តថា ជំនួយឧបត្ថម្ភរបស់ប្រទេសជប៉ុន ក្នុងការសាងសង់អគារមន្ទីរពេទ្យ និងការបំពាក់បរិក្ខារពេទ្យទំនើបៗ ពិតជាមានសារៈសំខាន់ណាស់ ដើម្បីពង្រីកសេវាឱ្យកាន់តែល្អប្រសើរ។
លោកបានបញ្ជាក់ថា៖ «ក៏ដូចជាគោលដៅរបស់រាជរដ្ឋាភិបាល ការពង្រីកអគារនេះ គឺស្របទៅតាមតម្រូវការរបស់ប្រជាពលរដ្ឋ ក៏ដូចជាគោលដៅរបស់រដ្ឋាភិបាលក្នុងការធ្វើឱ្យការផ្តល់សេវាសុខាភិបាលនៅក្នុងតំបន់ឱ្យកាន់តែល្អប្រសើរ មានទំនើបកម្មនៃសេវាសុខាភិបាល។ ដោយឡែកនៅពេលអគារនេះសាងសង់និងបំពាក់បរិក្ខារពេទ្យទំនើបៗរួចរាល់នៅឆ្នាំ ២០២៣ មន្ទីរពេទ្យបង្អែកខេត្តសៀមរាបនេះ នឹងក្លាយជាមន្ទីរពេទ្យទំនើប១នៅក្នុងតំបន់»។
រដ្ឋាភិបាលជប៉ុន តាមរយៈទីភ្នាក់ងារសហប្រតិបត្តិការអន្តរជាតិ(JICA) បានផ្តល់ថវិកាសម្រាប់ការសាងសង់នូវអគារមន្ទីរពេទ្យបង្អែកខេត្តសៀមរាប ១ ខ្នង ដែលមានផ្ទៃក្រឡាសំណង់ទំហំ ៧ ២៦០ ម៉ែត្រការ៉េ កម្ពស់ ៤ ជាន់ ប្រវែង ២៥ ម៉ែត្រគុណនឹង ៦៩ ម៉ែត្រ ខណៈអគានេះ បានដំណើរការសាងសង់ចាប់តាំងពីខែធ្នូ ឆ្នាំ ២០២១ មក ដែលអគារ ១ ខ្នងនេះ ប្រើប្រាស់សម្រាប់សេវាឯកទេសវះកាត់សេវាសង្គ្រោះបន្ទាន់ និងសេវាពាក់ព័ន្ធផ្សេងៗជាច្រើនទៀត។
លោក ប៉ែន ផលគុណ ប្រធានមន្ទីរពេទ្យបង្អែកខេត្តសៀមរាបបានថ្លែងថា ការសាងសង់អគារថ្មីនេះ សបញ្ជាក់ឱ្យឃើញថា មន្ទីរពេទ្យបង្អែកខេត្តសៀមរាប បាននិងកំពុងពង្រីកខ្លួនកាន់តែធំ និងរឹងមាំជាបន្តបន្ទាប់ដើម្បីធានាបាននូវគុណភាព និងប្រសិទ្ធភាពក្នុងការផ្តល់សេវាសុខភាពរបស់ខ្លួន ក្រោមការយកចិត្តទុកដាក់ពីថ្នាក់ដឹកនាំកំពូលរបស់ក្រសួងសុខាភិបាល និងមន្ទីរសុខាភិបាលនៃរដ្ឋបាលខេត្ត។
ជាមួយគ្នានេះ លោកក៏បានប្រកាសដែរថា៖ «ចាប់ពីថ្ងៃទី ១ ខែធ្នូ ដល់ថ្ងៃទី ១០ ខែធ្នូ ឆ្នាំ ២០២២ ខាងមុខនេះ មន្ទីរពេទ្យបង្អែកខេត្តសៀមរាបនឹងទទួលពិនិត្យសុខភាពមាត់ស្បូន ដើម្បីរកមើលជំងឺមហារីកជូនបងប្អូនស្ត្រី អាយុចាប់ពី ២៥ ឆ្នាំ ដល់ ៤៩ ឆ្នាំ ដោយឥតគិតថ្លៃ។ រាល់ព័ត៌មានលម្អិតសូមមកទាក់ទងនៅអគារសម្ភព និងរោគស្ត្រីក្នុងមន្ទីរពេទ្យ រៀងរាល់ម៉ោងធ្វើការ»។
