.jpg)
លោកនាយករដ្ឋមន្ត្រី ហ៊ុន សែន ថ្លែងទៅកាន់កម្មករ-កម្មការិនីកាលពីម្សិលមិញ។ រូបថត SPM
ភ្នំពេញៈ លោកនាយករដ្ឋមន្ត្រី ហ៊ុន សែន បានធ្វើការអំពាវនាវសាជាថ្មីម្តងទៀត ទៅដល់ប្រជាពលរដ្ឋ និងកម្មករ-កម្មការិនីនៅទូទាំងប្រទេស ឱ្យបន្តប្រយុទ្ធជាមួយនឹងកូវីដ ១៩ ទៀត ដោយសារជំងឺនេះមិនទាន់ទៅណាឆ្ងាយទេ ដោយត្រូវប្រកាន់ខ្ជាប់នូវវិធានការ ៣ ការពារ និង ៣ កុំ។
លោកបានថ្លែងដូចនេះនាព្រឹកថ្ងៃទី ១ ខែធ្នូ ក្នុងពិធីប្រារព្ធខួប ១១ ឆ្នាំ នៃប្រតិបត្តិការរបស់ក្រុមហ៊ុនមីនេបៀ របស់ជប៉ុន នៅកម្ពុជា ដោយលោកបានបញ្ជាក់ផងដែរថា លោកទើបតែជាសះស្បើយពីជំងឺកូវីដ ១៩ ប្រភេទអូមីក្រុង ដែលដំបូងឡើយលោកក៏បារម្ភពីវីរុសកូវីដប្រភេទអាល់ហ្វា និងដែលតា ដែលអាចកើតមានឡើងវិញផងដែរ។
លោក ហ៊ុន សែន មានប្រសាសន៍ថា៖ «ខ្ញុំពិតជាមានការអរគុណដែលប្រជាពលរដ្ឋ កម្មករ-កម្មការិនី ទទួលយកវិធានការរបស់រាជរដ្ឋាភិបាល និងក្រសួងសុខាភិបាលតាមរយៈ វិធានការ ៣ កុំ និង ៣ ការពារ ហើយខ្ញុំនៅតែបន្តអំពាវនាវដល់ប្រជាពលរដ្ឋនៅក្នុងព្រះរាជាណាចក្រកម្ពុជាទាំងអស់ បន្តប្រយុទ្ធជាមួយនឹងកូវីដ ១៩ ទៀត ដោយសារជំងឺនេះ មិនទាន់ទៅណាឆ្ងាយនោះទេ វានៅក្បែរៗយើងនៅឡើយ ប៉ុន្តែបើយើងចេះការពារខ្លួននឹងមិនមានបញ្ហានោះឡើយ»។
លោកនាយករដ្ឋមន្ត្រី ហ៊ុន សែន បានលើកឡើងដែរថា មកដល់ពេលនេះ វិធានការ ៣ កុំ និង ៣ ការពារ ពិតជាពិបាកធ្វើ ប៉ុន្តែបើគ្រប់គ្នាប្រឹងប្រែងធ្វើនោះ នៅតែអាចធ្វើទៅបាន ប៉ុន្តែលោកក៏បានបញ្ជាក់ដែរថា វិធានការ ៣ ការពារនៅតែមានលទ្ធភាពធ្វើ គឺពាក់ម៉ាស់ លាងដៃ និងរក្សាគម្លាត ហើយទាក់ទិននឹងវិធានការ ៣ កុំនោះគឺពិបាកបន្តិចនៅពេលដែលស្ថានភាពកូវីដ ១៩ មានភាពធូរស្បើយឡើង។
នាឱកាសនោះដែរ លោកនាយករដ្ឋមន្ត្រី ថ្លែងថា៖ «នៅពេលខ្ញុំដឹងថា មានវិជ្ជមានកូវីដ ១៩ ខ្ញុំក៏បារម្ភដែរ ថាតើវាអាចវិលទៅរកប្រភេទអាល់ហ្វា និងដែលតាវិញទេ? ចំណុចនេះគឺជាចំណុចដែលពេទ្យត្រូវចាប់ផ្តើមពិនិត្យសួត និងពិនិត្យសព្វបែបយ៉ាងទាំងអស់ ដើម្បីការពារធ្វើយ៉ាងណាកុំឱ្យវាវាយមកលើសួត ប៉ុន្តែវីរុសកូវីដ ១៩ ប្រភេទអូមីក្រុង មិនសូវជាធ្ងន់ធ្ងរពេកទេ»។
លោកនាយករដ្ឋមន្ត្រី បានបញ្ជាក់ថា នៅពេលដែលគ្រប់គ្នាបានចាក់វ៉ាក់សាំងកូវីដ ១៩ពេញលេញហើយ នៅពេលដែលឆ្លង វាមិននាំទៅដល់ភាពធ្ងន់ធ្ងរ ឬមានការស្លាប់នោះដែរ។
ទាក់ទងនឹងការរីករាលដាលនៃមេរោគកូវីដ ១៩ នេះដែរ លោក ហ៊ុន សែន បានថ្លែងឡើងនាពេលនោះដែរពីការមើលស្រាល និងការប្រមាថពីបណ្តាប្រទេសអ្នកមានមួយចំនួនមកលើប្រព័ន្ធសុខាភិបាលរបស់កម្ពុជា។ កាលពីកម្ពុជាចាប់ផ្តើមមានការឆ្លងមេរោគកូវីដ ១៩ ដំបូងត្រូវបានសារព័ត៌មាននៃប្រទេសអ្នកមានមួយចំនួនសរសេរបន្តុះបង្អាប់ប្រទេសកម្ពុជាខ្លាំងណាស់ រួមនឹងមានប្រទេសមួយចំនួនទៀតដូចជាឡាវ មីយ៉ាន់ម៉ា បង់ក្លាដែស និងប្រទេសមួយចំនួនទៀតដែលត្រូវបានប្រទេសអ្នកមានប្រមាថពីប្រព័ន្ធសុខាភិបាលទន់ខ្សោយ។
