ភ្នំពេញៈ ក្រសួងកិច្ចការនារី ប្រកាសបើកយុទ្ធនាការឌីជីថល ក្រោមប្រធានបទ សារៈសំខាន់របស់ប្រព័ន្ធផ្សព្វផ្សាយក្នុងការចូលរួមទប់ស្កាត់អំពើហិង្សាលើស្ត្រី និងក្មេងស្រី ដោយកំណត់យកថ្ងៃទី ៥ ធ្នូ ដើម្បីផ្សព្វផ្សាយរួមគ្នានៅលើបណ្តាញទំនាក់ទំនងសង្គម និងអំពាវនាវឱ្យមានការចូលរួម។
យុទ្ធនាការនេះ ត្រូវបានប្រកាសក្នុងសិក្ខាសាលាផ្សព្វផ្សាយយុទ្ធនាការឌីជីថល ដើម្បីទប់ស្កាត់អំពើហិង្សាលើស្ត្រី និងក្មេងស្រី កាលពីថ្ងៃទី ១ ខែធ្នូ ឆ្នាំ ២០២២ ដែលមានការចូលរួមពីអ្នកសារព័ត៌មាន និងស្ថាប័នពាក់ព័ន្ធជាង ២០ នាក់ តាមប្រព័ន្ធវីដេអូអនឡាញ ហើយវាក៏ជាផ្នែក ១ នៃយុទ្ធនាការ ១៦ ថ្ងៃ ចាប់ពីថ្ងៃទី ២៥ វិច្ឆិកា ដល់ថ្ងៃទី ១០ ធ្នូ ដើម្បីបញ្ឈប់អំពើហិង្សាលើស្ត្រី និងក្មេងស្រីផងដែរ។
ក្រសួងកិច្ចការនារី បានប្រកាសថា៖ «គោលបំណងនៃការធ្វើយុទ្ធនាការឌីជីថល គឺដើម្បីជូនដំណឹងដល់បណ្តាបណ្តាញសារព័ត៌មាន និងប្រព័ន្ធផ្សព្វផ្សាយអំពីកម្មវិធីយុទ្ធនាការ និងកៀរគរការចូលរួមក្នុងសកម្មភាព និងកិច្ចការនានារបស់អ្នកចូលរួមយុទ្ធនាការឌីជីថលនេះ»។
យុទ្ធនាការឌីជីថលនេះ បានកំណត់យកថ្ងៃទី ៥ ខែធ្នូ ដើម្បីផ្សព្វផ្សាយរួមគ្នានៅលើបណ្តាញទំនាក់ទំនងសង្គម ដោយធ្វើការផ្សព្វផ្សាយពាក្យស្លោក ការផ្លាស់ប្តូរប្រូហ្វាល និងមានកម្មវិធីជជែកពិភាក្សាជាច្រើនទៀត។ នេះបើតាមការអះអាងរបស់ក្រសួងកិច្ចការនារី។
លោកស្រីប៊ុន ពុទ្ធី អនុរដ្ឋលេខាធិការក្រសួងកិច្ចការនារី បានថ្លែងថា ប្រព័ន្ធផ្សព្វផ្សាយ គឺពិតជាដើរតួនាទីយ៉ាងសំខាន់ក្នុងការជំរុញ និងផ្សព្វផ្សាយអំពីយុទ្ធនាការ ១៦ ថ្ងៃ ដើម្បីបញ្ឈប់អំពើហិង្សាលើស្ត្រី និងក្មេងស្រី ដើម្បីបង្កើនការយកចិត្តទុកដាក់ ការចូលរួមទប់ស្កាត់ និងឆ្លើយតបអំពើហិង្សាទាក់ទងនឹងយេនឌ័រនៅកម្ពុជា។
លោកស្រីនិយាយថា រដ្ឋាភិបាល បានដាក់ចេញនូវគោលនយោបាយ និងសកម្មភាពជាបន្តបន្ទាប់ ក្នុងន័យបង្ការទប់ស្កាត់ និងផ្តល់កិច្ចការពារផ្លូវច្បាប់ និងបង្កើនការអនុវត្តច្បាប់ឱ្យមានប្រសិទ្ធភាព ក្នុងការបញ្ឈប់អំពើហិង្សាលើស្ត្រី និងក្មេងស្រី។ លោកស្រីអំពាវនាវដល់ប្រព័ន្ធផ្សព្វផ្សាយ ចូលរួមយុទ្ធនាការនេះ ដើម្បីផ្សព្វផ្សាយបញ្ហាទាំងនេះទៅកាន់សាធារណជន។
លោកស្រីបញ្ជាក់ថា៖ «សារព័ត៌មាននានា កំពុងដើរតួនាទីយ៉ាងសកម្មក្នុងការចូលរួមចំណែកទប់ស្កាត់អំពើហិង្សា លើស្ត្រី និងក្មេងស្រី។ ជាពិសេស តាមរយៈការបញ្ជ្រាបការយល់ដឹងដល់ប្រជាពលរដ្ឋក្នុងការបញ្ឈប់អំពើហិង្សាទាក់ទងយេនឌ័រ និងលើកទឹកចិត្តក្នុងការប្រព្រឹត្តវប្បធម៌អហិង្សា»។
