.jpg)
ជនត្រូវចោទឈឹម ស៊ីថរ ត្រូវបានឃុំខ្លួនឡើងវិញ។ រូបថត នគរបាល
ភ្នំពេញៈ ក្រោយពីមានការអំពាវនាវឱ្យដោះលែងសកម្មជនសហជីពម្នាក់កាលពីពេលថ្មីៗនេះ អ្នកនាំពាក្យសាលាដំបូងរាជធានីភ្នំពេញ បានចេញសេចក្ដីថ្លែងការណ៍បញ្ជាក់ ពីភាពស្របច្បាប់នៃការឃុំខ្លួនឡើងវិញចំពោះជនត្រូវចោទឈ្មោះ ឈឹម ស៊ីថរ។
អ្នកនាំពាក្យសាលាដំបូងរាជធានីភ្នំពេញបានអះអាងនៅក្នុងសេចក្ដីថ្លែងការណ៍ កាលពីថ្ងៃទី ២៩ ខែវិច្ឆិកា ឆ្នាំ ២០២២ ថា៖ «ជនត្រូវចោទឈ្មោះ ឈឹម ស៊ីថរ បានចាកចេញពីដែនដីនៃព្រះរាជាណាចក្រកម្ពុជាដោយគ្មានការអនុញ្ញាតពីចៅក្រមស៊ើបសួរដែលអំពើនេះបានបំពានកាតព្វកិច្ចនៃការត្រួតពិនិត្យផ្លូវតុលាការ»។ «ប្រសិនបើជនត្រូវចោទបានគេចវេះដោយចេតនាពីកាតព្វកិច្ចត្រួតពិនិត្យតាមផ្លូវតុលាការ ចៅក្រមស៊ើបសួរអាចសម្រេចឱ្យឃុំខ្លួនជនត្រូវចោទបណ្ដោះអាសន្នបាន»។
នៅក្នុងករណីនេះ នៅពេលចៅក្រមស៊ើបសួរសម្រេចដោះលែងជនត្រូវចោទឱ្យនៅក្រៅឃុំនោះចៅក្រមស៊ើបសួរប្រើប្រាស់វិធានការជំនួសមកវិញនូវដីកាសម្រេចដាក់ជនត្រូវចោទឱ្យស្ថិតនៅក្រោមកាតព្វកិច្ចនៃការត្រួតពិនិត្យផ្លូវតុលាការ ហើយជនត្រូវចោទត្រូវតែគោរពតាមនិងអនុវត្តឱ្យបានម៉ឺងម៉ាត់។
ជនត្រូវចោទឈ្មោះ ឈឹម ស៊ីថរ បានជាប់ឆ្នោតជាប្រធានសហជីពទ្រទ្រង់សិទ្ធិការងារ បុគ្គលិក កម្មករខ្មែរនៃក្រុមហ៊ុនណាហ្គាវើលដ៍ (LRSU) ត្រូវបានអាជ្ញាធរចាប់ខ្លួន ជាលើកទី២ នៅក្នុងអាកាសយានដ្ឋានអន្តរជាតិភ្នំពេញ កាលពីព្រឹកថ្ងៃទី ២៦ ខែវិច្ឆិកា នៅពេលដែលធ្វើដំណើរត្រឡប់មកពីចូលរួមកិច្ចប្រជុំសហព័ន្ធសហជីពអន្តរជាតិនៅក្នុងប្រទេសអូស្ត្រាលី។ ជនត្រូវចោទរូបនេះ ត្រូវបានចាប់ខ្លួនលើកទី១ កាលពីខែមករា ឆ្នាំ ២០២២ ក្រោមការចោទប្រកាន់ពីបទញុះញង់ឱ្យប្រព្រឹត្តបទឧក្រិដ្ឋជាអាទិ៍ ដោយសារសកម្មភាពកូដកម្មរបស់សហជីពដែលដឹកនាំដោយជនត្រូវចោទ ហើយត្រូវបានដោះលែងឱ្យនៅក្រៅឃុំកាលពីខែមីនា។
ទោះជាយ៉ាងណាក៏ដោយ អង្គការសង្គមស៊ីវិល និងសមាគម ចំនួន ៦៩ ស្ថាប័ន បានចេញសេចក្ដីថ្លែងការណ៍ ២ ថ្ងៃ ក្រោយពីជនត្រូវចោទត្រូវបានឃុំខ្លួនឡើងវិញ ដោយបានអំពាវនាវឱ្យធ្វើការដោះលែងជាបន្ទាន់ និងដោយឥតលក្ខខណ្ឌចេញពីពន្ធនាគារ។ ស្ថាប័នទាំងនេះក៏បានអំពាវនាវដល់រដ្ឋាភិបាលបញ្ឈប់ការប្រើប្រាស់ប្រព័ន្ធតុលាការ ដើម្បីបំភិតបំភ័យប្រធាន និងសមាជិកសហជីពបន្តទៀត។
