ភ្នំពេញៈ ក្រសួងពាណិជ្ជកម្មកម្ពុជា និងស្ថានទូតជប៉ុនប្រចាំកម្ពុជា ប្តេជ្ញាបង្កើនទំនាក់ទំនង និងពង្រឹងកិច្ចសហប្រតិបត្តិការលើគ្រប់វិស័យបន្ថែមទៀត ដើម្បីជំរុញទំនាក់ទំនងពាណិជ្ជកម្ម និងវិនិយោគរវាងប្រទេសទាំង ២ ឱ្យកាន់តែរីកចម្រើនបន្ថែមទៀត។
ការប្តេជ្ញាចិត្តនេះធ្វើឡើងក្នុងជំនួប កាលពីថ្ងៃទី ២៩ ខែវិច្ឆិកា នៅទីស្តីការក្រសួងពាណិជ្ជកម្ម រវាងលោកប៉ានសូរស័ក្ដិ រដ្ឋមន្ដ្រីក្រសួងពាណិជ្ជកម្ម និងលោក Mikami Masahiro ឯកអគ្គរាជ ទូតជប៉ុនប្រចាំកម្ពុជា ដែលនឹងត្រូវបញ្ចប់អាណត្តិ។
ក្នុងជំនួបនោះលោក ប៉ាន សូរស័ក្ដិ បានបង្ហាញការគាំទ្រចំពោះគំនិតផ្ដួចផ្ដើម ទាំងឡាយរបស់ភាគីជប៉ុន ដើម្បីជំរុញការគាំទ្រដល់ការលើកកម្ពស់ភាពធន់រឹងមាំរបស់ចង្វាក់ផ្គត់ផ្គង់តំបន់ និងការអភិវឌ្ឍសេដ្ឋកិច្ច ប្រកបដោយចីរភាព និងបរិយាប័ន្ន។ លោកក៏បានជំរុញ និងលើកទឹកចិត្តឱ្យមានការវិនិយោគបន្ថែម ពីសំណាក់វិនិយោគិន និងធុរជនជប៉ុនមកកាន់តំបន់អាស៊ាន ជាពិសេសមកកាន់កម្ពុជាផ្ទាល់តែម្ដង។
លោករដ្ឋមន្ត្រី ប្តេជ្ញា នឹងបន្តសហការយ៉ាងជិតស្និទ្ធជាមួយឯកអគ្គរាជទូតថ្មី របស់ជប៉ុន ក្នុងការបន្តលើកកម្ពស់ទំនាក់ទំនងទ្វេភាគី ក្រោមភាពជាដៃគូយុទ្ធសាស្ត្រគ្រប់ជ្រុងជ្រោយ ដោយផ្អែកលើការជឿទុកចិត្តដ៏រឹងមាំ រវាងរដ្ឋាភិបាល និងប្រជាជននៃប្រទេសទាំង ២ ទៅកាន់ដំណាក់កាលថ្មី ១ ទៀត និងឆ្ពោះទៅខួបលើកទី៧០ នៃការបង្កើតទំនាក់ទំនងការទូត និងខួបលើកទី១០ នៃទំនាក់ទំនងភាពជាដៃគូយុទ្ធសាស្ត្រ រវាងកម្ពុជា និងជប៉ុននៅឆ្នាំ ២០២៣។
ក្រសួងពាណិជ្ជកម្មបញ្ជាក់ក្នុងទំព័រហ្វេសប៊ុកផ្លូវការ របស់ខ្លួនក្រោយ ជំនួបថា៖ «ភាគីទាំង ២ បានបង្ហាញពីការប្តេជ្ញាចិត្តក្នុងការបង្កើនទំនាក់ទំនងដ៏យូរអង្វែង និងការពង្រឹងបន្ថែមទៀតនូវកិច្ចសហប្រតិបត្តិការលើគ្រប់វិស័យ សំដៅពង្រឹង និងជំរុញទំនាក់ទំនងពាណិជ្ជកម្ម និងវិនិយោគ រវាងប្រទេសទាំង ២ ឱ្យកាន់តែរីកចម្រើនបន្ថែមទៀត»។
លោកប៉ាន សូរស័ក្ដិ ថ្លែងថា លោក Mikami បានបំពេញបេសកកម្មដ៏ជោគជ័យជាប្រវត្តិសាស្ត្រនៅកម្ពុជា ដោយបាននាំមកនូវសមិទ្ធផលនានាក្នុងការរួមចំណែកដល់ការអភិវឌ្ឍសេដ្ឋកិច្ចកម្ពុជាលើគ្រប់វិស័យ និងធ្វើឱ្យទំនាក់ទំនង រវាងកម្ពុជា និងជប៉ុន កាន់តែមានភាពស្អិតល្មួត និងកាន់តែរីកចម្រើនបន្ថែមទៀត។