ដើម្បីឆ្លើយតបនឹងអំពើហិង្សាលើស្ត្រី និងក្មេងស្រី លោកស្រីប៊ុន ពុទ្ធី អះអាងថា ក្រុមការងារយេនឌ័រកំពុងបន្តសកម្មភាព របស់ខ្លួនក្នុងខេត្តចំនួន ៩ និងស្រុកចំនួន ៣៧ ខណៈមានក្រុមចម្រុះរង់ចាំជួយដល់ជនរងគ្រោះពីអំពើហិង្សានៅតាមមន្ទីរពេទ្យមួយចំនួនផងដែរ។
កាលពីឆ្នាំ ២០១៦ ក្រសួងកិច្ចការនារី និងក្រសួងព័ត៌មាន បានចុះហត្ថលេខាលើប្រកាសរួមស្តីពីក្រមប្រតិបត្តិប្រព័ន្ធផ្សព្វផ្សាយសម្រាប់ការរាយការណ៍ព័ត៌មានអំពើហិង្សាលើស្ត្រី និងក្មេងស្រី ក្នុងគោលបំណងទប់ស្កាត់ការ រាយការណ៍ ករណីហិង្សាលើស្ត្រី ពាក់ព័ន្ធនឹងផ្លូវកាយ ផ្លូវចិត្ត និងហិង្សាផ្នែកសេដ្ឋកិច្ចជាដើម ដែលមានន័យដាក់បន្ទុក និងលេងសើចលើជនរងគ្រោះ។
លោកអ៊ុក គឹមសេង អនុរដ្ឋលេខាធិការ និងជាអ្នកនាំពាក្យក្រសួងព័ត៌មាន បានថ្លែងថាក្រសួងព័ត៌មាន គឺជាស្ថាប័នមួយដែលតែងតែជំរុញឱ្យប្រព័ន្ធផ្សព្វផ្សាយចូលរួមក្នុងការទប់ស្កាត់ និងផ្សព្វផ្សាយចំណេះដឹងពាក់ព័ន្ធនឹងការលុបបំបាត់អំពើហិង្សាលើស្ត្រី និងក្មេងស្រី។
លោកក៏បានជំរុញឱ្យបណ្តាប្រព័ន្ធផ្សព្វផ្សាយ ចូលរួមគោរពតាមក្រមប្រតិបត្តិប្រព័ន្ធផ្សព្វផ្សាយសម្រាប់ការរាយការណ៍ព័ត៌មានអំពើហិង្សាលើស្ត្រី និងក្មេងស្រី។ លោកក៏នឹងជំរុញបន្ថែមទៀត ដោយធ្វើយ៉ាងណាឱ្យការផ្សព្វផ្សាយពីបញ្ហានេះបានទូលំទូលាយទៅដល់អ្នកសារព័ត៌មានគ្រប់ប្រភេទនៅប្រទេសកម្ពុជា។
លោកបញ្ជាក់ថា៖ «នៅក្នុងប្រទេសកម្ពុជាយើង ដើម្បីឱ្យបានយល់ដឹងថា តើការផ្សព្វផ្សាយអំពីអំពើហិង្សាលើស្ត្រី និងក្មេងស្រីហ្នឹង គាត់គួរធ្វើអ្វី ឬមិនគួរធ្វើអ្វី ដើម្បីចៀសវាងមិនឱ្យរបាយការណ៍ព័ត៌មានរបស់គាត់ធ្វើឱ្យជនរងគ្រោះ រងទុក្ខទ្វេដង។ សម្រាប់យុទ្ធនាការ ១៦ ថ្ងៃនេះ យើងរួមគ្នាប្រឹងប្រែងធ្វើយ៉ាងណា លើកស្ទួយដល់សាធារណជនឱ្យមានការយល់ដឹងអំពីយេនឌ័រជាដើម»។
កាលពីថ្ងៃទី ២៥ ខែវិច្ឆិកា លោកស្រី អ៊ឹង កន្ថាផាវី រដ្ឋមន្ត្រីក្រសួងកិច្ចការនារី បានលើកឡើងថា ការរួមគ្នាទប់ស្កាត់អំពើហិង្សាទាក់ទងនឹងយេនឌ័រ និងការចូលរួមលើកកម្ពស់សមភាពយេនឌ័រ និងការផ្តល់ភាពអង់អាចដល់ស្ត្រី និងក្មេងស្រី អាចសម្រេចទៅបានលុះត្រាតែគ្រប់គ្នាចូលរួម និងបង្កើនកិច្ចខិតខំប្រឹងប្រែងក្នុងការបញ្ឈប់រាល់ទម្រង់នៃអំពើហិង្សាលើស្ត្រី និងក្មេងស្រី។
លោកស្រីបញ្ជាក់ថា៖ «កិច្ចខិតខំប្រឹងប្រែងរួមគ្នា ដោយផ្តោតការយកចិត្តទុកដាក់លើជនរងគ្រោះ ជាមួយនឹងការផ្តល់កញ្ចប់សេវាចាំបាច់នានា ដូចជាការប្រឹក្សាយោបល់ផ្លូវចិត្ត សេវាផ្នែកច្បាប់ សុខភាព ជម្រកសុវត្ថិភាព និងសេវាសង្គម គឺជាវិធីសាស្ត្រ ដ៏មាន ប្រសិទ្ធភាពក្នុងការបញ្ឈប់អំពើហិង្សាទាក់ទងនឹងយេនឌ័រ»៕