កាលពីថ្មីៗនេះ នាយកដ្ឋានការពារសុខភាពនៃក្រសួងសុខាភិបាលបានប្រកាសឱ្យស្ត្រីអាយុចន្លោះចាប់ពី ២៥ ឆ្នាំ ដល់ ៤៩ ឆ្នាំ អាចទៅពិនិត្យសុខភាពមាត់ស្បូនដើម្បីស្រាវជ្រាវរកជំងឺមហារីកមាត់ស្បូនដោយមិនមានការបង់ថ្លៃនៅតាមមណ្ឌលសុខភាព និងមន្ទីរពេទ្យដែលស្ថិតនៅក្នុងស្រុកប្រតិបត្តិសៀមរាប និងស្រុកប្រតិបត្តិសូទ្រនិគម ខេត្តសៀមរាប។
សេចក្តីប្រកាសដដែលបានបញ្ជាក់ថា «មហារីកមាត់ស្បូនគឺជាជំងឹមហារីកដែលកើតមានជាទូទៅចំពោះស្ត្រីនៅក្នុងប្រទេសកម្ពុជា។ មានស្ត្រីប្រហែល៣ ទៅ ៤ នាក់ ក្នុង ១ ថ្ងៃ ត្រូវបានរកឃើញថា កើតជំងឺមហារីកនេះ ហើយភាគច្រើនគឺហួសពេលក្នុងការព្យាបាលទៅហើយ»។
នាយកដ្ឋានការពារសុខភាពនៃក្រសួងសុខាភិបាល បានប្រាប់ពីវិធីបង្ការជំងឺមហារីកមាត់ស្បូន ដោយណែនាំឱ្យស្ត្រីគ្រប់រូប គួរចាក់វ៉ាក់សាំងការពារជំងឺមហារីកមាត់ស្បូន និងត្រូវធ្វើតេស្តដើម្បីស្រាវជ្រាវរកជំងឺនេះនៅក្នុងដំណាក់ដំបូង ដែលមានរយៈពេលយូរ ហើយជាពេលដែល «ចំណុចមិនធម្មតា» នៅលើមាត់ស្បូនអាចរកឃើញដោយឆ្មបជំនាញតាមរយៈការពិនិត្យបែបសាមញ្ញ។
នាយកដ្ឋានការពារសុខភាពបានបញ្ជាក់ថា «នៅពេលរកឃើញ «ចំណុចមិនធម្មតា» នៅលើមាត់ស្បូនត្រូវធ្វើការព្យាបាលភ្លាមៗ ហើយការព្យាបាលមានភាពងាយស្រួល និងមិនមានការឈឺចាប់ទេ។ ស្ត្រីត្រូវទៅពិនិត្យតាមដានមាត់ស្បូនជាថ្មីម្តងទៀត បន្ទាប់ពីបានទទួលការព្យាបាល ១ ឆ្នាំក្រោយ»។
បើតាមក្រសួងសុខាភិបាល កត្តាគ្រោះថ្នាក់នៃជំងឺមហារីកមាត់ស្បូន គឺងាយប្រឈមចំពោះស្ត្រីដែលមានការបង្ករោគដោយវីរុស Human Papuloma ចំពោះស្ត្រីដែលមានការរួមភេទមុនអាយុ ២០ ចំពោះស្ត្រីដែលមានកូនវ័យក្មេងពេក និងកូនច្រើនជាង ៥ នាក់ ចំពោះស្ត្រីដែលមានដៃគូរួមភេទច្រើនប្រឈមមុខនឹងការកើតជំងឺកាមរោគ និងជំងឺអេដស៍ រួមទាំងស្ត្រីដែលមានម្តាយ ឬបងប្អូនស្រីមានកើតជំងឺមហារីកមាត់ស្បូន និងកង្វះអនាម័យផងដែរ៕