ភ្នំពេញៈ ការចាកចេញរបស់មន្ត្រីជាន់ខ្ពស់គណបក្សប្រជាធិបតេយ្យមូលដ្ឋាន(GDP) ២រូប គឺលោកយ៉ង សាំងកុមារ និងលោកឡឹក សុធារ ទៅចូលរួមជាមួយគណបក្សប្រជាជនកម្ពុជា អាចនឹងបង្កជាបញ្ហា ដល់ការធ្វើសកម្មភាពនយោបាយរបស់គណបក្សបក្សនេះ។ នេះបើតាមការលើកឡើងរបស់អ្នកវិភាគនិងអ្នកឃ្លាំមើលមួយចំនួន។
ក្រុមនេះយល់ថា ប្រជាប្រិយភាពបក្ស GDP មានការធ្លាក់ចុះ និងមានដំណើររប៉ាក់រប៉ើកទៅមុខ ក្នុងនាមបក្សជំទាស់តូចមួយនៃបណ្តាបក្សជំទាស់តូចៗ ជាច្រើនទៀតដែលមិនមានឥទ្ធិពលដល់បក្សកាន់អំណាចក្នុងទីលាននយោបាយកម្ពុជា។
លោកយង់ ពៅ អគ្គលេខាធិការនៃរាជបណ្ឌិត្យសភាកម្ពុជា និងជាអ្នកជំនាញវិទ្យាសាស្រ្តនយោបាយ លើកឡើងថា អវត្តមាននៃលោកយ៉ង សាំងកុមារ នឹងជះឥទ្ធិពលដល់ប្រជាប្រិយភាពរបស់គណបក្សប្រជាធិបតេយ្យមូលដ្ឋាន ដោយហេតុថា គណបក្សនេះទទួលប្រជាប្រិយភាពតាមរយៈបុគ្គលលោកយ៉ង សាំងកុមារ ឬ លោកឡឹក សុធារ ផ្ទាល់។
លោកយង់ ពៅ បញ្ជាក់ថា៖ «អវត្តមាននៃលោកយ៉ង សាំងកុមារ និងលោកឡឹក សុធារ ដែលជាសមាជិកស្នូលនេះ នឹងធ្វើឱ្យ GDP រងា ហើយជាយោបល់ខ្ញុំ គណបក្សនេះគួរអនុលោមតាមច្បាប់និងលក្ខន្តិកៈដែលបក្សនយោបាយខ្លួនបានតម្កល់នៅក្រសួងមហាផ្ទៃ គឺធ្វើសមាជជ្រើសតាំងថ្នាក់ដឹកនាំថ្មី ដើម្បីត្រៀមខ្លួនសម្រាប់ការបោះឆ្នោត បើសិនជាមានឆន្ទៈបន្ត។ បើគ្មានឆន្ទៈទេ នឹងធ្វើឱ្យអ្នកគាំទ្រខ្លួនខកបំណងចំពោះដំណើរនយោបាយកន្លងមក បើទោះបីបាត់បង់សមាជិកស្នូលក្តី គួរតែរក្សាដំណើរការបក្សដដែល»។
អ្នកជំនាញវិទ្យាសាស្រ្តនយោបាយរូបនេះ ផ្តល់គំនិតដល់ GDP ឱ្យរក្សាគោលនយោបាយបក្សឱ្យនៅដដែល និងធ្វើសមាជជ្រើសតាំងថ្នាក់ដឹកនាំថ្មី ដើម្បីបន្តនិរន្តរភាពនិងឆន្ទៈបក្ស ព្រមទាំងបន្តកៀរគរអ្នកគាំទ្រខ្លួន ក្នុងដំណើរបន្តមរតកនយោបាយខ្លួនក្នុងសមរភូមិនយោបាយកម្ពុជា ជាពិសេសដើម្បីត្រៀមខ្លួនក្នុងការបោះឆ្នោតជាតិនាឆ្នាំ២០២៣ ។
លោកអ៊ូ ច័ន្ទរ័ត្ន សហស្ថាបនិកនៃគណបក្សកែទម្រង់កម្ពុជា យល់ថា ដំណើរការចាកចេញរបស់លោកយ៉ង សាំងកុមារ និងមនុស្សជំនិត ស្រដៀងគន្លងរបស់គណបក្សខ្មែរស្រឡាញ់ជាតិដែរ។ ដំណើរការគណបក្សនេះបន្តទៅមុខនឹងជួបការលំបាកជាពិសេសការធ្លាក់ចុះនូវប្រជាប្រិយភាព ខណៈប្រជាប្រិយភាពរបស់ថ្នាក់ដឹកនាំដទៃហាក់មិនសូវមានប្រជាប្រិយភាពខ្ពស់ឡើយ។
