ភ្នំពេញៈ អង្គការអភិរក្សអន្តរជាតិប្រចាំប្រទេសកម្ពុជា បានឱ្យដឹងថា ភូមិគោលដៅក្នុងតំបន់ជួរភ្នំក្រវាញចំនួន២៣ ក្នុងចំណោមភូមិសរុប២៤ ក្នុងខេត្តចំនួន៣ បានយល់ព្រមចូលរួមក្នុងគម្រោងរេដបូកតំបន់ជួរភ្នំក្រវាញកណ្តាល បន្ទាប់ពីអង្គការ និងស្ថាប័នពាក់ព័ន្ធ បានផ្សព្វផ្សាយនិងបណ្តុះបណ្តាលពីគម្រោងនេះជាបន្តបន្ទាប់។
លោក យាង ដូណាល់ អ្នកគ្រប់គ្រងផ្នែកទំនាក់ទំនងសហគមន៍ និងប្រព័ន្ធធានាសុវត្ថិភាពនៃអង្គការអភិរក្សអន្តរជាតិប្រាប់ភ្នំពេញប៉ុស្តិ៍ថា ភូមិគោលដៅក្នុងគម្រោងរេដបូកជួរភ្នំក្រវាញកណ្តាល មានចំនួន២៤ភូមិ ក្នុងនោះមាន២៣ភូមិ បានស្ម័គ្រចិត្តចូលរួមក្នុងគម្រោងរេដបូកតំបន់ជួរភ្នំក្រវាញកណ្តាល។ ចំពោះការចូលរួមរបស់អ្នកភូមិក្នុងគម្រោងនេះ គឺនៅសល់តែ១ភូមិចុងក្រោយតែប៉ុណ្ណោះ ដែលក្រុមការងារកំពុងតែបន្តចុះទៅផ្សព្វផ្សាយ និងពិគ្រោះយោបល់។
លោកបញ្ជាក់ថា៖«ភូមិគោលដៅចំនួន២៤ភូមិនោះស្ថិតក្នុងខេត្តចំនួន៣ គឺ ខេត្តពោធិ៍សាត់មានភូមិគោលដៅចំនួន១០ ភូមិគោលដៅ ខេត្តកំពង់ស្ពឺ មានចំនួន៣ភូមិគោលដៅ និងខេត្តកោះកុង មានចំនួន១១ភូមិគោលដៅ។ ការចុះបញ្ជីគម្រោងនេះនៅក្នុងស្តង់ដាអន្តរជាតិទៅបាន លុះត្រាយើងមានការយល់ព្រមពីសហគមន៍។ យើងបានធ្វើការងារនេះ រយៈពេលជាង២ឆ្នាំហើយ ទម្រាំបានមកដល់ដំណាក់កាលនេះ»។
លោក យាង ដូណាល់ អះអាងថា ដោយសារតែគម្រោងរេដបូក ស្ថិតក្នុងដំណាក់ការរៀបចំអភិវឌ្ឍគម្រោងនៅឡើយ ដូច្នេះក្រុមការងារអង្គការអភិរក្សអន្តរជាតិ បាននិងកំពុងសហការជាមួយមន្ត្រីនៅក្រសួង និងមន្ទីរបរិស្ថានខេត្ត បន្តផ្សព្វផ្សាយពីគម្រោងរេដបូក និងអត្ថប្រយោជន៍ផ្សេងៗដែលនឹងទទួលបាន ពេលដែលលក់ឥណទានកាបូន។
លោកថា៖«ក្រុមការងារជីវភាព នៃអង្គការអភិរក្សអន្តរជាតិ បានពិគ្រោះយោបល់ជាមួយសហគមន៍មូលដ្ឋាន ដើម្បីកសាងយុទ្ធសាស្ត្រនៃការបង្កើនជីវភាព ដោយមានការចូលរួមយ៉ាងសកម្មពីសហគមន៍ ក្នុងការកំណត់តម្រូវការចាំបាច់រួមមានការប្រើប្រាស់ធនធានធម្មជាតិប្រកបដោយនិរន្តរភាព សិក្សាពីខ្សែចង្វាក់តម្លៃអនុផលព្រៃឈើ និងដំណាំកសិកម្មសំខាន់មួយចំនួន។ បន្ទាប់ពីបញ្ចប់ផែនការនេះ អន្តរាគមន៍លើជីវភាពសហគមន៍នឹងអនុវត្តក្នុងពេលឆាប់ខាងមុខ»។
