ភ្នំពេញៈ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប.) បានបើកការស៊ើបអង្កេតបទល្មើសដែលពាក់ព័ន្ធនឹងគ្រោងការលក់បែបពីរ៉ាមីត ឬ Pyramid scheme បន្ទាប់ពីទទួលពាក្យបណ្តឹងពីជនរងគ្រោះជាច្រើននាក់ ខណៈស្ថាប័ននេះក៏បានអំពាវនាវឱ្យមានការប្រុងប្រយ័ត្នចំពោះល្បិចឆបោកលក់បែបពីរ៉ាមីតនេះ។
កាលពីថ្ងៃទី២៨ វិច្ឆិកា មន្ត្រីនៃនាយកដ្ឋានកិច្ចការពារអ្នកប្រើប្រាស់ និងអ្នកជំនាញការអូស្ត្រាលី បានទទួលជួបជាមួយដើមបណ្តឹងពាក់ព័ន្ធនឹងគ្រោងការលក់បែបពីរ៉ាមីត ដើម្បីសាកសួរប្រមូលព័ត៌មានពីសាក្សី និងបន្តអនុវត្តនីតិវិធីក្នុងការស៊ើបអង្កេតចំពោះករណីដែលអាចជាគ្រោងការលក់បែបពីរ៉ាមីត។
លោក ផាន អូន ប្រតិភូរាជរដ្ឋាភិបាល ទទួលបន្ទុកជាអគ្គនាយក ក.ប.ប. បានប្រាប់ភ្នំពេញប៉ុស្តិ៍នៅថ្ងៃទី៣០ វិច្ឆិកាថា ក្រោយទទួលពាក្យបណ្តឹងពីជនរងគ្រោះ ក.ប.ប. បានសម្រេចបើកការស៊ើបអង្កេតលើករណីនេះ និងបន្តស្រាវជ្រាវរកធាតុផ្សំបន្ថែមទៀត ដើម្បីឱ្យប្រាកដថា វិធានការដែលបានដាក់ចេញគឺមានប្រសិទ្ធភាព។
លោក បានបញ្ជាក់ថា៖«នីតិវិធីយើងកំពុងធ្វើការពិចារណាទៅលើក្រុមហ៊ុន ដើម្បីសិក្សាទៅលើធាតុផ្សំដែលអាចចាត់ទុកថា អំពើរបស់បុគ្គលនោះ ស្ថិតនៅក្នុងគ្រោងការលក់បែបពីរ៉ាមីត។ ករណីនេះ យើងមិនទាន់បានធ្វើការសន្និដ្ឋានទេ យើងកំពុងប្រមូលនូវធាតុផ្សំទាំងអស់ ដើម្បីបន្តធ្វើការស៊ើបសួរបន្ថែម»។
ដោយសារតែនីតិវិធីនេះកំពុងស្ថិតក្នុងការស៊ើបអង្កេត លោក ផាន អូន មិនអាចបញ្ជាក់បានទេថា មានជនរងគ្រោះចំនួនប៉ុន្មាននាក់ដែលបានរងគ្រោះក្នុងល្បិចឆបោកបែបគ្រោងការណ៍លក់បែបពីរ៉ាមីតនេះ ហើយក៏មិនអាចបញ្ជាក់ពីឈ្មោះក្រុមហ៊ុនដែលជាប់ពាក់ព័ន្ធបានដែរ។ ប៉ុន្តែលោក ផាន អូន អំពាវនាវឱ្យប្រជាពលរដ្ឋមានការប្រុងប្រយ័ត្នខ្ពស់កុំឱ្យលង់ខ្លួននឹងគ្រោងការលក់បែបពីរ៉ាមីតនេះ និងលើកទឹកចិត្តឱ្យមានការរាយការណ៍មកសមត្ថកិច្ច ដើម្បីរួមគ្នាចាត់វិធានការតាមនីតិវិធីច្បាប់។
