.jpg)
រូបភាព ក្រសួងសាធារណការ
រដ្ឋាភិបាលតាមរយៈក្រសួងសាធារណការ និងដឹកជញ្ជូនបានបើកកិច្ចប្រជុំពិនិត្យកែលម្អបរិស្ថានក្រុងជុំវិញបឹងទន្លេសាបជំហានទី២ និងគម្រោងអភិវឌ្ឍន៍ច្រករបៀងទី៤ មហាអនុតំបន់មេគង្គ ដើម្បីលើកកម្ពស់អនាម័យ និងគុណភាពនៃការរស់នៅល្អជូនប្រជាពលរដ្ឋ។
កិច្ចប្រជុំនេះរៀបចំឡើងកាលពីថ្ងៃទី១ ខែធ្នូ ឆ្នាំ ២០២២ ក្នុងគោលបំណងដើម្បីពិនិត្យ និងពិភាក្សាលើវឌ្ឍនភាពការងារសម្រេចបាន គម្រោងកំពុងសិក្សាសមិទ្ធិលទ្ធភាព និងគម្រោងដែលកំពុងអនុវត្តបន្តទាក់ទងនឹងការលើកកម្ពស់ទឹកស្អាត និងអនាម័យ គម្រោងកែលម្អគ្រប់គ្រងបរិស្ថានក្រុងជុំវិញបឹងទន្លេសាបជំហានទី២ និងគម្រោងអភិវឌ្ឍន៍ច្រករបៀងទី៤ មហាអនុតំបន់មេគង្គ ដែលទទួលបានឥណទានសម្បទានពីធនាគារអភិវឌ្ឍន៍អាស៊ី(ADB)។
ក្នុងកិច្ចប្រជុំនេះ លោក រស់ វណ្ណា រដ្ឋលេខាធិការក្រសួងសាធារណការបានថ្លែងអំណរគុណយ៉ាងជ្រាលជ្រៅដល់ក្រុមការងារជំនាញក្រសួង រួមទាំងទីប្រឹក្សាបច្ចេកទេសក្នុងគម្រោងទាំងអស់ ដែលបានខិតខំប្រឹងប្រែងអនុវត្តគម្រោងតាមផែនការដែលបានគ្រោងទុករហូតទទួលបានលទ្ធផលល្អ និងបានជំរុញលើកទឹកចិត្តឱ្យក្រុមការងារបន្តខិតខំប្រឹងប្រែងបន្ថែមទៀត ដើម្បីឈានទៅសម្រេចបានគោលដៅរួមក្នុងការលើកកម្ពស់អនាម័យ និងគុណភាពនៃការរស់នៅរបស់ប្រជាពលរដ្ឋ។
លោក វ៉ាស៊ី សូរិយា អ្នកនាំពាក្យក្រសួងសាធារណការ និងដឹកជញ្ជូនថ្លែងថា គម្រោងដែលទទួលបានឥណទានសម្បទានពីធនាគារអភិវឌ្ឍន៍អាស៊ី(ADB) ត្រូវបានអនុវត្តនៅតាមក្រុងនៃខេត្តជាប់បឹងទន្លេសាប មួយចំនួនក្នុងជំនហានទី១ រួចហើយ មានដូចជានៅខេត្តកំពង់ឆ្នាំងនិងពោធិ៍សាត់ជាដើម និងខេត្តផ្សេងទៀត តាមរយៈការអភិវឌ្ឍហេដ្ឋារចនាសម្ព័ន្ធ និងកសាងទីលានចាក់សំរាមជាដើម។
លោកបន្តថា សម្រាប់គម្រោងលើកទី ២ នឹងបន្តអនុវត្តនៅខេត្តជាប់បឹងទន្លេសាប និងទន្លេមេគង្គ មួយចំនួនទៀត ដើម្បីធ្វើយ៉ាងណាជួយលើកកម្ពស់ជីវភាព និងបរិស្ថានល្អជូនប្រជាពលរដ្ឋនៅក្នុងខេត្តទាំងនោះ។
គម្រោងលើកកម្ពស់ទឹកស្អាត និងអនាម័យ នឹងការសាងសង់ឱ្យមានប្រព័ន្ធចម្រោះទឹកកខ្វក់ និងទឹកភ្លៀង និងការសាងសង់ទីលានចាក់សំរាមនៅតាមបណ្ដាខេត្តមួយចំនួនរួមមាន៖ ខេត្តកំពង់ធំ ខេត្តកំពង់ចាម ខេត្តបាត់ដំបង ខេត្តសៀមរាប ខេត្តក្រចេះ ខេត្តបន្ទាយមានជ័យ និងខេត្តស្ទឹងត្រែងជាដើម ដើម្បីលើកកម្ពស់អនាម័យ ការទុកដាក់សំរាម និងការបញ្ចេញទឹកសំណល់កខ្វក់ពីលំនៅឋានរបស់ប្រជាពលរដ្ឋ ពិសេសខេត្តជុំវិញបឹងទន្លេសាប និងតាមបណ្ដោយទន្លេមេគង្គឱ្យកាន់តែមានការប្រសើរឡើង៕
