ភ្នំពេញៈ ប្រមុខរាជរដ្ឋាភិបាលកម្ពុជា លោកហ៊ុន សែន បានប្រកាសថា ព្រឹត្តិការណ៍អង្គរសង្ក្រាន្ត នឹងត្រូវរៀបចំសាជាថ្មីឡើងវិញ នាឱកាសបុណ្យចូលឆ្នាំប្រពៃណីជាតិខ្មែរ នាខែមេសា ឆ្នាំ២០២៣ ខាងមុខនេះ បន្ទាប់ពីអាក់ខានអស់រយៈពេល២ឆ្នាំ ដោយសារការរាតត្បាតនៃមេរោគកូវីដ១៩។
ការប្រកាសបែបនេះ ធ្វើឡើងក្នុងពិធីបិទព្រឹត្តិការណ៍កីឡាជាតិលើកទី៣ និងកីឡាជនពិការជាតិលើកទី១ ឆ្នាំ២០២២ នៅពហុកីឡដ្ឋានមរតកតេជោ កាលពីយប់ថ្ងៃទី៣០ ខែវិច្ឆិកា ឆ្នាំ២០២២។
លោកហ៊ុន សែន មានប្រសាសន៍ថា៖«ខ្ញុំក៏សូមបញ្ជាក់ជូនចំពោះបងប្អូន ជនរួមជាតិ នៅទូទាំងប្រទេសឱ្យបានជ្រាបថា នៅចូលឆ្នាំខ្មែរ ខែមេសា ឆ្នាំ២០២៣ខាងមុខនេះ យើងនឹងធ្វើអង្គរសង្ក្រាន្តសាជាថ្មីម្ដងទៀត។ ពេលនោះសង្ឃឹមថា កីឡាល្បុក្កតោរបស់យើង នឹងក្លាយទៅជានិមិត្តរូបដ៏សំខាន់ នៃការជួបជុំនៅក្នុងអង្គរសង្ក្រាននៅពេលនោះ»។
ជុំវិញរឿងនេះ លោកឈត ប៊ុនថង មន្ត្រីស្រាវជ្រាវនៃរាជបណ្ឌិត្យសភាកម្ពុជា និងជាអ្នកជំនាញទស្សនវិជ្ជា បានប្រាប់កាលពីថ្ងៃទី១ ខែធ្នូ ថា ពាក់ព័ន្ធនឹងការរៀបចំព្រឹត្តិការណ៍អង្គរសង្ក្រាន្ត ឬក៏រៀបចំព្រឹត្តិការណ៍ប្រពៃណីផ្សេងៗ វាគឺជាសុទ្ធតែរឿងដែលមានប្រយោជន៍ ពីព្រោះថា បើកាលណាមានការរៀបចំពីប្រពៃណី ដូចជា បុណ្យចូលឆ្នាំ និងបុណ្យផ្សេងៗទៀត ពិធីបុណ្យនោះ គឺជារបស់ខ្មែរ។
លោកថ្លែងថា ពិធីបុណ្យទាំងនោះ គឺមានន័យថា ធ្វើឱ្យប្រពៃណី និងទំនៀមទម្លាប់របស់ខ្មែរ មានភាពរស់ឡើងវិញ ដែលមានជីវិត និងការវិវឌ្ឍ ក៏ដូចជាការអភិរក្សផងដែរ។ ក្រៅពីនេះទៀត ទន្ទឹមនឹងមានការរៀបចំហើយ ធ្វើឱ្យមានការវិវឌ្ឍឡើងវិញ មានន័យថា ការរៀបចំនេះ វាបានផ្សព្វផ្សាយទៅដល់ប្រជាពលរដ្ឋ ក៏ដូចជាភ្ញៀវទេសចរបរទេសផងដែរ ដែលមកចូលរួមទស្សនា។
លោកឈត ប៊ុនថង បានបន្ថែមថា នេះជាការបង្រៀន និងផ្សព្វផ្សាយទៅដល់ក្មេងៗជំនាន់ក្រោយឱ្យស្គាល់ពីតម្លៃ ប្រពៃណី ទំនៀមទម្លាប់ វប្បធម៌របស់ប្រទេសកម្ពុជាជាដើម។
