.jpg)
ទិដ្ឋភាពកិច្ចប្រជុំពិភាក្សាសេចក្ដីព្រាង និងសេចក្ដីស្នើច្បាប់នៅរដ្ឋសភា នៅថ្ងៃទី ២៩ ខែវិច្ឆិកា ឆ្នាំ ២០២២។ រូបថត រដ្ឋសភា
ភ្នំពេញៈ សេចក្តីព្រាង និងសេចក្ដីស្នើច្បាប់ចំនួន ៤ ត្រូវបានលើកយកមកពិភាក្សានិងអនុម័តក្នុងសម័យប្រជុំរដ្ឋសភា លើកទី៨ នីតិកាលទី៦ នៅថ្ងៃទី ២៩ ខែវិច្ឆិកា ក្រោមវត្តមានលោក ជាមយៀប ប្រធានរដ្ឋសភាស្តីទី និងសមាជិក សមាជិការដ្ឋសភាចំនួន ៩៩ រូប។
យោងតាមលទ្ធផលនៃសម័យប្រជុំនេះបានឱ្យដឹងថា សេចក្តីព្រាង និងសេចក្ដីស្នើច្បាប់ទាំង ៤ រួមមាន សេចក្តីស្នើវិសោធនកម្មប្រការ ២ ថ្មី (ពីរ) ប្រការ ៥ ថ្មី (ពីរ) ប្រការ ១០ ថ្មី (បី) ប្រការ ១៦ និងប្រការ ៣៥ ថ្មី នៃបទបញ្ជាផ្ទៃក្នុងនៃរដ្ឋសភានៃព្រះរាជាណាចក្រកម្ពុជា។
សេចក្តីព្រាងច្បាប់ស្តីពីការទូទាត់ថវិកាទូទៅរបស់រដ្ឋសម្រាប់ការគ្រប់គ្រងឆ្នាំ ២០២១ សេចក្តីព្រាងច្បាប់ ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០២៣ និងទី៤ គឺសេចក្តីព្រាងច្បាប់ស្តីពីការអនុម័តយល់ព្រមលើពិធីសារទាក់ទងនឹងការធ្វើវិសោធនកម្មអនុសញ្ញាស្តីពីអាកាសចរណ៍ស៊ីវិលអន្តរជាតិដោយបន្ថែមមាត្រា ៣ ស្ទួន។
ជាមួយគ្នានេះដែរ សេចក្តីស្នើវិសោធនកម្មបទបញ្ជាផ្ទៃក្នុងនៃរដ្ឋសភានៃព្រះរាជាណាចក្រកម្ពុជា ដែលស្នើធ្វើវិសោធនកម្ម ដោយក្រុមសមាជិក សមាជិការដ្ឋសភាចំនួន ៥៨ រូបនោះ ត្រូវបានសម័យប្រជុំលើកទី ៨ នីតិកាលទី ៦ រដ្ឋសភា នៅថ្ងៃទី ២៩ ខែវិច្ឆិកា ឆ្នាំ ២០២២ បានលើកមកពិភាក្សា និងអនុម័តដោយមានសំឡេងគាំទ្រចំនួន ៩៩/៩៩ សំឡេង។
រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន ដែលបានឡើងការពារសេចក្តីព្រាងច្បាប់ស្ដីពីការទូទាត់ថវិកាទូទៅរបស់រដ្ឋសម្រាប់ការគ្រប់គ្រងឆ្នាំ ២០២១ ថ្លែងថា ក្នុងឆ្នាំ ២០២១ ដោយសារការឆ្លងរាលដាលនៃជំងឺកូវីដ ១៩ បន្តវិវឌ្ឍយ៉ាងលឿន ជាពិសេសព្រឹត្តិការណ៍សហគមន៍ ២០ កុម្ភៈ ២០២១ បានជះឥទ្ធិលអវិជ្ជមានមិនធ្លាប់មានដល់កិច្ចដំណើរការសេដ្ឋកិច្ចសង្គម។