គម្រោងរេដបូកក្រវាញកណ្តាល ត្រូវបានដាក់ឱ្យអនុវត្តកាលពីឆ្នាំ២០២១ ដែលមានរយៈពេល៣០ឆ្នាំ ដោយធ្វើការគ្របដណ្តប់លើផ្ទៃដីចំនួន៣ខេត្ត គឺខេត្តកោះកុង ខេត្តកំពង់ស្ពឺ និងខេត្តពោធិ៍សាត់។ គម្រោងនេះ មានគោលដៅអភិរក្សធនធានធម្មជាតិ ដោយការពង្រឹងច្បាប់ ការចុះល្បាតព្រៃ និងការជួយដល់ជីវភាពពលរដ្ឋក្នុងសហគមន៍ តាមរយៈថវិកាដែលទទួលបានពីការលក់ឥណទានកាបូននៃគម្រោងរេដបូកនេះ។ នេះបើតាមលោកឆឹង ស៊ុវិរិយ៉ា មន្ត្រីអង្គការអភិរក្សអន្តរជាតិ ទទួលបន្ទុកសម្របសម្រួល ការចូលរួមរបស់សហគមន៍ និងការការពារសុវត្ថិភាព នៃគម្រោងរេដបូកក្រវាញកណ្តាល។
លោកបញ្ជាក់ថា៖«គម្រោងរេដបូកអាចធ្វើទៅបាន លុះត្រាមានការយល់ព្រមពីប្រជាពលរដ្ឋចាប់ពី៥០ភាគរយឡើងទៅក្នុងឃុំគោលដៅនីមួយៗ ព្រោះបើមិនមានការយល់ព្រមពីប្រជាពលរដ្ឋ ក៏មិនអាចអនុវត្តគម្រោងរេដបូកនេះបានដែរ»។
អង្គការអភិរក្សអន្តរជាតិប្រចាំប្រទេសកម្ពុជា បានឱ្យដឹងថា ជំហាននៃការរៀបចំគម្រោងរេដបូក ក្រោមបទដ្ឋានឥណទានកាបូនរួមគ្នា បទដ្ឋានផ្ទៀងផ្ទាត់កាបូន សម្ព័ន្ធអាកាសធាតុ សហគមន៍ និងជីវៈចម្រុះ គឺធ្វើឡើងត្រូវឆ្លងកាត់ដំណាក់កាលចំនួន៦។
ដំណាក់កាលទាំង៦នេះ រួមមានទី១ ការរៀបចំវិធីសាស្ត្រគណនាបំភាយឧស្ម័នផ្ទះកញ្ចក់ និងអនុម័តវិធីសាស្ត្រ។ ទី២ ការរៀបចំឯកសារគម្រោង ដែលពាក់ព័ន្ធនឹងការគណនាកាបូន ការងារសហគមន៍ និងការវាយតម្លៃជីវចម្រុះ។ ចំពោះដំណាក់កាលទី៣ គឺដំណើរការផ្តល់សុពលភាព ដោយត្រូវត្រួតពិនិត្យលើសេចក្តីព្រាងឯកសារគម្រោង និងឯកសារពាក់ព័ន្ធ រួមទាំងការចុះប្រមូលព័ត៌មាននៅទីវាល ដោយភាគីឯកជន។
ចំណែកដំណាក់កាលទី៤ គឺការចុះបញ្ជីគម្រោង ទី៥ ដំណើរការផ្ទៀងផ្ទាត់ដែលត្រូវធ្វើការត្រួតពិនិត្យទៅលើរបាយការណ៍ និងចុះទៅប្រមូលព័ត៌មាននៅតាមទីវាល និងទី៦ ការចេញឥណទានកាបូន ដោយបើកគណនីចុះបញ្ជីឥណទានកាបូន និងបង្ហាញពីចំនួនឥណទានកាបូនដែលបានចេញលក់នៅលើទីផ្សារ។
កាលពីខែកក្កដា ដល់ខែកញ្ញា ឆ្នាំ២០២២ ក្រុមការងារគម្រោងរេដបូកតំបន់ជួរភ្នំក្រវាញកណ្តាល នៃអង្គការអភិរក្សអន្តរជាតិប្រចាំប្រទេសកម្ពុជា និងមន្រ្តីនៃមន្ទីរបរិស្ថានខេត្តពោធិ៍សាត់ បានដំឡើងប្រអប់សំបុត្រយន្តការដោះស្រាយបណ្តឹងចំនួន១៣ នៅឃុំអូរសោម ឃុំប្រមោយ និងឃុំសំរោង នៅខេត្តពោធិ៍សាត់។ ប្រអប់ទាំងនេះអាចត្រូវបានប្រើដោយសហគមន៍ ដើម្បីបញ្ជូននូវកង្វល់ ឬបញ្ហាដែលពួកគេអាចជួបប្រទះជាមួយសកម្មភាពណាមួយនៅក្រោមគម្រោងរេដបូក។
អង្គការអភិរក្សអន្តរជាតិ បានប្រកាសថា នាពេលអនាគត ប្រអប់យន្តការដោះស្រាយបណ្តឹងនឹងត្រូវបានដំឡើងនៅតាមភូមិ ដែលបានចូលរួមទាំងអស់ក្នុងគម្រោងរេដបូកតំបន់ជួរភ្នំក្រវាញកណ្តាល នៅខេត្តកោះកុង កំពង់ស្ពឺ និងពោធិ៍សាត់ ដើម្បីធានាបាននូវការចូលរួមយ៉ាងពេញលេញនិងប្រកបដោយប្រសិទ្ធភាពក្នុងគម្រោងទេសភាពជួរភ្នំក្រវាញកណ្តាល៕