លោកបានថ្លែងអំណរគុណចំពោះរដ្ឋាភិបាល និងប្រជាជនជប៉ុន សម្រាប់ការបរិច្ចាគវ៉ាក់សាំងប្រឆាំងជំងឺកូវីដ ១៩ ប្រមាណ ១,៣ លានដូស តាមរយៈយន្ដការ COVAX ក៏ដូចជាការផ្តល់ជំនួយហិរញ្ញប្បទាន និងបច្ចេកទេសក្នុងការគាំទ្រដល់គម្រោងអភិវឌ្ឍន៍នានា ដើម្បីជួយស្ដារសេដ្ឋកិច្ចឡើងវិញ ក្រោយ វិបត្តិនៃជំងឺកូវីដ ១៩។
លោក Mikami ត្រូវបានស្រង់សម្តីចុះផ្សាយក្នុងហ្វេសប៊ុកនេះថា កម្ពុជា ដែលធ្វើជាប្រធានអាស៊ានក្នុងឆ្នាំ ២០២២ ទទួលបានជោគជ័យដ៏ត្រចះត្រចង់ ហើយថា លោកប៉ាន សូរស័ក្ដិ បានទទួលជោគជ័យក្នុងការធ្វើជាប្រធានកិច្ចប្រជុំរដ្ឋមន្ត្រីសេដ្ឋកិច្ចអាស៊ាន និងកិច្ចប្រជុំពាក់ព័ន្ធ ដោយទទួលបានលទ្ធផលគួរជាទីមោទនៈ។
ហ្វេសប៊ុកដដែល បានបញ្ជាក់ថា៖ «ឯកឧត្តមឯកអគ្គរាជទូត បានវាយតម្លៃខ្ពស់ផងដែរនូវកិច្ចសហប្រតិបត្តិការយ៉ាងជិតស្និទ្ធ រវាងប្រទេសទាំង ២ និងបានជឿជាក់យ៉ាងមុតមាំថា កិត្តិនាមរបស់កម្ពុជា នឹងកាន់តែត្រូវបានទទួលស្គាល់ក្នុងតំបន់ និងសកលលោក បន្ទាប់ពីការទទួល បានភាពជោគជ័យ ក្នុងការធ្វើជាប្រធានអាស៊ានក្នុងឆ្នាំនេះ»។
លោក ថុង ម៉េងដាវិត អ្នកសិក្សាស្រាវជ្រាវនៅមជ្ឈមណ្ឌលមេគង្គ សម្រាប់ការសិក្សាយុទ្ធសាស្ត្រ នៃវិទ្យាស្ថានចក្ខុវិស័យអាស៊ី (AVI) ប្រាប់ ភ្នំពេញ ប៉ុស្តិ៍ថា ជប៉ុន បាននិងកំពុងខិតខំ និងជួយពង្រីកកិច្ចសហប្រតិបត្តិការសេដ្ឋកិច្ច ក៏ដូចជាកសាងហេដ្ឋារចនាសម្ព័ន្ធបន្ថែមទៀតដល់កម្ពុជា។ តួនាទីរបស់ជប៉ុន ពិតជាមិនអាចខ្វះបានឡើយក្នុងការកសាងសេដ្ឋកិច្ចចាប់តាំងពីឆ្នាំ ១៩៩០ មក។
លោក ដាវិត បានថ្លែងថា៖ «នៅក្នុងបរិបទនយោបាយអន្តរជាតិដ៏ស្មុគស្មាញ និងស្រួចស្រាល់ កម្ពុជាត្រូវការមិត្តដៃគូអភិវឌ្ឍន៍ទាំងអស់ ក្នុងការពង្រឹងយន្តការអភិវឌ្ឍន៍ និងថែរក្សាសន្តិភាព ស្ថិរភាពតំបន់ និងសកល។ កម្ពុជារំពឹង និងវាយតម្លៃខ្ពស់ចំពោះកិច្ចសហប្រតិបត្តិការកម្ពុជា និងជប៉ុន និងខិតខំសម្រួលបរិយាកាសល្អ សម្រាប់អ្នកវិនិយោគ និងប្រជាជនជប៉ុននៅកម្ពុជា»៕