លោកបានបញ្ជាក់ថា៖«ចំពោះមុខ យើងនៅតែអំពាវនាវជូនប្រជាពលរដ្ឋដើម្បីឱ្យមានការពិនិត្យពិចារណា។ កាលណាយើងចង់បានផលប្រយោជន៍អ្វីមួយពីបុគ្គលណាម្នាក់ យើងត្រូវពិចារណាអំពីថា នឹងមានអ្វីដែលកើតឡើងនៅពេលអនាគត។ កាលណាដែលយើងចង់បានប្រយោជន៍របស់គេ គឺអាចលង់នឹងការរៀបចំណាមួយតាមគ្រោងការណ៍លក់បែបពីរ៉ាមីតរបស់ជនទុច្ចរិតណាមួយ។ យើងគួរប្រុងប្រយ័ត្នចំពោះក្រុមដែលមានការអូសទាញណាមួយជាយថាហេតុ ឬការផ្សព្វផ្សាយណាមួយជាយថាហេតុ ដែលថា ផ្តល់ប្រយោជន៍មកដល់ ដោយគ្មានការពិចារណាស៊ីជម្រៅ»។
គ្រោងការពីរ៉ាមីត គឺជាម៉ូដែលធុរកិច្ច ឬជំនួញមួយប្រភេទ ដែលតម្រូវធ្វើការជ្រើសរើសសមាជិកតៗគ្នា តាមរយៈការផ្តល់កិច្ចសន្យាចំណាយ ឬផ្តល់សេវា សម្រាប់ការចុះឈ្មោះអ្នកដទៃៗ ទៅក្នុងគ្រោងការនោះ ជាជាងការផ្តល់នូវការវិនិយោគ ឬការលក់ផលិតផល។ វិធីសាស្ត្រនេះ ពឹងផ្អែកចម្បងទៅលើការពង្រីកការលក់ជាទម្រង់ធរណីមាត្រ នៅកន្លែងដែលបុគ្គលិកផ្នែកលក់ ជ្រើសរើសអ្នកលក់បន្ត ដែលអ្នកនោះ ទៅជ្រើសរើសអ្នកលក់បន្តផ្សេងៗទៀត។ អ្នកដែលមានពិន្ទុតិចជាងគេនៅក្នុងម៉ាទ្រិចនេះ នឹងទទួលបានប្រាក់កម្រៃជើងសាកាន់តែតិចផងដែរ ហើយអ្នកដែលមានពិន្ទុខ្ពស់ជាងគេ នឹងទទួលបានពិន្ទុកាន់តែខ្ពស់ផងដែរ។
លំនាំអាជីវកម្មនេះត្រូវបានរិះគន់ថា មិនអាចធានានូវនិរន្តរភាពបាន ហើយងាយនឹងដួលរលំណាស់។ គម្រោងការលក់រាងពីរ៉ាមីតនេះ ពឹងផ្អែកលើការលក់ដើម្បីបង្កើនជំនួយអ្នកចែកចាយផលិតផលបន្ត ជាជាងពឹងផ្អែកលើអតិថិជន ដែលទិញផលិតផលក្រៅផែនការដែលបានគ្រោងទុក។ ផែនការទីផ្សារកម្រិតដំបូង ត្រូវបានបង្កើតឡើងនៅឆ្នាំ១៩៤៥ ដោយក្រុមហ៊ុន California Vitamin ដែលក្រោយមកបានក្លាយទៅជាក្រុមហ៊ុន Nutrilite។
លោក ផាន អូន បាននិយាយថា ដោយសារតែកម្ពុជា មានច្បាប់ស្តីពីកិច្ចការពារអ្នកប្រើប្រាស់ ហើយត្រង់មាត្រា២០ បានចែងច្បាស់ពីនិយមន័យ និងកំណត់ស្ថានភាពទម្ងន់ទោសនៃការលក់បែបពីរ៉ាមីត ដែលត្រូវបានហាមឃាត់។ លោក បានព្រមានថា អ្នកប្រព្រឹត្តផ្ទុយនឹងច្បាប់នេះ អាចប្រឈមនឹងទទួលទោសជាប់ពន្ធនាគារចាប់ពី២ឆ្នាំ ដល់៥ឆ្នាំ និងប្រាក់ពិន័យមិនលើសពី ៨០ លានរៀល៕