លោកបានបន្តថា ជាពិសេសដាក់សម្ពាធធ្ងន់ធ្ងរមកលើប្រព័ន្ធសុខាភិបាល និងបានគំរាមកំហែងដ៏គួរឱ្យព្រួយបារម្ភដល់អាយុជីវិត និងជីវភាពរស់នៅប្រចាំថ្ងៃរបស់ប្រជាជនកម្ពុជា។
លោកបន្តថា៖ «ក្នុងបរិការណ៍នៃការប្រយុទ្ធនឹងការរីករាលដាលនៃជំងឺកូវីដ ១៩ ដោយសារព្រឹត្តិការណ៍សហគមន៍ ២០ កុម្ភៈ ២០២១ រាជរដ្ឋាភិបាលបានសម្រេចធ្វើវិចារណកម្មចំណាយថវិកាឆ្នាំ ២០២១ តាមរយៈការបន្ថយឥណទានថវិកាលើមុខសញ្ញាចំណាយមួយចំនួនដែលមិនអាចនឹងឬមិនចាំបាច់ត្រូវអនុវត្តក្នុងអំឡុងពេលបិទប្រទេស ដើម្បីសន្សំថវិកាបន្ថែមមួយចំនួនយកទៅបម្រើឱ្យមុខសញ្ញាចាំបាច់បំផុត និងឆ្លើយតបនឹងតម្រូវការបន្ទាន់ក្នុងការប្រយុទ្ធកូវីដ ១៩ ព្រមទាំងទប់ទល់ផលប៉ះពាល់អវិជ្ជមានមកលើសេដ្ឋកិច្ចកម្ពុជា»។
យ៉ាងណាមិញ លោកគូសបញ្ជាក់ថា ថវិកាដែលត្រូវបានកាត់បន្ថយមិនមានតម្រូវការចាំបាច់ ត្រូវបានបង្វែរទៅបញ្ចូលក្នុងការអនុវត្តកម្មវិធីជំនួយសង្គមសម្រាប់ជនក្រីក្រ និងងាយរងគ្រោះក្នុងអំឡុងកូវីដ ១៩។
ទាក់ទងនឹងការអនុម័តសេចក្តីព្រាង និងសេចក្ដីស្នើច្បាប់នេះ លោក ឯម សុវណ្ណារ៉ា អ្នកតាមដានបញ្ហាសង្គម និងនយោបាយកម្ពុជា បានថ្លែងថា ការអនុម័តច្បាប់នីមួយៗគឺវាល្អហើយ ប៉ុន្តែភាគច្រើននៃច្បាប់គឺមិនបានពិភាក្សា ឬចូលរួមមតិយោបល់ពីគណបក្សប្រឆាំងនោះទេ គឺមានតែគណបក្សកាន់អំណាចតែមួយនៅក្នុងរដ្ឋសភា។ ដូច្នេះហើយ វាក៏មានភាពងាយស្រួលក្នុងការអនុម័តដែរ។
ទោះជាយ៉ាងណា លោក ឯម សុវណ្ណារ៉ា បានស្វាគមន៍ចំពោះសេចក្តីព្រាងច្បាប់ទាំងអស់ដែលត្រូវបានអនុម័តនេះផងដែរ។
ប្រធានគណៈកម្មការទី៧ នៃរដ្ឋសភា លោក ហ៊ុន ម៉ានី បានឡើងថ្លែងអំណរគុណដល់រាជរដ្ឋាភិបាល ក្រសួងស្ថាប័ន អាជ្ញាធរដែនដីគ្រប់លំដាប់ថ្នាក់ និងកងកម្លាំងប្រដាប់អាវុធ ជាពិសេស គឺបានរួមគ្នាប្រយុទ្ធប្រឆាំងជំងឺរាតត្បាតកូវីដ ១៩ ដែលទាំងអស់នេះហើយដែលនាំមកនូវភាពជោគជ័យដែលបានផ្តល់ឱកាសឱ្យកម្ពុជាអាចបើកសេដ្ឋកិច្ចសង្គមឡើងវិញ៕
