សៀមរាបៈ អាជ្ញាធរជាតិអប្សរានឹងរៀបចំប្រារព្ធពិធី «រំឭកគុណអង្គរ» នៅក្នុងរមណីយដ្ឋានអង្គរ រយៈពេល៣ថ្ងៃ ចាប់ពីថ្ងៃទី១៤ ដល់ថ្ងៃទី១៦ ខែធ្នូ ដើម្បីចូលរួមអបអរសាទរខួប៣០ឆ្នាំនៃការចុះរមណីយដ្ឋានអង្គរទៅក្នុងបញ្ជីនៃសម្បត្តិបេតិកភណ្ឌពិភពលោក កាលពីឆ្នាំ១៩៩២។
សេចក្តីជូនដំណឹងអាជ្ញាធរជាតិអប្សរាបញ្ជាក់នាថ្ងៃទី២ ខែធ្នូ ថា ក្នុងពិធីបើកព្រឹត្តិការណ៍នេះប្រជាពលរដ្ឋអាចចូលរួមដាក់បាត្រព្រះសង្ឃចំនួន១៣០អង្គ នៅផ្នែកខាងមុខប្រាសាទអង្គរវត្ត ជាមួយអាជ្ញាធរជាតិអប្សរា។
ក្នុងពិធីរំឭកគុណអង្គរនេះនឹងមានការរៀបចំព្រឹត្តិការណ៍រាត្រីចងចាំ ក្នុងនោះនឹងមានការសម្ដែងសិល្បៈទស្សនីយភាពនានា ដោយក្រុមសិល្បៈក្រសួងវប្បធម៌ និងវិចិត្រសិល្បៈ ដែលបើកឱ្យទស្សនាដោយសេរីជូនសាធារណជនជាតិ និងអន្តរជាតិនេះ ដែលនឹងរៀបចំនៅបរិវេណខាងក្រោយនៃប្រាសាទអង្គរវត្ត។
ពិធីនេះក៏នឹងមានការសម្ដែងសិល្បៈអាយ៉ៃឆ្លើយឆ្លងនៅបរិវេណព្រះលានជល់ដំរី នៃក្រុងអង្គរធំ ព្រមទាំងនឹងមានជាការសម្ដែងសិល្បៈល្ខោនស្បែកធំ ដោយក្រុមសិល្បៈវត្តរាជបូរណ៌នៅបរិវេណអតីតទីស្នាក់ការប៉ូលិសបេតិកភណ្ឌចាស់ ជាប់នឹងទីលានប៉ាវីស ប្រាសាទអង្គរវត្តផងដែរ។ កម្មវិធីទាំងនេះនឹងបើកឱ្យចូលទស្សនាដោយសេរី។
សេចក្តីជូនដំណឹងបញ្ជាក់ថា៖ «ក្នុងន័យដើម្បីចូលរួមអបអរសាទរព្រឹត្តិការណ៍ដ៏មានសារៈសំខាន់ខាងលើនេះ អាជ្ញាធរជាតិអប្សរាក៏នឹងមានរៀបចំការទស្សនានៅតាមការដ្ឋាន និងសារមន្ទីរនានារបស់អាជ្ញាធរជាតិអប្សរា ជូនភ្ញៀវទេសចរ និងសាធារណជន ចូលរួមដោយសេរី ដើម្បីសិក្សាស្វែងយល់អំពីកិច្ចការងារអភិរក្ស និងកិច្ចការរៀបចំតំបន់រមណីយដ្ឋានអង្គររបស់អាជ្ញាធរជាតិអប្សរា»៕