សេចក្តីថ្លែងការណ៍នេះអះអាងថា៖ «អ្នកទាំងនោះជាអ្នកតំណាងឱ្យផលប្រយោជន៍ស្របច្បាប់របស់កម្មករជាច្រើននាក់ ដែលបានអំពាវនាវដល់និយោជក និងក្រុមហ៊ុន ឱ្យគោរពច្បាប់ការងារ និងសិទ្ធិស្របច្បាប់របស់កម្មករ។ រាជរដ្ឋាភិបាលគួរតែកោតសរសើរដល់វីរភាពរបស់អ្នកទាំងនោះ មិនមែនចាប់ខ្លួនពួកគេដាក់ពន្ធនាគារនោះទេ»។
លោក ឃុន ថារ៉ូ ប្រធានកម្មវិធីការងារ នៅមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស សង់ត្រាល់ បានថ្លែងក្នុងសេចក្ដីថ្លែងការណ៍ថា ប្រសិនបើតុលាការឯករាជ្យ សុក្រឹត និងយុត្តិធម៌នោះជនត្រូវចោទ គួរតែត្រូវបានការលើកកម្ពស់ និងការពារដោយច្បាប់។
លោកថ្លែងថា៖ «ការចាប់ខ្លួនសកម្មជនសិទ្ធិការងារ គឺជាការរំលោភសិទ្ធិមនុស្ស និងសិទ្ធិការងារយ៉ាងធ្ងន់ធ្ងរ ដោយការចោទប្រកាន់របស់តុលាការ មិនបានផ្អែកលើមូលដ្ឋានច្បាប់ ផ្ទុយទៅវិញគឺជាការប្រើប្រាស់សិទ្ធិជាមូលដ្ឋាន ដែលមានចែងនៅក្នុងអនុសញ្ញាស្នូលរបស់អង្គការ ILO ច្បាប់ស្តីពីការងារ និងច្បាប់ស្តីពីសហជីព ក្នុងការការពារសិទ្ធិ និងផល ប្រយោជន៍ជាសមូហភាពរបស់សមាជិក។ ករណីនេះក្នុងនាមយើងជាអង្គការសង្គមស៊ីវិលធ្វើការលើកកម្ពស់សិទ្ធិមនុស្ស និងសិទ្ធិការងារ»។
ទោះជាយ៉ាងណាក៏ដោយ លោក ជិន ម៉ាលីន អ្នកនាំពាក្យក្រសួងយុត្តិធម៌ បានថ្លែងនៅថ្ងៃទី ២៩ ខែវិច្ឆិកា ថា តាមអ្វីដែលបានលើកឡើងក្នុងសេចក្តីថ្លែងការណ៍រួមរបស់ស្ថាប័នក្រៅរដ្ឋាភិបាលទាំងនោះ ហាក់ដូចជាពួកគាត់អត់បានពិនិត្យទៅលើច្បាប់ នីតិវិធីរបស់តុលាការកម្ពុជា ឬក្រុមគាត់បានដឹងពីនីតិវិធីហើយ ប៉ុន្តែធ្វើជាមិនដឹង ដើម្បីការពារជនជាប់ចោទក្នុងការបិទបាំងអំពើល្មើសរបស់ខ្លួនផងដែរ។
លោកបានថ្លែងថា នេះជាការអនុវត្តនីតិវិធីផ្លូវច្បាប់របស់ប្រព័ន្ធតុលាការ ដោយសារជនជាប់ចោទបានល្មើសបម្រាមរបស់តុលាការ ដោយបានចេញទៅក្រៅប្រទេស ដូច្នេះហើយខាងតុលាការបានអនុវត្តនីតិវិធីដោយយកមកឃុំខ្លួនវិញ។
លោក ជិន ម៉ាលីន បានថ្លែងថា៖ «អ៊ីចឹងហើយ សុំឱ្យអង្គការទាំងនោះពិនិត្យមើលនីតិវិធីផ្លូវច្បាប់របស់ប្រទេសកម្ពុជា មុនធ្វើការសន្និដ្ឋាន ទាំងមិនយល់ ឬមួយក៏ធ្វើការសន្និដ្ឋានក្នុងគោលបំណងចោទប្រកាន់ ដើម្បីការពារ និងបិទបាំងកំហុសរបស់ក្រុមខ្លួន»។
លោកបានថ្លែងថា ការដែលសមត្ថកិច្ចធ្វើការអនុវត្តទៅតាមនីតិវិធីផ្លូវច្បាប់របស់ប្រទេសកម្ពុជាដែលមានជាធរមានត្រឹមត្រូវគ្រប់លក្ខណៈទាំងអស់នេះ គឺមិនមែនជាការរំលោភបំពានសិទ្ធិ និងជារឿងធ្វើទុក្ខបុកម្នេញនោះទេ។
លោកថា៖ «រាល់ការអនុវត្តនីតិវិធីទាំងនេះ គឺសុទ្ធតែមាននៅក្នុងច្បាប់ទូទៅ នៅក្នុងសង្គមប្រជាធិបតេយ្យ និងនីតិរដ្ឋប្រទេសណាក៏ត្រូវតែអនុវត្តទៅតាមហ្នឹងដែរ»៕
វីដេអូ៖
