.jpg)
ភ្នំពេញៈ ក្រសួងសុខាភិបាលអំពាវនាវដល់ប្រជាពលរដ្ឋមិនត្រូវទិញផលិតផលបំប៉នសុខភាពម៉ាក GNC ព្រោះផលិតផលនេះអាចបណ្តាលឱ្យប៉ះពាល់ដល់សុខភាពធ្ងន់ធ្ងរ ឬឈានដល់ការបាត់បង់អាយុជីវិត ក្រោយពីក្រសួងរកឃើញថាផលិតផលនេះគ្មានលេខបញ្ជិកា។
ក្រសួងសុខាភិបាលបញ្ជាក់ក្នុងសេចក្តីជូនដំណឹងដែលផ្សព្វផ្សាយនាថ្ងៃទី២ ខែធ្នូ ថា ក្រសួង ពិនិត្យឃើញមានការនាំចូល ចែកចាយ ឬផ្សព្វផ្សាយលក់ផលិតផលGNCនេះ ជាច្រើនមុខគ្មានលេខបញ្ជិកាពីក្រសួងគិតត្រឹមថ្ងៃទី១៥ ខែវិច្ឆិកា។
សេចក្តីជូនដំណឹងបញ្ជាក់ថា៖ «ក្រសួងសុខាភិបាល សូមជូនព័ត៌មានដល់បងប្អូនប្រជាពលរដ្ឋទាំងអស់មិនត្រូវទិញ និងប្រើប្រាស់ផលិតផល បំប៉នសុខភាពម៉ាក GNC នេះឡើយ ព្រោះផលិតផលនេះអាចបណ្តាលឱ្យប៉ះពាល់ដល់សុខភាពធ្ងន់ធ្ងរ ឬឈានដល់ការបាត់បង់អាយុជីវិតទៀតផង»។
សេចក្តីជូនដំណឹងបន្តថា បន្ទាប់ពីការផ្សព្វផ្សាយសេចក្តីជូនព័ត៌មានផលិតផលនេះរួចហើយ បើសិនមានម្ចាស់គណនីបណ្តាញសង្គមហ្វេសប៊ុក និងជនពាក់ព័ន្ធណាមួយនៅតែបន្តនាំចូល ចែកចាយ ឬលក់ផលិតផលនេះជាបន្តទៀតនឹងត្រូវទទួលទោសបញ្ញត្តិតាមច្បាប់។
ក្រសួងអំពាវនាវដល់ប្រជាពលរដ្ឋក្នុងករណីបានជួបប្រទះឃើញជនណាកំពុងនាំចូល ចែកចាយ ឬលក់ផលិតផលបំប៉នសុខភាពម៉ាក GNC នេះ ប្រញាប់ផ្តល់ព័ត៌មាន ឬត្រូវការព័ត៌មានបន្ថែមពីនាយកដ្ឋានឱសថ ចំណីអាហារ បរិក្ខារពេទ្យ និងគ្រឿងសំអាងនៃក្រសួងសុខាភិបាល៕
