ភ្នំពេញៈ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានថ្លែងថា ក្រសួងកំពុងបន្តពង្រីក និងលើកកម្ពស់គុណភាពហេដ្ឋារចនាសម្ព័ន្ធដឹកជញ្ជូនផ្លូវគោក ផ្លូវដែក និងផ្លូវទឹក កំពង់ផែ ព្រមទាំងមានគម្រោងសាងសង់ផ្លូវ ស្ពានជាបន្តបន្ទាប់ទៀត។
ក្នុងនោះក៏មានគម្រោងសាងសង់ផ្លូវល្បឿនលឿនពីភ្នំពេញទៅបាវិត ផ្លូវដែកពីភ្នំពេញទៅបាវិត ផ្លូវដែកពីភ្នំពេញទៅសៀមរាប និងពីសៀមរាបទៅប៉ោយប៉ែត និងការតភ្ជាប់ជាមួយប្រទេសជិតខាងទាំងផ្លូវគោក ផ្លូវទឹក និងផ្លូវដែក ខណៈផែនការមេជាតិភ័ស្តុភារកម្មត្រូវបានអភិវឌ្ឍផងដែរ។ នេះបើយោងតាមផេកហ្វេសប៊ុកក្រសួងសាធារណការចេញផ្សាយកាលពីថ្ងៃទី ១ ធ្នូ។
លោកស៊ុន ចាន់ថុល បានថ្លែងបែបនេះ កាលពីថ្ងៃទី ៣០ វិច្ឆិកាក្នុងពេលដែលលោកអញ្ជើញធ្វើជាសហប្រធានដឹកនាំកិច្ចប្រជុំ ក្រុមការងារបច្ចេកទេសចម្រុះ ស្តីពីហេដ្ឋារចនាសម្ព័ន្ធ និងសមាហរណកម្មក្នុងតំបន់ (Infrastructure & Regional Integration Technical working Group – IRITWG) រួមជាមួយលោកស្រី Kamei Haruko នាយិកាទីភ្នាក់ងារសហប្រតិបត្តិការអន្តជាតិជប៉ុន (JICA) ប្រចាំកម្ពុជា និងជាប្រធានក្រុមសម្របសម្រួលជាមួយដៃគូអភិវឌ្ឍន៍ ដោយមានការអញ្ជើញចូលរួមផងដែរពីសំណាក់ថ្នាក់ដឹកនាំជាន់ខ្ពស់ក្រសួង ស្ថាប័នពាក់ព័ន្ធ ដៃគូអភិវឌ្ឍន៍ និងមន្ត្រីជំនាញពាក់ព័ន្ធជាច្រើនរូប។
លើសពីនេះទៀត លោករដ្ឋមន្ត្រីសាធារណការ បានបង្ហាញពីការប្រើប្រាស់យន្តការបច្ចេកវិទ្យាព័ត៌មាន ដូចជាប្រព័ន្ធស្វ័យប្រវត្តិកម្មដឹកជញ្ជូនផ្លូវគោក ប្រព័ន្ធផ្លាស់ប្ដូរទិន្នន័យអេឡិចត្រូនិកពេលកប៉ាល់ចេញចូលកំពង់ផែ (Port EDI) និងការជំរុញការប្រើប្រាស់យានយន្តអគ្គិសនី ដើម្បីសម្រេចនូវយុទ្ធសាស្ត្រអភិវឌ្ឍន៍រយៈពេលវែងប្រកបដោយអព្យាក្រឹតកាបូន (LTS4CN) ឆ្នាំ ២០៥០ ជាដើម។
កិច្ចប្រជុំនេះត្រូវបានរៀបចំឡើងក្នុងគោលបំណងដើម្បីឱ្យតំណាងក្រសួងស្ថាប័នពាក់ព័ន្ធ ចូលរួមធ្វើបទបង្ហាញ អំពីបច្ចុប្បន្នភាព និងវឌ្ឍនភាពការងារ ដោយមានការជម្រាបជូន អំពីស្ថានភាពនៃការអនុវត្ត បញ្ហាប្រឈម និងសំណូមពរ នៃគម្រោងដែលខ្លួនបាន និងកំពុងអនុវត្ត ក្រោមជំនួយហិរញ្ញប្បទានពីសំណាក់ដៃគូអភិវឌ្ឍន៍ មួយចំនួនរួមមាន JICA, ADB, AFD និង EDCF។
ក្នុងឱកាសនោះ តំណាងក្រសួងស្ថាប័នពាក់ព័ន្ធបានចូលរួមធ្វើបទបង្ហាញ អំពីបច្ចុប្បន្នភាព និងវឌ្ឍនភាពការងារ នៃគម្រោងដែលស្ថាប័ននីមួយៗ បាននិងកំពុងអនុវត្ត រួមមានដូចជា៖ គម្រោងអភិវឌ្ឍន៍ផ្លូវថ្នល់ជនបទ វិស័យដឹកជញ្ជូនតាមផ្លូវអាកាស ហេដ្ឋារចនាសម្ព័ន្ធនៃវិស័យទូរគមនាគមន៍ បញ្ហាទឹកកខ្វក់ និងអនាម័យ ផែនការមេនៃការអភិវឌ្ឍថាមពល គម្រោងអភិវឌ្ឍន៍ហេដ្ឋារចនាសម្ព័ន្ធច្រកទ្វារព្រំដែន និងការអភិវឌ្ឍវិស័យភ័ស្តុភារកម្ម។
បើតាមក្រសួងសាធារណការ អង្គប្រជុំក៏មានការកត់សម្គាល់ និងវាយតម្លៃខ្ពស់លើការធ្វើបទបង្ហាញ ព្រមទាំងមានការពិភាក្សា ប្រមែប្រមូល ធាតុចូល និងផ្លាស់ប្តូរគំនិតយោបល់យ៉ាងផុសផុល សំដៅឱ្យការអភិវឌ្ឍវិស័យហេដ្ឋារចនាសម្ព័ន្ធ និងការធ្វើ សមាហរណកម្មក្នុងតំបន់ ប្រព្រឹត្តទៅមានលក្ខណៈគ្រប់ជ្រុងជ្រោយ មានតម្លាភាព គណនេយ្យភាព និងការអភិវឌ្ឍប្រកបដោយចីរភាព ដើម្បីលើកកម្ពស់សេដ្ឋកិច្ចជាតិ៕