លោកប៊ុនថងថ្លែងថា៖«ប្រសិនជាព្រឹត្តិការណ៍នៃកម្មវិធីទាំងនោះ ត្រូវធ្វើនៅតំបន់ទេសចរណ៍ ដូចជា ខេត្តសៀមរាប ដែលជាតំបន់វប្បធម៌ នោះវាជាការបង្ហាញឱ្យបងប្អូនខ្មែរយើង និងភ្ញៀវបរទេស បានស្គាល់ បានឃើញពីតំបន់វប្បធម៌នេះ ដើម្បីគេជួយផ្សព្វផ្សាយទៅកាន់ប្រជាជាតិនានា និងទេសចរពិភពលោកនានាផងដែរ តាមរយៈការចូលរួម និងការទស្សនា»។
លោកបានបន្ថែមថា ក្រៅពីទទួលបានការផ្សព្វផ្សាយហើយ ប្រទេសកម្ពុជាក៏ទទួលបានកិត្តិយស កេរ្តិ៍ឈ្មោះ និងទទួលបានថវិកាពីការចំណាយ ដែលមានភ្ញៀវទេសចរចូលមកទស្សនាប្រាសាទ និងដើរកម្សាន្តផង ដូច្នេះប្រទេសកម្ពុជាទទួលបានប្រយោជន៍ច្រើនណាស់។
ចំណែកលោកលី សំរិទ្ធ អភិបាលរងខេត្តសៀមរាប បានបញ្ជាក់ដែរថា លោកទទួលបានដំណឹងពីការប្រកាសរបស់លោកនាយករដ្ឋមន្ត្រីហ៊ុន សែន ថា នឹងមានការរៀបចំព្រឹត្តិការណ៍សង្ក្រាន្តជាថ្មីឡើងវិញ។ ដោយឡែក សម្រាប់ខេត្តសៀមរាប ជាក់ស្ដែង គឺមិនទាន់មានផែនការរៀបចំនៅឡើយទេ។
លោកលី សំរិទ្ធ បានប្រាប់ថា៖«ការរៀបចំផែនការ គឺយើងត្រូវដឹងស្ថាប័នណាខ្លះ មានភារកិច្ចអីក្នុងការរៀបចំ ហើយអាជ្ញាធរខេត្តសៀមរាប និងអាជ្ញាធរពាក់ព័ន្ធផ្សេងទៀត ត្រូវធ្វើអីខ្លះចំពោះរឿងហ្នឹង»។
រីឯលោកទិត ច័ន្ទតារា មន្ត្រីក្រុមការងារផ្សព្វផ្សាយ នៃសហភាពសហព័ន្ធយុវជនកម្ពុជា(ស.ស.យ.ក.) បានឱ្យដឹងដែរថាការរៀបចំព្រឹត្តិការណ៍អង្គរសង្ក្រាន្ត ក្រុមការងាររបស់លោកកំពុងរៀបចំព័ត៌មានមួយចំនួន ដើម្បីធ្វើសន្និសីទសារព័ត៌មានខាងមុខនេះ។
លោកទិត ច័ន្ទតារា ថ្លែងថា៖«អ៊ីចឹង សន្និសីទសារព័ត៌មាននេះ យើងនឹងធ្វើឡើងនៅថ្ងៃទី២០ ខែធ្នូ ឆ្នាំ២០២២ ខាងមុខនេះ ហើយសម្រាប់ព័ត៌មានបន្ថែម យើងនឹងជម្រាបជូននៅពេលក្រោយ។ ប៉ុន្តែឥឡូវ ព័ត៌មានមួយចំនួន យើងកំពុងតែរៀបចំផ្សព្វផ្សាយជាសាធារណៈ ដូច្នេះយើងនឹងផ្ដល់ព័ត៌មានបន្ថែមតាមសន្និសីទសារព័ត៌មានតែម្តង»៕