.jpg)
ភ្នំពេញៈ លោកនាយករដ្ឋមន្ត្រី ហ៊ុន សែន ផ្ញើសារអបអរសាទរខួបលើកទី ៤៤ នៃការបង្កើត « រណសិរ្សសាមគ្គីសង្គ្រោះជាតិកម្ពុជា» នាថ្ងៃទី ២ ខែធ្នូ ១៩៧៨ ដើម្បីរៀបចំកម្លាំងផ្តួលរំលំរបបខ្មែរក្រហម ដែលរបបនេះត្រូវបានផ្តួលរំលំ នាថ្ងៃទី ៧ មករា ឆ្នាំ ១៩៧៩។
លោក ហ៊ុន សែន ថ្លែងថា «រណសិរ្សសាមគ្គីសង្គ្រោះជាតិកម្ពុជា» បានកើតឡើងដោយកម្លាំង «មហាសាមគ្គី» របស់ប្រជាជនទាំងមូលទាំងក្នុង និងក្រៅប្រទេសដែលមានលោក ហេង សំរិន បច្ចុប្បន្នជាប្រធានរដ្ឋសភា លោក ជា ស៊ីម អតីតជាប្រធានព្រឹទ្ធសភា លោក ហ៊ុន សែន និង «វីរជនស្នេហាជាតិ» ជាច្រើននាក់ទៀត ក្នុងការរៀបចំកម្លាំងផ្ដួលរំលំរបបប្រល័យពូជសាសន៍ ប៉ុល ពត និងទទួលបានជ័យជម្នះលើរបបនេះ នៅថ្ងៃទី ៧ មករា ឆ្នាំ ១៩៧៩ ។
លោកសរសេរនៅក្នុងហ្វេសប៊ុកនាថ្ងៃទី ២ ខែធ្នូ ថា «រណសិរ្សសាមគ្គីសង្គ្រោះជាតិកម្ពុជា» បច្ចុប្បន្នត្រូវបានដូរឈ្មោះជា «រណសិរ្សសាមគ្គី អភិវឌ្ឍន៍មាតុភូមិកម្ពុជា» ដែលជាអង្គការចាត់តាំងមហាជនមួយឈានមុខរបស់គណបក្សប្រជាជនកម្ពុជា និងត្រូវបានកើតឡើងនៅក្នុងភូមិជើងឃ្លូ ឃុំ ២ ធ្នូ ស្រុកស្នួល ខេត្ដក្រចេះ ដែលោកហៅថា ជាតំបន់រំដោះ។
លោកនាយករដ្ឋមន្ត្រីបញ្ជាក់ថា៖ «ឆ្លើយតបទៅនឹងការអំពាវនាវរបស់រណសិរ្ស ប្រជាជនគ្រប់ទិសទីបានក្រោកឈររួបរួមគ្នា ជាកម្លាំងមហាសាមគ្គីជាតិ ដោយបានទទួលការជួយឧបត្ថម្ភយ៉ាងធំធេង ពីកងទ័ពស្ម័គ្រចិត្ដវៀតណាម និងការគាំទ្រពីមិត្ដភក្ដិជិតឆ្ងាយលើសកលលោក ដើម្បីផ្ដួលរំលំរបបកម្ពុជាប្រជាធិបតេយ្យ រហូតដល់ទទួលបានជ័យជម្នះដ៏ត្រចះត្រចង់នាថ្ងៃ ៧ មករា ឆ្នាំ ១៩៧៩»។
លោកបន្ថែមថា៖ «មហាជ័យជម្នះ ៧ មករា ១៩៧៩ បានបពា្ចប់នូវសម័យកាលដ៏ខ្មៅងងឹតបំផុត ដែលពុំធ្លាប់មាននៅក្នុងប្រវត្ដិសាស្ដ្រកម្ពុជា បានបើកឡើងនូវសករាជថ្មី ប្រជាជនកម្ពុជាយើងក៏បានទទួលមកវិញនូវសិទ្ធិសេរីភាព និងឱកាសដើម្បីស្ដារកសាងមាតុភូមិរបស់ខ្លួនឡើងវិញ។ ប្រជាជនគ្រប់រូបសុទ្ធតែយល់ច្បាស់ថា បើគ្មានថ្ងៃកំណើតរណសិរ្ស ២ ធ្នូ និងជ័យជម្នះ ៧ មករា ទេនោះ ក៏គ្មានអ្វីៗដូចថ្ងៃនេះដែរ។ នេះគឺជាសច្ចធម៌ នៃប្រវត្ដិសាស្ដ្រ»៕
