.jpg)
អគារទីបញ្ជាការអង្គភាពនគរបាលការពារបេតិកភណ្ឌប្រចាំប្រាសាទបន្ទាយឆ្មារ ត្រូវបានប្រគល់-ទទួលប្រើប្រាស់ កាលពីថ្ងៃទី ១ ធ្នូ។ រូបថត នគរបាល
បន្ទាយមានជ័យៈ លោកសក់ សេដ្ឋា រដ្ឋលេខាធិការប្រចាំការ ក្រសួងមហាផ្ទៃ តំណាងលោក ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ កាលពីថ្ងៃទី១ធ្នូ ឆ្នាំ២០២២ បានអញ្ជើញជាអធិបតីក្នុងពិធីប្រគល់-ទទួលអគារទីបញ្ជាការអង្គភាពនគរបាលការពារបេតិកភណ្ឌប្រចាំប្រាសាទបន្ទាយឆ្មារ ខេត្តបន្ទាយមានជ័យ។
លោកសក់ សេដ្ឋា បានមានប្រសាសន៍ស្វាគមន៍ ដោយបានធ្វើការកោតសរសើរ និងវាយតម្លៃខ្ពស់ដល់គ្រប់បណ្តាអង្គភាពពាក់ព័ន្ធ ដែលបានខិតខំប្រឹងប្រែងយកចិត្តទុកដាក់ក្នុងការកសាង ទីបញ្ជាការអង្គភាពនគរបាលការពារបេតិកភណ្ឌ ឱ្យបានរួចរាល់តាមការគ្រោងទុក ដើម្បីក្លាយជាទីបញ្ជាការការពារដ៏រឹងមាំសំដៅការពារសន្តិសុខ សុវត្ថិភាព សណ្តាប់ធ្នាប់សាធារណៈជូនដល់គណៈប្រតិភូជាតិ-អន្តរជាតិ ភ្ញៀវទេសចរជាតិ-អន្តរជាតិ ក៏ដូចជាការការពារនូវសម្បត្តិវប្បធម៌ជាតិ ការទប់ស្កាត់នូវរាល់សកម្មភាពបំផ្លិចបំផ្លាញ ដូចករណីលួចវត្ថុបុរាណ ឬជីករុករក និងដឹកជញ្ជូនវត្ថុបុរាណខុសច្បាប់។ល។ នេះបើយោងតាមផេកហ្វេសប៊ុកក្រសួងមហាផ្ទៃ។
អគារទីបញ្ជាការអង្គភាពនគរបាលការពារបេតិកភណ្ឌ ប្រចាំប្រាសាទបន្ទាយឆ្មារនេះ មានទីតាំងស្ថិតនៅក្នុងភូមិបន្ទាយឆ្មារជើង ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ បានចាប់ផ្តើមសាងសង់កាលពីថ្ងៃទី៦ ខែកុម្ភៈ ឆ្នាំ២០២២ ដល់ថ្ងៃទី១៣ ខែសីហា ឆ្នាំ២០២២ ដែលទទួលសាងសង់ដោយនាយកដ្ឋានស្ថាបនានិងវិស្វកម្ម នៃអគ្គនាយកដ្ឋានភ័ស្តុភារ ក្រសួងមហាផ្ទៃ។
ប្រាសាទបន្ទាយឆ្មារ ជាប្រាសាទមេ ដែលមានចម្ងាយ ៦០គីឡូម៉ែត្រ នៅទិសខាងជើងពីទីរួមខេត្តបន្ទាយ មានជ័យ មានគូទឹកព័ទ្ធជុំវិញប្រវែង ៧៧០មx៦៩០ម ក្នុងនោះមានប្រាសាទរណប ចំនួន ៩ ហើយនៅប៉ែកខាងកើតចម្ងាយ៧០០ម៉ែត្រ ពីប្រាសាទបន្ទាយឆ្មារ មានអាងបារាយណ៍មេបុណ្យ ទំហំ ១៨០០មx៨០០ម។
លើសពីនេះទៀត នៅក្នុងភូមិសាស្ត្រប្រាសាទបន្ទាយឆ្មារ មានទួលប្រាសាទចំនួន ២០កន្លែង មានទួលបុរាណចំនួន ១៥កន្លែង ទួលកប់សពចំនួន ១១កន្លែង និងផ្លូវបុរាណចំនួន ៣ខ្សែ។
លោកសក់ សេដ្ឋាបានថ្លែងទៀតថា អគ្គស្នងការដ្ឋាននគរបាលជាតិ និងក្រសួងមហាផ្ទៃ ជានិច្ចកាល តែងតែយកចិត្តទុកដាក់ រួមសុខ រួមទុក្ខជាមួយនឹងកងកម្លាំងនគរបាលជាតិ ដែលឈរជើងគ្រប់ទីតាំង។
ជាមួយគ្នានេះ លោករដ្ឋលេខាធិកាប្រចាំការ បានផ្តាំផ្ញើដល់អង្គភាពនគរបាលការពារបេតិកភណ្ឌ ត្រូវបន្តខិតខំយកចិត្តទុកដាក់អនុវត្តភារកិច្ច ថែរក្សា ការពារ បង្ការ ទប់ស្កាត់ឱ្យបានទាន់ពេលវេលា នូវបទល្មើសទាំងឡាយដែលធ្វើឱ្យខូចខាត បាត់បង់ បង្កមហន្ដរាយបំផ្លិចបំផ្លាញដល់បេតិកភណ្ឌ សម្បត្ដិវប្បធម៌ជាតិ។
លោកបញ្ជាក់ទៀតថា បន្ថែមពីនេះ កងកម្លាំងទាំងអស់ត្រូវមានសាមគ្គីភាពផ្ទៃក្នុង មានទំនាក់ទំនង សហការល្អជាមួយកងកម្លាំង ស្ថាប័ននានាដែលមានការពាក់ព័ន្ធ ក្នុងបុព្វហេតុ សម្រេចឱ្យបាននូវភាពគង់វង្ស នៃសម្បតិ្តបេតិកភណ្ឌវប្បធម៌ជាតិ។ កងកម្លាំង ទាំងអស់ត្រូវថែរក្សា សុខភាព ឱ្យបានល្អ ដើម្បីបន្តនូវកាតព្វកិច្ចដ៏មានសារៈសំខាន់នេះ៕