ប៉ុន្តែនៅពេលនេះ អ្នកដែលធ្លាប់បានសរសេរព័ត៌មានប្រមាថមកលើកម្ពុជា ទាក់ទិននឹងការគ្រប់គ្រងកូវីដ ១៩ តើពួកគេមានវិប្បដិសារីឬអត់? នេះជាការចោទសួររបស់ប្រមុខរាជរដ្ឋាភិបាលកម្ពុជារូបនេះ ដោយលោកបានបន្តថា បញ្ហាគ្រប់គ្រងកូវីដ ១៩ មិនមែនសំដៅលើបញ្ហាប្រព័ន្ធសុខាភិបាលជឿនលឿនឬប្រព័ន្ធសុខាភិបាលអន់ខ្សោយនោះទេ។
លោក ហ៊ុន សែន មានប្រសាសន៍ថា៖ «ការប្រយុទ្ធជាមួយនឹងសត្រូវមើលមិនឃើញ គឺជាការប្រយុទ្ធមួយដ៏លំបាក ដែលទាមទារឱ្យយើងធ្វើការជាមួយមនុស្ស មិនមែនធ្វើការជាមួយម៉ាស៊ីននោះទេ។ ដោយសារយើងមានភាពទន់ខ្សោយខាងផ្នែកប្រព័ន្ធសុខាភិបាល តម្រូវឱ្យយើងធ្វើការជាមួយមនុស្ស ហើយប្រជាពលរដ្ឋរបស់យើងបានអនុវត្តវិធានការការពារដែលដាក់ចេញដោយក្រសួងសុខាភិបាល និងរាជរដ្ឋាភិបាល»។
យោងតាមក្រសួងសុខាភិបាល បានឱ្យដឹងថា គិតត្រឹមថ្ងៃទី ១ ខែធ្នូ ចំនួនឆ្លងជំងឺកូវីដ ១៩ សរុបមានចំនួន ១៣៨ ១០៦ នាក់ ចំណែកអ្នកជាសះស្បើយសរុប ១៣៤ ៩៩២ នាក់ និងស្លាប់សរុប ៣ ០៥៦ នាក់។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស បានធ្វើការក្រើនរំឭកជាថ្មីម្តងទៀតផងដែរ ទៅដល់ប្រជាពលរដ្ឋទាំងអស់ឱ្យបន្ត និងបង្កើនការប្រុងប្រយ័ត្នខ្ពស់ក្នុងអំឡុងពេលបុណ្យណូអែល និងពេលឈប់សម្រាកក្នុងឱកាសចូលឆ្នាំសកល ដែលនឹងឈានមកដល់នាពេលខាងមុខនេះ។
លោកស្រីឱ វណ្ណឌីន ថ្លែងទៀតថា៖ «ប្រជាពលរដ្ឋទាំងអស់ត្រូវឱ្យបន្តការការពារ និងបង្កើនការប្រុងប្រយ័ត្នខ្ពស់ក្នុងអំឡុងពេលបុណ្យគ្រីស្មាស់ និងថ្ងៃឈប់សម្រាកក្នុងឱកាសចូលឆ្នាំសកល ឆ្នាំ ២០២៣ ដែលនឹងឈានមកដល់នាពេលខាងមុខនេះ»។
ប្រធាន គ.វ.ក ១៩ រូបនេះ ក៏បានអំពាវនាវឱ្យប្រជាពលរដ្ឋគ្រប់គ្នាត្រូវបន្តទៅទទួលការចាក់ វ៉ាក់សាំងកូវីដ ១៩ ឱ្យបានគ្រប់ដូស ទាំងដូសមូលដ្ឋាន និងដូស ជំរុញ ដែលមានដូសទី ៣ ដូសទី ៤ និងដូសទី ៥ ដើម្បីពង្រឹងកងការពារខ្លួន និងពង្រឹងភាពស៊ាំសហគមន៍ ដើម្បីបន្តចៀសផុតពីគ្រោះមហន្តរាយ សុខភាពសាធារណៈ និងបន្តនិរន្តភាពនៃការរស់នៅធម្មតា តាមគន្លងប្រក្រតីភាពថ្មី។
យោងតាមក្រសួងសុខាភិបាល គិតត្រឹមថ្ងៃទី ៣០ ខែវិច្ឆិកា ឆ្នាំ ២០២២ លទ្ធផលចាក់វ៉ាក់សាំងធៀបនឹងចំនួនប្រជាជនសរុប ១៦ លាននាក់ មាន ៩៥,១៨%។
ក្រសួងសុខាភិបាលបានបន្តថា សម្រាប់អត្រាចាក់ដូសទី ៣ មានចំនួន ជាង ១០ លាននាក់ ដូសទី ៤ បានចំនួនជាង ៤,៦ លាននាក់ និងអត្រាអ្នកចាក់វ៉ាក់សាំងកូវីដ ១៩ ដូសទី ៥ មានចំនួនជាង ១ លាននាក់ផងដែរនៅទូទាំងប្រទេស៕