លោកអ៊ូ ច័ន្ទរ័ត្នបញ្ជាក់ថា៖«កាលណាមានថ្នាក់ដឹកនាំបក្សសំខាន់បានចាកចេញ ហើយទៅចូលជ្រកជាមួយបក្សមួយផ្សេងទៀត ចៀសមិនរួចដែលអ្នកគាំទ្រខ្លះ មាននិន្នាការគាំទ្រលម្អៀងលើលោកយ៉ង សាំងកុមារ អាចនឹងលាឈប់ ឬបញ្ឈប់សកម្មភាព ដែលមិនអាចចៀសរួចទេ ដែលអាចនឹងខកចិត្តហើយចាកចេញពីគណបក្សហ្នឹង[ GDP] ដែលនឹងប៉ះពាល់ដល់ដំណើរទៅមុខរបស់បក្ស» ។
លោកអ៊ូ ច័ន្ទរ័ត្ន ដែលជាអ្នកនយោបាយមានបទពិសោធន៍ក្នុងឆាកនយោបាយកម្ពុជា ផ្តល់យោបល់ដល់ GDP គិតគូររួបរួមជាមួយបណ្តាគណបក្សជំទាស់ដទៃទៀត ដែលមាននិន្នានារស្របនឹងគណបក្សខ្លួន ដើម្បីពង្រឹងជំហបក្សនៅចំពោះមុខភាពមិនប្រាកដប្រជានេះ។ លោកថា បក្សប្រជាធិបតេយ្យមូលដ្ឋានមិនគួរនៅឈរតែឯងឡើយ។
លោក រ៉ូ វណ្ណៈ សាស្ត្រាចារ្យវិទ្យាសាស្ត្រនយោបាយ លើកឡើងពីទ្រឹស្តីនយោបាយតាមការសង្កេតជារួមថា ដំណើររបស់ GDP ដែលស្ថិតក្នុងចរន្តនយោបាយខ្មៅនិងស ហើយបែរជាតាំងខ្លួនជាពណ៌ប្រផេះបែបនេះ ឬមិនចំស មិនចំខ្មៅ វានឹងគ្មានលទ្ធផលល្អឡើយ។
លោក រ៉ូ វណ្ណៈ មើលឃើញពីទំនោរនយោបាយជាសន្យានុម័ត ធៀបនឹងទ្រឹស្តីយុទ្ធសាស្រ្តនយោបាយដូច្នេះថា៖«ក្នុងការវិវត្តនយោបាយ១០ឆ្នាំចុងក្រោយ ខ្ញុំសង្កេតឃើញពីការវិវត្តទៅរកនយោបាយទ្វេបក្ស ជាពិសេសលទ្ធផលបោះឆ្នោត២០១៣ និងអាចឆ្នាំ២០២៣ ដែលគណបក្ស២នឹងតំណាងនៅក្នុងរដ្ឋសភា។ ក្នុងទំនោរបែបនេះ GDP ដែលមានបំណងចង់ក្លាយជាប៉ូលនយោបាយមួយទៀត ក្រោមស្លាកគណបក្សដែលបង្កើតដោយបញ្ញាវន្ត បរាជ័យតាំងពីដើមទី ដោយសារបង្កើតឡើងនិងចូលរួមបោះឆ្នោតឆ្នាំ២០១៨មិនត្រូវចំកាលវេលាផង ខ្វះស្ថិរភាពធនធានហិរញ្ញវត្ថុផង ដែលបញ្ច្រាសនឹងទំនោររបស់មហាជនផង»។
ចំណែកលោកមាជ សុវណ្ណារ៉ា អតីតមន្ត្រីជាន់ខ្ពស់នៃអតីតគណបក្សសង្គ្រោះជាតិប្រមើលមើលថា ជោគវាសនារបស់គណបក្សប្រជាធិបតេយ្យមូលដ្ឋាននឹងចុះខ្សោយឥទ្ធិពលក្នុងឆាកនយោបាយកម្ពុជា ព្រោះអវត្តមាននៃសហស្ថាបនិកដ៏សំខាន់របស់ខ្លួន នឹងនាំដល់ការបាត់បង់ទំនុកចិត្តពីអ្នកគាំទ្រខ្លួនមួយចំនួននៅចំពោះមុខនៃការចុះចូលនៃថ្នាក់ដឹកនាំបក្សខ្លួនជាមួយគណបក្សកាន់អំណាច ដើម្បីទទួលបានមុខតំណែងកំពូលក្នុងជួររដ្ឋាភិបាល។
ក្រោយពីទៅចូលរួមជាមួយគណបក្សកាន់អំណាច លោក យ៉ង សាំងកុមារ ត្រូវបានព្រះមហាក្សត្រត្រាស់បង្គាប់តែងតាំងជារដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការ ក្រសួងកសិកម្ម ខណៈលោក ឡឹក សុធារ ត្រូវតែងតាំងជាអនុរដ្ឋលេខាធិការក្រសួងកសិកម្ម ៕