.jpg)
លោក អ៊ុំ រាត្រី(ពាក់មួកកណ្តាល)ពេលដឹកនាំអាជ្ញាធរពាក់ព័ន្ធចុះពិនិត្យស្រូវស្រែរបស់ពលរដ្ឋកាលពីថ្ងៃទី៣០វិច្ឆិកា។ រូបថត រដ្ឋបាលខេត្តបន្ទាយមានជ័យ
បន្ទាយមានជ័យៈ ប្រជាកសិករដែលទទួលបានស្រូវពូជប្រមាណ៥ ០០០គ្រួសារ ស្មើនឹងស្រូវពូជ៥០០តោន បូករួមនឹងស្រូវពូជបម្រុងរបស់ពួកគាត់ផងនោះ រហូតមកទល់ពេលនេះ ការបង្កបង្កើនផល បានប្រមាណជាង៩០% ហើយនៅសប្តាហ៍ក្រោយនឹងគ្រប់តាមផែនការលើផ្ទៃដីដែលត្រូវដាំដុះនៅក្នុងស្រុក ក្រុងដែលមានផ្ទៃដីស្រែត្រូវបង្កបង្កើនផលនៅពេលទឹកស្រកចុះនេះ។ នេះបើតាមលោក ប៉ាង វណ្ណាសេដ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តបន្ទាយមានជ័យ។
លោកវណ្ណាសេដ្ឋ បានបញ្ជាក់ថា ក្រោយពេលលោកនាយករដ្ឋមន្ត្រីហ៊ុន សែនបានចុះមកចែកជូនស្រូវពូជដល់ប្រជាកសិករ ក្នុងនាមមន្ត្រីជំនាញលោកបានដឹកនាំក្រុមការងារចុះណែនាំបង្ហាត់បង្ហាញពីនីតិវិធីបច្ចេកទេសនៃការដាំដុះស្រូវឱ្យបានល្អ ដល់កសិករដើម្បីបានទិន្នផលខ្ពស់ កាត់បន្ថយការចំណាយថ្លៃដើមខ្ពស់ប្រកបដោយប្រសិទ្ធភាព។
លោក អ៊ុំ រាត្រី អភិបាលខេត្តបន្ទាយមានជ័យ អមដំណើរដោយ លោក ឃ្លោក នួយ អភិបាលរងខេត្ត មន្ត្រីជំនាញ អាជ្ញាធរស្រុកឃុំ កាលពីថ្ងៃទី៣០វិច្ឆិកា បានចុះពិនិត្យមើលស្ថានភាពស្រូវប្រាំងរបស់ប្រជាកសិករដែលបានទទួលស្រូវពូជ ជាអំណោយរបស់រាជរដ្ឋាភិបាលសម្រាប់ស្តារឡើងវិញនៅក្រោយគ្រោះទឹកជំនន់នៅវាលស្រែឃុំចំណោម ស្រុកមង្គលបូរី។
បើតាមផេកហ្វេសប៊ុករដ្ឋបាលខេត្តបន្ទាយមានជ័យ ក្នុងឱកាសចុះជួបជាមួយប្រជាកសិករ និងពិនិត្យមើលស្ថានភាពការស្តារស្រូវឡើងវិញ លោកអភិបាលខេត្តបន្ទាយមានជ័យ បានសម្តែងការពេញចិត្តចំពោះប្រជាកសិករទាំងអស់ដែលបានចេះកែច្នៃប្រើគ្រប់លទ្ធភាពធ្វើស្រែឡើងវិញ ខណៈដែលតំបន់ខ្លះទឹកនៅច្រើន ខ្លះស្ទើរទឹក ក៏ចេះតែមានការកែច្នៃខ្ពស់ ដោយរួមសហការគ្នាបានយ៉ាងល្អ ដើម្បីបង្កបង្កើនផលស្រូវឡើងវិញបាន៕
