ត្បូងឃ្មុំៈ អដ្ឋិធាតុយុទ្ធជនកម្លាំងប្រដាប់អាវុធសាមគ្គីសង្គ្រោះជាតិកម្ពុជា ៤៩រូប បានធ្វើមាតុភូមិនិវត្តន៍ពីប្រទេសវៀតណាម មកដល់ប្រទេសកម្ពុជាវិញហើយ នៅព្រឹកថ្ងៃទី១ ខែធ្នូ ឆ្នាំ២០២២ ដោយកម្ពុជា-វៀតណាម បានរៀបចំធ្វើពិធីប្រគល់-ទទួល នៅតំបន់ប្រវត្តិសាស្ត្រយោធាតេជោកោះថ្ម អ៊ិច១៦ ស្ថិតនៅភូមិកោះថ្ម ឃុំទន្លូង ស្រុកមេមត់ ខេត្តត្បូងឃ្មុំ។
ពិធីនេះធ្វើឡើងក្រោមអធិបតីភាព លោកសៅ សុខា អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស និងលោកដូ កាន់ អនុប្រធានស្នងការនយោបាយនៃកងទ័ពប្រជាជនវៀតណាម តំណាងក្រសួងការបរទេស នៃសាធារណរដ្ឋសង្គមនិយមវៀតណាម ព្រមទាំងកម្លាំងប្រដាប់អាវុធ អាជ្ញាធរដែនដី លោក លោកស្រី និងបងប្អូនប្រជាពលរដ្ឋប្រទេសទាំង២ កម្ពុជា-វៀតណាម។
លោកសៅ សុខា បានឱ្យដឹងនៅថ្ងៃទី១ ខែធ្នូថា៖«បន្ទាប់ពីធ្វើពិធីប្រគល់ និងទទួលរួច កម្ពុជាបានធ្វើពិធីដង្ហែអដ្ឋិធាតុយុទ្ធជនកម្លាំងប្រដាប់ អាវុធសាមគ្គីសង្គ្រោះជាតិកម្ពុជា ទាំង៤៩រូប ពីទឹកដីវៀតណាមចូលមកតំបន់ប្រវត្តិសាស្ត្រយោធាតេជោកោះថ្ម X១៦»។
លោកមេបញ្ជាការកងរាជអាវុធហត្ថប្រាប់ភ្នំពេញប៉ុស្តិ៍ កាលពីថ្ងៃទី២៧ ខែវិច្ឆិកាថា លោកទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ នឹងអញ្ជើញប្រារព្ធពិធីឈាបនកិច្ចអដ្ឋិធាតុយុទ្ធជនកងកម្លាំងប្រដាប់អាវុធសាមគ្គីសង្គ្រោះជាតិកម្ពុជា ៤៩រូប នៅថ្ងៃទី២ ធ្នូនេះ។
លោកបញ្ជាក់ថា៖«នៅព្រឹកថ្ងៃទី២ ខែធ្នូ ប្រារព្វពិធីបូជាអដ្ឋិធាតុ សម្តេចពិជ័យសេនា [ទៀ បាញ់] អញ្ជើញប្រទានភ្លើង ដោយមានមហាជនកម្លាំងប្រដាប់អាវុធ អាជ្ញាធរចូលរួម។ ធាតុដែលបានបូជារួចរៀបចំផ្ទុកក្នុងកោដ្ឋ តម្កល់បណ្តោះអាសន្ននៅក្នុងបន្ទប់វប្បធម៌នៃអគារមិត្តភាព»។
កាលពីថ្ងៃទី២៦ ខែវិច្ឆិកា លោកសៅ សុខា បានទៅរៀបចំពិធីបើកផ្នូរសពយុទ្ធជនពលីចំនួន៤៩នាក់នៅបូជនីយដ្ឋានយុទ្ធជនពលីកម្ពុជា ស្ថិតនៅភូមិសួសរ៉ាំ ឃុំឡុងយ៉ាវ ស្រុកកាំមី ខេត្តដុងណាយ ប្រទេសវៀតណាម។ លោកសៅ សុខា បានថ្លែងអំណរគុណចំពោះកងទ័ព និងប្រជាជនវៀតណាម ដែលជួយកម្ពុជាក្នុងបុព្វហេតុផ្តួលរំលំរបបខ្មែរក្រហម ព្រមទាំងកិច្ចការថែទាំអដ្ឋិធាតុយុទ្ធជនទាំង៤៩នាក់។
លោកសៅ សុខា មានប្រសាសន៍ថា៖«ជាង៤៤ឆ្នាំបានកន្លងផុតទៅ យុទ្ធមិត្តចំនួន៤៩រូប ដែលបានពលី និងមរណៈក្នុងកាលៈទេសៈដ៏លំបាកនោះ បានបញ្ចុះទៅទីនេះ ហើយមិត្តវៀតណាមបានប្រមូលផ្តុំរៀបចំ ជាបូជនីយដ្ឋានយុទ្ធជនពលីកម្ពុជា ដោយបានការយកចិត្តទុកដាក់ ផ្តល់ដី ផ្តល់បណ្ណ ទទួលស្គាល់ពីក្រសួងវប្បធម៌ ដោយទុកតំបន់នោះជាតំបន់ប្រវត្តិសាស្ត្រ»។
លោកសៅ សុខា បានរំឭកនូវឃ្លាបទចម្រៀងសម័យសង្គ្រាមយ៉ាងដូច្នេះថា៖«ដូចខ្លឹមសារបទចម្រៀង ដែលបានពោលថា មាតុភូមិអើយខ្ញុំនឹកអ្នកជានិច្ច។ ថ្ងៃនេះបងប្អូនទាំង៤៩រូប នឹងត្រូវបានរាជរដ្ឋាភិបាលកម្ពុជា ប្រគល់ភារកិច្ចឱ្យក្រុមការងារបច្ចេកទេសយើងខ្ញុំ សហការជាមួយភាគីមិត្តវៀតណាម ដើម្បីនាំបងប្អូនត្រឡប់ទៅកាន់មាតុភូមិកំណើតវិញ ដើម្បីបានជួបជុំគ្រួសារ ញាតិសន្តាន និងជនរួមជាតិរបស់បងប្អូន»។
នៅតំបន់ប្រវត្តិសាស្ត្រយោធាតេជោកោះថ្ម X១៦ កំពុងសាងសង់បន្តនូវសំណង់ ហេដ្ឋារចនាសម្ព័ន្ធនានា ក្នុងនោះក៏មានការសាងសង់ មហា ចេតិយ ចំណាយថវិកាប្រមាណជាង៧០ម៉ឺនដុល្លារ ដើម្បីតម្កល់អដ្ឋិធាតុយុទ្ធជនទាំង៤៩សពនោះ។ មហាចេតិយនោះ នឹងក្លាយជាវិមានស្តូបអនុស្សាវរីយ៍ សម្រាប់ការរំឭកដល់ថ្ងៃប្រកាសបង្កើតកងកម្លាំងប្រដាប់អាវុធសាមគ្គីសង្គ្រោះជាតិ គឺថ្ងៃទី១២ ខែឧសភា ឆ្នាំ១៩៧៨ ដោយ លោកនាយករដ្ឋមន្ត្រីហ៊ុន សែន៕